ନୂଆଦିଲ୍ଲୀ,୨୭।୯: ଦେଶର କୋଟି କୋଟି ମୋବାଇଲ ଉପଭୋକ୍ତାଙ୍କ ପାଇଁ ଏକ ବଡ଼ ଆଶ୍ୱସ୍ତିକର ଖବର ସାମ୍ନାକୁ ଆସିଛି। ଭାରତୀୟ ଟେଲିକମ ନିୟାମକ ପ୍ରାଧିକରଣ (TRAI) ନିୟମରେ ଏକ ବଡ଼ ସଂଶୋଧନ କରି ‘ଟେଲିକମ କଞ୍ଜ୍ୟୁମର ପ୍ରୋଟେକ୍ସନ (ତ୍ରୟୋଦଶ ସଂଶୋଧନ) ରେଗୁଲେସନ୍ସ, ୨୦୨୬’ ଲାଗୁ କରିଛି। ଏହି ନିଷ୍ପତ୍ତି ଫଳରେ ଏବେ ଗ୍ରାହକମାନଙ୍କୁ ବର୍ଷକୁ ୧୩ ଥର ବଦଳରେ କେବଳ ୧୨ ଥର ହିଁ ରିଚାର୍ଜ କରିବାକୁ ପଡ଼ିବ।
ନୂତନ ନିୟମ ଅନୁଯାୟୀ, ଏବେ ରିଲାଏନ୍ସ ଜିଓ (Jio), ଏୟାରଟେଲ (Airtel), ବିଏସଏନଏଲ (BSNL) ଏବଂ ଭୋଡାଫୋନ-ଆଇଡିଆ (Vi) ଭଳି ସମସ୍ତ ପ୍ରମୁଖ ଟେଲିକମ କମ୍ପାନୀଗୁଡ଼ିକୁ ସମ୍ପୂର୍ଣ୍ଣ ୩୦ ଦିନିଆ ବୈଧତା (Validity) ଥିବା ପ୍ଲାନ ସହିତ ବିନା ଡାଟାରେ ଶସ୍ତା ’Voice Only’ (କେବଳ କଲିଂ) ପ୍ୟାକ ମଧ୍ୟ ପ୍ରଦାନ କରିବାକୁ ପଡ଼ିବ। ଟ୍ରାଇର ଏହି ପଦକ୍ଷେପକୁ ସୱାଗତ କରି ରାଜ୍ୟସଭା ସାଂସଦ ରାଘବ ଚଢା ଏହାକୁ ଭାରତ ସରକାର ଏବଂ ନିୟାମକ ପ୍ରାଧିକରଣର ଏକ ଜନହିତକର ତଥା ଐତିହାସିକ ନିଷ୍ପତ୍ତି ବୋଲି ଅଭିହିତ କରିଛନ୍ତି।
ଟ୍ରାଇର ନୂଆ ନିୟମ ଲାଗୁ ହେବା ପରେ ପ୍ରିପେଡ ମୋବାଇଲ ଗ୍ରାହକମାନଙ୍କୁ ସିଧାସଳଖ ସଞ୍ଚୟର ସୁବିଧା ମିଳିବ। ୨୮ ଦିନର ବୈଧତା ଯୋଗୁଁ ଏପର୍ଯ୍ୟନ୍ତ ଗ୍ରାହକମାନଙ୍କୁ ଗୋଟିଏ ବର୍ଷ ଅର୍ଥାତ ୩୬୫ ଦିନରେ ୧୩ ଥର ରିଚାର୍ଜ କରିବାକୁ ପଡ଼ୁଥିଲା। ଏବେ ପୂରା ୩୦ ଦିନିଆ କ୍ୟାଲେଣ୍ଡର ବୈଧତା ଥିବା ପ୍ଲାନ ଆସିବା ଫଳରେ ଗ୍ରାହକଙ୍କୁ ବର୍ଷରେ କେବଳ ୧୨ ଥର ରିଚାର୍ଜ କରିବାକୁ ହେବ, ଯାହାଦ୍ୱାରା ପୂରା ଗୋଟିଏ ମାସର ରିଚାର୍ଜ ଖର୍ଚ୍ଚ ସଞ୍ଚୟ ହେବ।
ଟେଲିକମ କମ୍ପାନୀଗୁଡ଼ିକୁ ଏବେ ସୱତନ୍ତ୍ର ଭାବେ କେବଳ କଲିଂ ଏବଂ ଏସଏମଏସ ଆଧାରିତ ଶସ୍ତା ପ୍ଲାନ ମଧ୍ୟ ଆଣିବାକୁ ପଡ଼ିବ। ଏହାଦ୍ୱାରା ସେହିଭଳି ଉପଭୋକ୍ତାମାନେ ଉପକୃତ ହେବେ, ଯେଉଁମାନଙ୍କର ଇଣ୍ଟରନେଟ ଡାଟାର କୌଣସି ଆବଶ୍ୟକତା ନାହିଁ। ସେମାନଙ୍କୁ ଆଉ ଅଯଥାରେ ଡାଟା ପ୍ୟାକ ପାଇଁ ଅତିରିକ୍ତ ଟଙ୍କା ଗଣିବାକୁ ପଡ଼ିବ ନାହିଁ।
ମାସକରେ ୩୦ କିମ୍ୱା ୩୧ ଦିନ ଥିବା ସତ୍ତ୍ୱେ ଟେଲିକମ କମ୍ପାନୀଗୁଡ଼ିକ କେବଳ ୨୮ ଦିନିଆ ବୈଧତା ଦେଉଥିବା ବିରୋଧରେ ସଂସଦରେ ଦୃଢ଼ ଦାବି ଉପସ୍ଥାପନ କରାଯାଇଥିଲା। ୧୧ ମାର୍ଚ୍ଚରେ ରାଜ୍ୟସଭାରେ ସାଂସଦ ରାଘବ ଚଢା ଏହି ପ୍ରସଙ୍ଗ ଉଠାଇ ସରକାରଙ୍କ ହସ୍ତକ୍ଷେପ ଲୋଡ଼ିଥିଲେ ଏବଂ ଉପଭୋକ୍ତାଙ୍କୁ ଏହି ଆର୍ଥିକ ଶୋଷଣରୁ ରକ୍ଷା କରିବାକୁ ଦାବି କରିଥିଲେ। ତେଣୁ ଗ୍ରାହକମାନଙ୍କ ଦୀର୍ଘ ଦିନର ଅଭିଯୋଗ ତଥା ସଂସଦର ଦାବିକୁ ଗ୍ରହଣ କରି ସରକାର ଏବଂ ଟ୍ରାଇ ଏହି ନୂଆ ନିୟମ ଲାଗୁ କରି ବଡ଼ ଆଶ୍ୱସ୍ତି ଦେଇଛନ୍ତି।
ଦେଶରେ ସ୍ମାର୍ଟଫୋନ ଏବଂ 5G ସେବାର ଦ୍ରୁତ ପ୍ରସାର ସତ୍ତ୍ୱେ ଆଜି ମଧ୍ୟ ପ୍ରାୟ ୩୦ କୋଟି ଲୋକ ଫିଚର ଫୋନ ବା କି-ପ୍ୟାଡ ମୋବାଇଲ ବ୍ୟବହାର କରୁଛନ୍ତି। ବିଶେଷ କରି ବରିଷ୍ଠ ନାଗରିକମାନଙ୍କୁ ଦାମୀ ଡାଟା ପ୍ୟାକର କୌଣସି ଆବଶ୍ୟକତା ନଥାଏ; ସେମାନଙ୍କ ପାଇଁ କେବଳ କଲିଂ ପ୍ଲାନ ହିଁ ସବୁଠାରୁ ଉପଯୋଗୀ। ଏହା ବ୍ୟତୀତ ଅନେକ ଲୋକ ବ୍ୟାଙ୍କ ଓଟିପି (OTP) କିମ୍ୱା ଇନକମିଙ୍ଗ କଲ ପାଇଁ ଦ୍ୱିତୀୟ ସିମ ଚାଲୁ ରଖିଥାନ୍ତି। ଏହି ନୂଆ ନିୟମ ଦ୍ୱାରା ଏଭଳି ଉପଭୋକ୍ତା ଏବଂ ଗ୍ରାମାଞ୍ଚଳର ପରିବାରଗୁଡ଼ିକ ବିଶେଷ ଭାବେ ଉପକୃତ ହେବେ।
