ବଳ ବୟସ ଥିବାବେଳେ ଜଣେ ଅର୍ଥ ସଞ୍ଚୟ କରେ ବାର୍ଦ୍ଧକ୍ୟରେ ତାହା କାମରେ ଆସିବ ବୋଲି। ହେଲେ ଅନେକ ବ୍ୟକ୍ତି ପରିଣତ ବୟସରେ ସେମାନଙ୍କ ସଞ୍ଚିତ କିମ୍ବା ପ୍ରାପ୍ତ ଟଙ୍କାକୁ ସମାଜର କଲ୍ୟାଣ ପାଇଁ ଦାନ କରିଦେଉଛନ୍ତି। ସେମାନଙ୍କ ମଧ୍ୟରୁ ଆସାମର ଏକ ଦମ୍ପତି ଅନ୍ୟତମ। ପାନ୍ନାଲାଲ ଓ ତାଙ୍କ ସ୍ତ୍ରୀ ନନ୍ଦିତା ଭଟ୍ଟାଚାର୍ଯ୍ୟ ଗୋସ୍ବାମୀ ୧ କୋଟି ଟଙ୍କା ପ୍ରାଚୀନ ବେଦବେଦାନ୍ତ ଗବେଷଣା କରିବା ଲାଗି ଦେଇଛନ୍ତି। ଟଙ୍କା ଦାନ କରିବା ସମୟରେ କୌଣସି ବଡ଼ ଉତ୍ସବ ଆୟୋଜନ ନ କରି ସେମାନେ କଲେଜ କର୍ତ୍ତୃପକ୍ଷଙ୍କୁ ହାତରେ ଚେକ୍ ଦେଇ ଆସିଥିଲେ। ଗୁଆହାଟୀର କଟନ ବିଶ୍ୱବିଦ୍ୟାଳୟରେ ୪ ଦଶନ୍ଧି ଧରି ପାନ୍ନାଲାଲ ରସାୟନ ବିଜ୍ଞାନ ଏବଂ ନନ୍ଦିତା ସଂସ୍କୃତ ପଢ଼ାଉଥିଲେ। ସେମାନେ ଅବସର ନେବା ପରେ ପାଇଥିବା ୧ କୋଟି ଟଙ୍କାକୁ ବ୍ୟକ୍ତିଗତ କାମରେ ନ ଲଗାଇ ତାହାକୁ ନଳବାରିର କୁମାର ଭାସ୍କର ବର୍ମା ସାଂସ୍କ୍ରିଟ ଆଣ୍ଡ ଆନ୍ସିଏଣ୍ଟ ଷ୍ଟଡିଜ ବିଶ୍ୱବିଦ୍ୟାଳୟକୁ ଦାନ କରିଦେଇଛନ୍ତି। ବ୍ୟକ୍ତିଗତ ଭାବେ କୌଣସି ଶିକ୍ଷକ ପୂର୍ବରୁ କେବେ ବି ସରକାରୀ ବିଶ୍ୱବିଦ୍ୟାଳୟକୁ ଏତେ ଅଧିକ ରାଶି ଦାନ କରି ନ ଥିଲେ। ନନ୍ଦିତା କହନ୍ତି, ଲୋକଙ୍କ ଟଙ୍କା ସେମାନଙ୍କ କାର୍ଯ୍ୟରେ ଲାଗିଲେ ଭଲ।
