ରାଞ୍ଚି,୭।୧୦: ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ମା’ ରୂପୀ ସୋରେନଙ୍କ ପରଲୋକ ହୋଇଛି । ରାଞ୍ଚିର ଏକ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି । ଦୀର୍ଘଦିନ ଧରି ସେ ଅସୁସ୍ଥ ଥିଲେ ଏବଂ ସେପ୍ଟେମ୍ବର ୮ ତାରିଖରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା ।
ରୂପୀ ସୋରେନଙ୍କ ଦେହାନ୍ତ ନେଇ ହେମନ୍ତ ସୋରେନ ନିଜେ ତାଙ୍କ ଏକ୍ସ ହ୍ୟାଣ୍ଡେଲରେ ସୂଚନା ଦେଇଛନ୍ତି । ମା’ଙ୍କ ବିୟୋଗରେ ସେ ଏକ ଭାବପ୍ରବଣ ପୋଷ୍ଟ ମଧ୍ୟ କରିଛନ୍ତି। ମା’ଙ୍କୁ ହରାଇବା ପରେ ହେମନ୍ତ ସୋରେନ ଲେଖିଛନ୍ତି, “ବାବାଙ୍କ ଯିବା ପରେ ମା’ ହିଁ ମୋର ସବୁଠାରୁ ବଡ଼ ଛାଇ ଥିଲେ । ଆଜି ସେହି ଛାଇ ମଧ୍ୟ ପ୍ରକୃତିର କୋଳରେ ସମାହିତ ହୋଇଗଲା। ମା’…” ମା’ଙ୍କ ବିୟୋଗରେ ସୋରେନ ପରିବାରରେ ଶୋକର ଛାୟା ଖେଳିଯାଇଛି।
ରୂପୀ ସୋରେନଙ୍କ ଦେହାନ୍ତରେ ଝାଡ଼ଖଣ୍ଡ ବିଧାନସଭାର ବିରୋଧୀ ଦଳ ନେତା ବାବୁଲାଲ ମରାଣ୍ଡି ଶୋକ ପ୍ରକାଶ କରିଛନ୍ତି । ସେ ହେମନ୍ତ ସୋରେନଙ୍କ ମା’ଙ୍କ ଦେହାନ୍ତ ଖବରରେ ଦୁଃଖ ପ୍ରକାଶ କରିବା ସହ ଶୋକସନ୍ତପ୍ତ ପରିବାରକୁ ଏହି ଦୁଃଖ ସହିବାକୁ ଶକ୍ତି ମିଳୁ ବୋଲି କହିଛନ୍ତି। ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (JMM) ମଧ୍ୟ ରୂପୀ ସୋରେନଙ୍କ ଦେହାନ୍ତରେ ଶୋକ ପ୍ରକାଶ କରିଛି । ଦଳ ପକ୍ଷରୁ ତାଙ୍କୁ ସଂଘର୍ଷ, ତ୍ୟାଗ ଓ ଧୈର୍ଯ୍ୟର ପ୍ରତୀକ ବୋଲି କୁହାଯାଇଛି। ଶିବୁ ସୋରେନଙ୍କ ଦେହାନ୍ତ ପରେ ମଧ୍ୟ ରୂପୀ ସୋରେନ ତାଙ୍କ ସଂଘର୍ଷରେ ସବୁବେଳେ ସାଥିରେ ରହିଥିଲେ ବୋଲି JMM କହିଛି।ଦଳ ପକ୍ଷରୁ ରୂପୀ ସୋରେନଙ୍କ ଦେହାନ୍ତକୁ ଝାଡ଼ଖଣ୍ଡ ସମେତ ସମଗ୍ର ଦେଶ ପାଇଁ ଅପୂରଣୀୟ କ୍ଷତି ବୋଲି କୁହାଯାଇଛି।
ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ରଘୁବର ଦାସ ମଧ୍ୟ ରୂପୀ ସୋରେନଙ୍କ ଦେହାନ୍ତରେ ଶୋକ ପ୍ରକାଶ କରିଛନ୍ତି। ସେ ରୂପୀ ସୋରେନଙ୍କୁ ‘ରୂପୀ ଚାଚୀ’ ବୋଲି ସମ୍ବୋଧନ କରି ଏହା ତାଙ୍କ ପାଇଁ ବ୍ୟକ୍ତିଗତ କ୍ଷତି ବୋଲି କହିଛନ୍ତି। ରଘୁବର ଦାସ କହିଛନ୍ତି ଯେ ରୂପୀ ସୋରେନ ତାଙ୍କୁ ପୁଅ ଭଳି ସ୍ନେହ କରୁଥିଲେ। ସେ ମମତାର ସାକ୍ଷାତ ସ୍ୱରୂପ ଥିଲେ ବୋଲି ରଘୁବର ଦାସ ଉଲ୍ଲେଖ କରିଛନ୍ତି।
