ବରଗଡ଼,୧୦।୬(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ରବିଧାନ ସଂଗ୍ରହ ପ୍ରକ୍ରିୟା ଚାଲିଛି। ଆଉମାତ୍ର ୨ଦିନ ପରେ ଏହି ପ୍ରକ୍ରିୟାକୁ ମାସେ ପୂରିବ। ହେଲେ ଏପର୍ଯ୍ୟନ୍ତ ଜିଲାରେ ଧାନ କିଣାବିକା ସ୍ବାଭାବିକ ହୋଇପାରି ନାହିଁ। ମଣ୍ଡିକୁ ବିକ୍ରି ପାଇଁ ଯେଉଁ ପରିମାଣରେ ଧାନ ଆସୁଛି, ସେହି ଅନୁପାତରେ ତାହା ବିକ୍ରି ହୋଇପାରୁ ନାହିଁ। ସେହିପରି ଧାନ ଉଠାଇବାକୁ କେତେକ ମଣ୍ଡିକୁ ଏପର୍ଯ୍ୟନ୍ତ ମିଲର୍ସଙ୍କ ପାଦ ମଧ୍ୟ ପଡ଼ି ନାହିଁ । ଫଳରେ ବିକ୍ରି ଅପେକ୍ଷାରେ ରହିଥିବା ଧାନରେ ମଣ୍ଡିଗୁଡ଼ିକ ଭର୍ତ୍ତି ହୋଇଗଲାଣି। ଅନ୍ୟପଟେ ତୁହାକୁ ତୁହା ବର୍ଷା ମାଡ଼ି ଆସୁଥିବାବେଳେ ମୌସୁମୀ ପାଖେଇ ଆସିଲାଣି। ଏଭଳି ସ୍ଥିତିରେ ଜିଲାର ଚାଷୀମାନେ ଚିନ୍ତିତ ହୋଇ ପଡ଼ିଛନ୍ତି। ଅଭିଯୋଗ ନେଇ ସୋମବାର ଜିଲାର ତେନ୍ତେଲଟିକ୍ରା ଧାନକ୍ରୟ କେନ୍ଦ୍ର(ମଣ୍ଡି) ଉପରେ ନିର୍ଭରଶୀଳ ଚାଷୀମାନେ ଜିଲାପାଳ ଆଦିତ୍ୟ ଗୋୟଲଙ୍କୁ ଫେରାଦ ହୋଇ ଏକ ଦାବିପତ୍ର ପ୍ରଦାନ କରିଛନ୍ତି। ଅତିରିକ୍ତ ଜିଲାପାଳ ମଧୁଛନ୍ଦା ସାହୁ ଦାବିପତ୍ର ଗ୍ରହଣ କରିଥିଲେ।
ସୂଚନା ଅନୁଯାୟୀ, ମଣ୍ଡି ଖୋଲିବା ପରେ ଅଞ୍ଚଳର ଚାଷୀମାନେ ଟୋକନ ଆଧାରରେ ଧାନ ମଣ୍ଡିକୁ ଆଣିଛନ୍ତି। ବିକ୍ରି ଅପେକ୍ଷାରେ ସେଠାରେ ସବୁଧାନ ପଡ଼ି ରହିଛି। କିନ୍ତୁ ତାକୁ କ୍ରୟ କରାଯାଉ ନାହିଁ କିମ୍ବା ସେଠାରୁ ଉଠାଯାଉ ନ ଥିବା ଚାଷୀମାନେ ଅଭିଯୋଗ କରିଛନ୍ତି। ଏଠାରେ ସ୍ଥିତି ଏଭଳି ହୋଇଛି ଯେ ଧାନ ଗଦାକରି ରଖିବା ପାଇଁ ମଧ୍ୟ ମଣ୍ଡିରେ ଆଉ ଜାଗା ନାହିଁ। ଫଳରେ ମଣ୍ଡିରେ ଧାନ ରଖିବାକୁ ନେଇ ବିଭିନ୍ନ ସମୟରେ ସେମାନଙ୍କ ମଧ୍ୟରେ ଅପ୍ରୀତିକର ପରିସ୍ଥିତି ମଧ୍ୟ ଉପୁଜିଛି ବୋଲି ଚାଷୀମାନେ କହିଛନ୍ତି। ସେହିପରି ଧାନ ଉଠାଯାଉ ନ ଥିବାରୁ ସମ୍ପୃକ୍ତ ଚାଷୀଙ୍କୁ ମିଳିଥିବା ଟୋକନ ଅବଧି ମଧ୍ୟ ସରି ଯାଉଛି। ଟୋକନ ଅବଧି ସରିଗଲେ ସେମାନେ ଧାନବିକ୍ରିରୁ ବଞ୍ଚିତ ହେବାର ଆଶଙ୍କା ରହିଥିବା ଚାଷୀମାନେ କହିଛନ୍ତି।
କେବଳ ସେତିକି ନୁହେଁ, ଉକ୍ତ ମଣ୍ଡିରେ ଦୀର୍ଘଦିନରେ ବିକ୍ରି ଅପେକ୍ଷାରେ ଧାନ ପଡ଼ି ରହିଥିବା ଯୋଗୁ ଚାଷୀମାନଙ୍କୁ ନାନା ଅସୁବିଧାର ସମ୍ମୁଖୀନ ହେବାକୁ ପଡୁଛି। ଧାନ ବିକ୍ରି ହେବା ଆଶା ନେଇ ଚାଷୀମାନେ ମଣ୍ଡିକୁ ପ୍ରତିଦିନ ଆସୁଛନ୍ତି, ମାତ୍ର ଦୀର୍ଘ ସମୟ ଅପେକ୍ଷା ପରେ ମଧ୍ୟ ତାହା ବିକ୍ରି ନ ହେବାରୁ ଚାଷୀମାନଙ୍କୁ ନିରାଶରେ ପୁଣି ଘରକୁ ଫେରିଯିବାକୁ ପଡୁଛି। ଏଭଳି ସ୍ଥିତିରେ ଚାଷୀମାନେ ଧାନ ଅମଳ କାର୍ଯ୍ୟରେ ନିୟୋଜିତ ଶ୍ରମିକଙ୍କୁ ସେମାନଙ୍କ ପାରିଶ୍ରମିକ ଦେଇ ପାରୁ ନ ଥିବାବେଳେ ପରବର୍ତ୍ତୀ ଫସଲ ପାଇଁ ନିଜକୁ ପ୍ରସ୍ତୁତ ମଧ୍ୟ କରି ପାରୁ ନାହାନ୍ତି। ଫଳରେ ଏ ଦିଗରେ ଦୃଷ୍ଟି ଦେଇ ଧାନ ଉଠାଣ ପାଇଁ ତ୍ୱରିତ୍ ପଦକ୍ଷେପ ନେବାକୁ ଚାଷୀମାନେ ଜିଲାପାଳଙ୍କୁ ନିବେଦନ କରିଛନ୍ତି। ଚୁଡ଼ାମଣି ସାହୁ, ଯୁଧିଷ୍ଠିର ସାହୁ, ମୁନା ସାହୁ, ଦେବରାଜ ପ୍ରଧାନ, ଗୁରୁଦେବ ସାହୁଙ୍କ ସମେତ ଅନେକ ଚାଷୀ ଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ।
Dharitri – Odisha’s No.1 Odia Daily
