ତିରୁଭାନନ୍ତପୁରମ,୨୭।୯: ୱେଷ୍ଟଇଣ୍ଡିଜ ବିପକ୍ଷ ପ୍ରଥମ ODIରେ ଭାରତ ୮ ୱିକେଟ୍ରେ ବିଜୟୀ ହୋଇଛି । ତିରୁଭାନନ୍ତପୁରମର ଗ୍ରୀନ୍ଫିଲ୍ଡ ଇଣ୍ଟରନ୍ୟାସନାଲ ଷ୍ଟାଡିୟମ୍ରେ ଖେଳାଯାଇଥିବା ମ୍ୟାଚ୍ରେ ୱେଷ୍ଟଇଣ୍ଡିଜ ଭାରତ ସମ୍ମୁଖରେ ୨୯୬ ରନ୍ର ଟାର୍ଗେଟ୍ ରଖିଥିଲା। ଭାରତ ୮ ୱିକେଟ୍ ବାକି ଥାଇ ବାଜି ମାରିନେଇଛି । ଏହି ବିଜୟ ସହ ୩ ମ୍ୟାଚ୍ର ସିରିଜ୍ରେ ଭାରତ ୧-୦ରେ ଆଗୁଆ ହୋଇଛି । ଭାରତର ବିଜୟର ମୁଖ୍ୟ ନାୟକ ଥିଲେ ବିରାଟ କୋହଲି । ସେ ଅପରାଜିତ ୧୩୯ ରନ୍ର ଚମତ୍କାର ଇନିଂସ ଖେଳି ଦଳକୁ ବିଜୟୀ କରାଇଥିଲେ । ଅଧିନାୟକ ଶୁଭମନ ଗିଲ୍ ମଧ୍ୟ ଶତକ ମାରିଥିଲେ।
ୱେଷ୍ଟଇଣ୍ଡିଜ ବିପକ୍ଷରେ ଏହି ଶତକୀୟ ଇନିଂସ ସମୟରେ ବିରାଟ କୋହଲି ଏକାଧିକ ରେକର୍ଡ ନିଜ ନାଁରେ କରିଛନ୍ତି । ୫୯ ରନ୍ କରିବା ସମୟରେ ସେ ODI କ୍ୟାରିୟରରେ ୧୫ ହଜାର ରନ୍ ପୂରଣ କରିଛନ୍ତି । ୧୫ ହଜାର ODI ରନ୍ କରିବାରେ ସେ ସଚିନ ତେନ୍ଦୁଲକରଙ୍କ ପରେ ବିଶ୍ୱର ଦ୍ୱିତୀୟ ବ୍ୟାଟର୍ ହୋଇଛନ୍ତି। ଏହା ସହ ଗୋଟିଏ ଦେଶରେ ସବୁଠାରୁ ଅଧିକ ODI ରନ୍ କରିବାର ରେକର୍ଡ ମଧ୍ୟ କୋହଲି ନିଜ ନାଁରେ କରିଛନ୍ତି। ପ୍ରଥମେ ବ୍ୟାଟିଂ କରିଥିବା ୱେଷ୍ଟଇଣ୍ଡିଜର ଓପନର୍ ଜନ୍ କ୍ୟାମ୍ପବେଲ୍ ଓ ଜଷ୍ଟିନ୍ ଗ୍ରୀଭ୍ସ ଭଲ ପ୍ରଦର୍ଶନ କରିଥିଲେ ।
କ୍ୟାମ୍ପବେଲ୍ ୬୦ ବଲ୍ରେ ୬୨ ରନ୍ କରିଥିବା ବେଳେ ଗ୍ରୀଭ୍ସ ୧୦୮ ବଲ୍ରେ ୧୦୧ ରନ୍ କରିଥିଲେ। ଏହା ଗ୍ରୀଭ୍ସଙ୍କ କ୍ୟାରିୟରର ପ୍ରଥମ ODI ଶତକ । ତାଙ୍କ ଇନିଂସରେ ୧୨ଟି ଚୌକା ସାମିଲ ଥିଲା। ଉଭୟ ଓପନର୍ଙ୍କୁ କୁଲଦୀପ ଯାଦବ ଆଉଟ୍ କରିଥିଲେ। ପରେ କିସି କାର୍ଟି ୧୩ ଓ ଅଧିନାୟକ ଶାଇ ହୋପ୍ ୧୨ ରନ୍ରେ ଆଉଟ୍ ହୋଇଥିଲେ। ଶେଷ ଆଡ଼କୁ ଅମୀର ଜାଙ୍ଗୁ ଗୁରୁତ୍ୱପୂର୍ଣ୍ଣ ଅର୍ଦ୍ଧଶତକ ହାସଲ କରି ୱେଷ୍ଟଇଣ୍ଡିଜର ସ୍କୋରକୁ ୩୦୦ ରନ୍ର ନିକଟତର କରିଥିଲେ। ସେ ୪୩ ବଲ୍ରେ ୭ ଚୌକା ଓ ୧ ଛକା ସହ ଅପରାଜିତ ୫୮ ରନ୍ କରିଥିଲେ।
ଭାରତ ପକ୍ଷରୁ କୁଲଦୀପ ଯାଦବ ସବୁଠାରୁ ସଫଳ ବୋଲର୍ ଥିଲେ। ସେ ୧୦ ଓଭରରେ ୪୦ ରନ୍ ଦେଇ ୪ଟି ୱିକେଟ୍ ନେଇଥିଲେ। ପ୍ରସିଦ୍ଧ କୃଷ୍ଣା ୧୦ ଓଭରରେ ୬୨ ରନ୍ ଦେଇ ୨ଟି ୱିକେଟ୍ ହାସଲ କରିଥିଲେ। ନୀତୀଶ କୁମାର ରେଡ୍ଡୀ ୫ ଓଭରରେ ୪୫ ରନ୍ ଦେଇ ଗୋଟିଏ ୱିକେଟ୍ ନେଇଥିଲେ।
