ଛେଣ୍ଡିପଦା,୨।୧(ସ୍ବ.ପ୍ର.):ପ୍ରକୃତିକୁ ଉପଭୋଗ କରିବାକୁ ପହଞ୍ଚୁଛନ୍ତି ପର୍ଯ୍ୟଟକ। ପର୍ଯ୍ୟଟନ ଋତୁ ହୋଇଥିବାରୁ ଦୈନିକ ବଢ଼ୁଛି ଭିଡ଼। କିଏ ମା’ ବାୟାଣୀଙ୍କ ପୂଜାର୍ଚ୍ଚନା କରି ମାନସିକ ପୂରଣ କରୁଛନ୍ତି ତ ଆଉ କିଏ ପାହାଡ଼, ଜଙ୍ଗଲିଆ ପରିବେଶରୁ ମଜା ଉଠାଇ ଭୋଜିଭାତ କରୁଛନ୍ତି। ଅନେକେ ଚିରସ୍ରୋତା ମାଦେଳିଆ ଯୋର ଓ ଝରଣା ଦେଖି ପୁଲକିତ ହେଉଛନ୍ତି। ହେଲେ ଏକ ସମୟରେ ବହୁ ପିକ୍ନିକ୍ ଦଳ ପହଞ୍ଚିଗଲେ ସୃଷ୍ଟି ହେଉଛି କିଛିଟା ସମସ୍ୟା। କାରଣ ଭୋଜି କରିବାକୁ ପର୍ଯ୍ୟାପ୍ତ ପିଣ୍ଡି ବ୍ୟବସ୍ଥା ନ ଥିବାରୁ ଅନୁଗୋଳ ଜିଲା ଛେଣ୍ଡିପଦା ବ୍ଲକ ପାତ୍ରପଡ଼ାସ୍ଥିତ ବାୟାଣୀ ପୀଠରେ ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି ପର୍ଯ୍ୟଟକଙ୍କୁ।
ଦେବୀନଗର ପାହାଡ଼ ତଳେ ରହିଛି ମା’ ବାୟାଣୀଙ୍କ ପୀଠ। ବଣଭୋଜି ପାଇଁ ଏହା ଅତ୍ୟନ୍ତ ମନୋରମ ପରିବେଶ ହୋଇଥିବାରୁ ପ୍ରତିବର୍ଷ ପର୍ଯ୍ୟଟନ ଋତୁରେ ଏଠାରେ ପ୍ରବଳ ଭିଡ଼ ଦେଖିବାକୁ ମିଳେ। ଚଳିତବର୍ଷ ମଧ୍ୟ ବହୁ ସଂଖ୍ୟାରେ ସ୍କୁଲ, କଲେଜ ଛାତ୍ରୀଛାତ୍ର, ପର୍ଯ୍ୟଟକ ପାତ୍ରପଡ଼ା ଆସୁଛନ୍ତି। ଜିଲା ପ୍ରଶାସନ ପକ୍ଷରୁ ୨ କୋଟିରୁ ଅଧିକ ଟଙ୍କା ଖର୍ଚ୍ଚ କରାଯାଇ ଏହି ପର୍ଯ୍ୟଟନସ୍ଥଳୀର ଅନେକ ବିକାଶ କରାଯାଇଥିବାରୁ ଆସୁଥିବା ପର୍ଯ୍ୟଟକମାନଙ୍କୁ ପୂର୍ବାପେକ୍ଷା ଅଧିକ ସୁବିଧା ମିଳିପାରୁଛି। ବିଶେଷକରି ନୂଆକରି ହୋଇଥିବା ପାର୍କ, ସୌନ୍ଦର୍ଯ୍ୟକରଣ କାର୍ଯ୍ୟ ଲୋକଙ୍କ ପାଇଁ ଆକର୍ଷଣୀୟ ହୋଇପାରିଛି। ତଥାପି ଭୋଜି ପାଇଁ ଏଠାରେ ପିଣ୍ଡିର ଅଭାବ ନିରାଶାର କାରଣ ସାଜିଛି। ବିଶେଷକରି ଆମିଷ ବାରଗୁଡ଼ିକରେ ଅଧିକ ସଂଖ୍ୟକ ପିକ୍ନିକ୍ ପାର୍ଟି ପହଞ୍ଚୁଥିବାରୁ ଏଠାରେ ଥିବା ୧୫ରୁ ଅଧିକ ପିଣ୍ଡି ପର୍ଯ୍ୟାପ୍ତ ହୋଇପାରୁ ନାହିଁ। ଫଳରେ ବଣଭୋଜି କରିବାକୁ ଆସିଥିବା ଲୋକେ ନିଜ ବ୍ୟବସ୍ଥାରେ ଇଟା, ପଥର ରଖି ରୋଷେଇ କରିବା ସହ ଅପରିଷ୍କାର ପରିବେଶରେ ବସି ଖାଉଥିବା ଦେଖାଯାଉଛି। ସେହିପରି ପିଇବା ପାଣି, ବିଦ୍ୟୁତ୍ ବ୍ୟବସ୍ଥାକୁ ନେଇ ପର୍ଯ୍ୟଟକମାନେ ସନ୍ତୋଷବ୍ୟକ୍ତ କରୁଥିବା ବେଳେ ଗୋଟିଏ ମାତ୍ର ଶୌଚାଳୟ ଥିବାରୁ ମହିଳା ପର୍ଯ୍ୟଟକମାନେ ଶୌଚ ପାଇଁ ସମସ୍ୟାରେ ପଡ଼ୁଛନ୍ତି। ପାର୍କ ପୋଖରୀରେ ବୋଟିଂ ବ୍ୟବସ୍ଥାକୁ ନେଇ ଉତ୍ସାହିତ ଛାତ୍ରୀଛାତ୍ର ଓ ଯୁବତୀ ଯୁବକମାନେ ଆଗଭର ହେଉଥିଲେ ବି ବୋଟ୍ ଅଚଳ ହୋଇଯାଇଥିବାରୁ ମନ ଊଣା କରୁଛନ୍ତି। ଶିଶୁମାନଙ୍କ ପାଇଁ ଏଠାରେ ଉଦ୍ୟାନ ନ ଥିବାବେଳେ କେବଳ ବୁଲାବୁଲି କରିବାକୁ ଆସୁଥିବା ଲୋକେ ଖାଇବାକୁ ହୋଟେଲ ନ ପାଇ ଅସୁବିଧାର ସମ୍ମୁଖୀନ ହେଉଛନ୍ତି। ତେଣୁ ପର୍ଯ୍ୟଟକଙ୍କ ଏସବୁ ସମସ୍ୟା ସମାଧାନ ଦିଗରେ ପ୍ରଶାସନ ତୁରନ୍ତ ଦୃଷ୍ଟି ଦେଲେ ଅଧିକ ସଂଖ୍ୟକ ପର୍ଯ୍ୟଟକ ପାତ୍ରପଡ଼ା ଆସନ୍ତେ ବୋଲି ଅନେକେ ମତ ଦେଇଛନ୍ତି।
