କଲମ୍ବୋ,୧୧।୪ : ଆର୍ଥିକ ଚ୍ୟାଲେଞ୍ଜକୁ ପରିଚାଳନା କରିବାରେ ଅପାରଗ ରାଜପାକ୍ସେ ସରକାର ଶ୍ରୀଲଙ୍କାକୁ ଗମ୍ଭୀର ଅର୍ଥନୈତିକ ଓ ରାଜନୈତିକ ସଙ୍କଟ ମଧ୍ୟକୁ ନେଇଯାଇଥିବା ପୂର୍ବତନ ପ୍ରଧାନମନ୍ତ୍ରୀ ରାନିଲ ଓ୍ବିକ୍ରମ୍ସିଂହେ ରବିବାର ଅଭିଯୋଗ କରିଛନ୍ତି। ସଙ୍କଟ ସମୟରେ ଭାରତ ଶ୍ରୀଲଙ୍କାକୁ ସର୍ବାଧିକ ସହାୟତା ଯୋଗାଇଛି। ଇନ୍ଧନ ପାଇଁ ଭାରତ ଯୋଗାଇ ଦେଇଥିବା ଋଣ ମେ’ ଦ୍ୱିତୀୟ ସପ୍ତାହ ପର୍ଯ୍ୟନ୍ତ ଯିବ। ଏହା ପରେ ଶ୍ରୀଲଙ୍କାର ସମସ୍ୟା ଆହୁରି ବଢ଼ିଯିବ। କେବଳ ଋଣ ନୁହେଁ, ନୂଆଦିଲ୍ଲୀ ଶ୍ରୀଲଙ୍କାକୁ ଡିଜେଲ ଓ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀ ମଧ୍ୟ ଯୋଗାଇ ଦେଇଥିବା ପୂର୍ବତନ ପ୍ରଧାନମନ୍ତ୍ରୀ କହିଛନ୍ତି।
ଗୋଟାବାୟା ସରକାରଙ୍କ ବିଫଳତା ଯୋଗୁ ଦେଶ ଏଭଳି ଅଭୂତପୂର୍ବ ସ୍ଥିତିର ସମ୍ମୁଖୀନ ହୋଇଛି, ଯେଉଁଠି ଲୋକଙ୍କୁ ଅତ୍ୟାବଶ୍ୟକ ସାମଗ୍ରୀ କିଣିବା ଲାଗି ଲମ୍ବା ଧାଡ଼ିରେ ଛିଡ଼ାହେବାକୁ ପଡ଼ୁଛି। ୨୦୧୯ରେ ଓ୍ବିକ୍ରମସିଂହେ ପ୍ରଧାନମନ୍ତ୍ରୀ ଥିବାବେଳେ ଶ୍ରୀଲଙ୍କା ବଳକା ପୁଞ୍ଜି ସ୍ଥିତିରେ ରହିଥିଲା। ବର୍ତ୍ତମାନର ସରକାର ଲୋକଙ୍କୁ ରାସ୍ତାକୁ ନେଇଆସିଥିବା ସେ କହିଛନ୍ତି। ବିଦେଶୀ ବିନିମୟ ଭଣ୍ଡାରରେ ଯଥେଷ୍ଟ ଅର୍ଥ ନ ଥିବାରୁ ବିଲ୍ ପୈଠ ପାଇଁ ପ୍ରମୁଖ ରପ୍ତାନି କମ୍ପାନୀଗୁଡ଼ିକଠାରୁ ସରକାରଙ୍କୁ ଋଣ କରିବାକୁ ପଡ଼ୁଛି। ଅନ୍ତର୍ଜାତୀୟ ମୁଦ୍ରାପାଣ୍ଠି (ଆଇଏମ୍ଏଫ୍)ରୁ ଋଣ ଆଣିବା ପାଇଁ ଶ୍ରୀଲଙ୍କା ଅର୍ଥମନ୍ତ୍ରୀ ଓ କେନ୍ଦ୍ରୀୟ ବ୍ୟାଙ୍କ ଗଭର୍ନର ଖୁବ୍ଶୀଘ୍ର ଏହା ସହ ଆଲୋଚନା କରିବାକୁ ଯାଉଛନ୍ତି।
