ବଅଁରପାଳ,୨୯।୬(ଡି.ଏନ.ଏ.) – ଗ୍ରାମାଞ୍ଚଳ ଅର୍ଥନୀତି ସୁଦୃଢ଼ୀକରଣରେ ପ୍ରାଣୀ ସମ୍ପଦର ଭୂମିକା ଗୁରୁତ୍ୱପୂର୍ଣ୍ଣ। ଏହି କାରଣରୁ ଅଧିକରୁ ଅଧିକ ପ୍ରାଣୀଧନ ପାଳନ ପାଇଁ ସରକାରଙ୍କ ପକ୍ଷରୁ ଚାଷୀଙ୍କୁ ଉତ୍ସାହିତ କରାଯାଉଛି। ବ୍ୟାଙ୍କ ମାଧ୍ୟମରେ ସବ୍ସିଡଯୁକ୍ତ ଋଣ ଯୋଗାଇ ଦିଆଯାଉଛି। ତେବେ ପ୍ରାଣୀ ସମ୍ପଦର ବିକାଶ ଦିଗରେ ଯେତିକି ଦୃଷ୍ଟି ଦିଆଯାଉଛି, ଚିକିତ୍ସା କ୍ଷେତ୍ରକୁ ସେତିକି ଗୁରୁତ୍ୱ ମିଳୁନାହିଁ। ଅନୁଗୋଳ ଜିଲାର ବଅଁରପାଳ ବ୍ଲକ ଏହାର ଏକ ଉଦାହରଣ। ଏହି ବ୍ଲକରେ ୫୦ ହଜାରରୁ ଅଧିକ ପ୍ରାଣୀଧନ ରହିଥିଲେ ବି ଆବଶ୍ୟକସ୍ଥଳେ ଉପଯୁକ୍ତ ଚିକିତ୍ସା ସେବା ମିଳିପାରୁ ନାହିଁ। ପ୍ରାଣୀଧନ ନିରୀକ୍ଷକଙ୍କଠାରୁ ପିଅନଙ୍କ ଯାଏ ଅଧାରୁ ଅଧିକ ପଦବୀ ଖାଲି ପଡ଼ିଥିବାରୁ ଚିକିତ୍ସା କେନ୍ଦ୍ରରୁ ଚାଷୀମାନଙ୍କୁ ନିରାଶ ହୋଇ ଫେରିବାକୁ ପଡ଼ୁଛି। ପ୍ରାଣୀଧନଙ୍କ ଚିକିତ୍ସା ପ୍ରତି ପ୍ରଶାସନର ଏପରି ଉପେକ୍ଷାକୁ ନେଇ ଚାଷୀ ମହଲରେ ଅସନ୍ତୋଷ ସୃଷ୍ଟି ହୋଇଛି।
ବଅଁରପାଳ ବ୍ଲକରେ ଗୋଟିଏ ଗୋଷ୍ଠୀ ପ୍ରାଣୀ ଚିକିତ୍ସା କେନ୍ଦ୍ର, ଗୋଟିଏ ପ୍ରାଣୀ ଚିକିତ୍ସା କେନ୍ଦ୍ର ଓ ୧୩ଟି ପ୍ରାଣୀଧନ ଚିକିତ୍ସା କେନ୍ଦ୍ର ରହିଛି। ଏହି କେନ୍ଦ୍ରଗୁଡ଼ିକରେ ୪ ପ୍ରାଣୀ ଚିକିତ୍ସକ, ୧୩ ପ୍ରାଣୀଧନ ନିରୀକ୍ଷକ ଓ ୧୩ ପିଅନକୁ ମିଶାଇ ମୋଟ୍ ପଦବୀ ସଂଖ୍ୟା ହେଉଛି ୩୦। ହେଲେ ବଅଁରପାଳ ଗୋଷ୍ଠୀ ପ୍ରାଣୀ ଚିକିତ୍ସା କେନ୍ଦ୍ରରେ ପ୍ରାଣୀ ଚିକିତ୍ସା ଅଧିକାରୀ ଓ ମୋବାଇଲ ଭେଟେରାନ ଅଫିସର ପଦବୀ ଖାଲି ପଡ଼ିଛି। ମହୀଧରପୁର ଓ କୁଲାଡ଼ ପ୍ରାଣୀଧନ ଚିକିତ୍ସା କେନ୍ଦ୍ରରେ ପ୍ରାଣୀଧନ ନିରୀକ୍ଷକ ଓ ପିଅନ ପଦବୀ ପୂରଣ ହେଉନାହିଁ। ଗୋତମରା, ବଳରାମପ୍ରସାଦ, ସନ୍ତ୍ରୀ, କଲଣ୍ଡାପାଳ, ତଳମୂଳ, କୁରୁଡୁଲୁ, ଜରାସିଂହା, ବିମଳବେଡ଼ା, ବଡ଼କେରଜାଙ୍ଗ, ମରାତିରା ଆଦି କେନ୍ଦ୍ରରେ ପିଅନ ନାହାନ୍ତି। ମୋଟ୍ ପଦବୀ ମଧ୍ୟରୁ ୨ ପ୍ରାଣୀଧନ ନିରୀକ୍ଷକ, ୨ ପ୍ରାଣୀ ଚିକିତ୍ସା ଅଧିକାରୀ ଓ ୧୨ ପିଅନ ପଦବୀ ଖାଲି ରହିଥିବାରୁ ଚିକିତ୍ସା କ୍ଷେତ୍ରରେ ଏହା ବଡ଼ ବାଧକ ସାଜୁଛି। କିନ୍ତୁ ଏତେ ସଂଖ୍ୟକ କର୍ମଚାରୀ ଅଭାବ ରହିଥିଲେ ମଧ୍ୟ ପ୍ରଶାସନ ଏଥିପ୍ରତି ଦୃଷ୍ଟି ଦେଉ ନ ଥିବା ଚାଷୀମାନେ ଅଭିଯୋଗ କରିଛନ୍ତି। ସେମାନେ କହିଛନ୍ତି, ବ୍ଲକ ଅଞ୍ଚଳରେ ୫୦ ହଜାରରୁ ଊର୍ଦ୍ଧ୍ୱ ପ୍ରାଣୀଧନ ରହିଛନ୍ତି। କେବଳ ଗୋରୁଙ୍କ ସଂଖ୍ୟା ୩୦ ହଜାର ଅଧିକ ହୋଇଥିବାବେଳେ ୮ ହଜାର ଛେଳି ମେଣ୍ଢା ଓ ୧ ହଜାର ମଇଁଷି ରହିଛନ୍ତି। କିନ୍ତୁ ଏମାନଙ୍କୁ ଉପଯୁକ୍ତ ଚିକିତ୍ସା ଯୋଗାଇ ଦେବାରେ ଘୋର ଅବହେଳା କରାଯାଉଛି। ବର୍ତ୍ତମାନ ବର୍ଷା ଆସିଯାଇଥିବାରୁ ପ୍ରାଣୀଧନଙ୍କ ଠାରେ ବିଭିନ୍ନ ସଂକ୍ରାମକ ରୋଗ ଦେଖାଦେବା ଆରମ୍ଭ ହୋଇଛି। ତେଣୁ ଟିକାକରଣଠାରୁ ଆରମ୍ଭ କରି ଚିକିତ୍ସା ଯାଏ ଜରୁରୀ ହୋଇପଡ଼ିଛି। ହେଲେ ଚିକିତ୍ସକଙ୍କ ସହ ଅନେକ କେନ୍ଦ୍ରରେ ଭିତ୍ତିଭୂମିର ଅଭାବ ରହିଛି। ତେଣୁ ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଖାଲି ପଡ଼ିଥିବା ପଦବୀରେ ନିଯୁକ୍ତି ଓ ଜରୁରୀ ଉପକରଣ ଯୋଗାଣ ଦେବାକୁ ଚାଷୀମାନେ ଦାବି କରିଛନ୍ତି।
