ନୂଆଦିଲ୍ଲୀ,୭।୧୦: ଭାରତୀୟ ରାଜନୀତିରେ ନରେନ୍ଦ୍ର ମୋଦିଙ୍କ ଶାସନ ଯାତ୍ରାକୁ ୨୫ ବର୍ଷ ପୂରିଛି। ଏହି ଅବସରରେ ବୁଧବାର ଭାଜପାର ବରିଷ୍ଠ ନେତା ଲାଲକୃଷ୍ଣ ଆଡଭାନୀଙ୍କୁ ତାଙ୍କ ବାସଭବନରେ ଯାଇ ଭେଟିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଉଭୟ ନେତାଙ୍କ ସାକ୍ଷାତର ଏକ ଫଟୋ ମଧ୍ୟ ସାମ୍ନାକୁ ଆସିଛି। ଫଟୋରେ ମୋଦି ଆଡଭାନୀଙ୍କ ସହ କଥା ହେଉଥିବା ବେଳେ ତାଙ୍କ ହାତ ଉପରେ ହାତ ରଖିଥିବା ଦେଖାଯାଇଛି । ଏହା ପୂର୍ବରୁ ୨୫ ବର୍ଷର ରାଜନୈତିକ ଯାତ୍ରା ପୂରଣ ଅବସରରେ ପ୍ରଧାନମନ୍ତ୍ରୀ ନୂଆଦିଲ୍ଲୀର ସରୋଜିନୀ ନଗରସ୍ଥିତ ଶ୍ରୀ ବିନାୟକ ମନ୍ଦିର ଯାଇ ପୂଜାର୍ଚ୍ଚନା କରିଥିଲେ।
୨୫ ବର୍ଷ ପୂର୍ତ୍ତି ଅବସରରେ ନିଜ ରାଜନୈତିକ ଯାତ୍ରାକୁ ମନେ ପକାଇ ପ୍ରଧାନମନ୍ତ୍ରୀ କହିଛନ୍ତି, ୨୦୦୧ ଅକ୍ଟୋବର ୭ ତାରିଖରେ ଗୁଜରାଟ ମୁଖ୍ୟମନ୍ତ୍ରୀ ଭାବେ ଶପଥ ନେବା ସମୟରେ ସେ କେବେ ଏହି ସ୍ଥାନରେ ପହଞ୍ଚିବେ ବୋଲି ଚିନ୍ତା କରିନଥିଲେ। ଦିଲ୍ଲୀରେ ଏକ ସଭାକୁ ସମ୍ବୋଧିତ କରି ମୋଦି ତାଙ୍କ ୨୫ ବର୍ଷର ଯାତ୍ରାକୁ ନିରନ୍ତର ସେବାର ଯାତ୍ରା ବୋଲି ବର୍ଣ୍ଣନା କରିଥିଲେ । ଏଥିସହ ଭାଜପା, ଏନ୍ଡିଏର ସହଯୋଗୀ ଦଳ ଓ ରାଜନୈତିକ ସାଥୀମାନଙ୍କୁ ସେ ଧନ୍ୟବାଦ ଜଣାଇଥିଲେ।
ପ୍ରଧାନମନ୍ତ୍ରୀ ମୋଦି କହିଥିଲେ ଯେ, ୨୫ ବର୍ଷ ପୂରଣ ହେବା ନିଜକୁ ପ୍ରଶଂସା କରିବାର ସମୟ ନୁହେଁ, ବରଂ ଏହା କୃତଜ୍ଞତା ଜଣାଇବାର ମୁହୂର୍ତ୍ତ। ବ୍ୟକ୍ତିଗତ ଆକାଂକ୍ଷା ବଦଳରେ ସେବା ଭାବନା ଓ ଏକ ମିଶନ ତାଙ୍କ ରାଜନୈତିକ ଯାତ୍ରାକୁ ପ୍ରେରିତ କରିଛି ବୋଲି ସେ କହିଥିଲେ।
ନିଜ ରାଜନୈତିକ ଜୀବନକୁ ଗଢ଼ି ତୋଳିଥିବା ଅନୁଭୂତି ବିଷୟରେ ମୋଦି କହିଥିଲେ ଯେ, ତାଙ୍କ ଯାତ୍ରାରେ ସମର୍ଥକଙ୍କ ସହ ସମାଲୋଚକଙ୍କର ମଧ୍ୟ ଅବଦାନ ରହିଛି। ସମର୍ଥକମାନେ ତାଙ୍କୁ ଉତ୍ସାହ ଦେଇଥିବା ବେଳେ ସମାଲୋଚକମାନେ ତାଙ୍କୁ ଆତ୍ମସମୀକ୍ଷା କରିବା ଶିଖାଇଛନ୍ତି। ତାଙ୍କୁ ତଳକୁ ଟାଣିବାକୁ ଚେଷ୍ଟା କରିଥିବା ଲୋକମାନେ ହିଁ ପୁଣି ଉଠି ଛିଡ଼ା ହେବା ଶିଖାଇଛନ୍ତି । ନିଜ ଭାଷଣର ଶେଷରେ ପ୍ରଧାନମନ୍ତ୍ରୀ କହିଥିଲେ ଯେ, ୨୫ ବର୍ଷ ପୂରଣକୁ ବିଶ୍ରାମର ଏକ ପର୍ଯ୍ୟାୟ ଭାବେ ଦେଖିବା ଉଚିତ ନୁହେଁ। ବରଂ ଏହା ସେବାର ଆଉ ଏକ ପର୍ଯ୍ୟାୟର ଆରମ୍ଭ । ୨୦୪୭ ସୁଦ୍ଧା ଭାରତକୁ ଏକ ବିକଶିତ ରାଷ୍ଟ୍ରରେ ପରିଣତ କରିବା ଦିଗରେ ଦେଶ ଆଗକୁ ବଢ଼ିବ ଏବଂ ଏହି ଲକ୍ଷ୍ୟ ହାସଲ କରିବାରେ ସମସ୍ତେ ମିଳିତ ଭାବେ ସଫଳ ହେବେ ବୋଲି ମୋଦି କହିଥିଲେ ।
