ଅନୁଗୋଳ ଅଫିସ, ୫ା୧୨:ସରକାରୀ ସ୍ବାସ୍ଥ୍ୟକେନ୍ଦ୍ରରେ ମିଳିବ ନିଃଶୁଳ୍କ ସେବା। ଉତ୍ତମ ଚିକିତ୍ସା ପାଇ ଉପକୃତ ହେବେ ଗରିବ ରୋଗୀ। ସ୍ବାସ୍ଥ୍ୟ ବିଭାଗ ପକ୍ଷରୁ ଏ ନେଇ ବ୍ୟାପକ ପ୍ରଚାର ପ୍ରସାର କରାଯାଉଛି। ସରକାରୀ ଯୋଜନାର ଲାଭ ନେବା ପାଇଁ ସଚେତନ କରାଯାଉଛି। ହେଲେ ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟରେ ଏହାର ବ୍ୟତିକ୍ରମ ପରିଲକ୍ଷିତ ହେଉଛି। ଡାକ୍ତର, କର୍ମଚାରୀଙ୍କ ସହିତ ଆବଶ୍ୟକ ଯନ୍ତ୍ରାଂଶର ଅଭାବ ଏଠାରେ ରୋଗୀ ସେବାକୁ ବିପର୍ଯ୍ୟସ୍ତ କରିଦେଇଛି। ବିଶେଷକରି ଅଲ୍ଟ୍ରାସାଉଣ୍ଡ ପାଇଁ ଦୈନିକ ୫୦ରୁ ଅଧିକ ଗର୍ଭବତୀ ଓ ରୋଗୀ ପ୍ରତୀକ୍ଷା କରୁଥିଲେ ମଧ୍ୟ ଅର୍ଦ୍ଧେକଙ୍କୁ ବିନା ପରୀକ୍ଷାରେ ଫେରିବାକୁ ପଡ଼ୁଛି। ଗୋଟିଏ ମେଶିନକୁ ଜଣେ ବିଶେଷଜ୍ଞ ଥିବାରୁ ଏହା ପର୍ଯ୍ୟାପ୍ତ ହୋଇପାରୁ ନାହିଁ। ଫଳରେ ଅନେକ ରୋଗୀ ଏହି ନିଃଶୁଳ୍କ ସେବାର ସୁଯୋଗ ନ ପାଇ ନିରାଶ ହେଉଥିବା ବେଳେ ଘରୋଇ କ୍ଲିନିକ, ନିର୍ସିଂହୋମ ଓ ପାଥୋଲୋଜିକୁ ଯାଇ ଆର୍ଥିକ ଶୋଷଣର ଶିକାର ହେଉଥିବା ଅଭିଯୋଗ ହେଉଛି।
ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟକୁ ଦୈନିକ ୪ଶହରୁ ଅଧିକ ରୋଗୀ ଆସୁଛନ୍ତି। ଅନୁଗୋଳ ସହିତ ପଡ଼ୋଶୀ ଢେଙ୍କାନାଳ, ଦେବଗଡ଼, ସମ୍ବଲପୁର ଓ ବୌଦ୍ଧ ଜିଲାର ସୀମାନ୍ତ ଅଞ୍ଚଳରୁ ଆସୁଥିବା ଏହି ରୋଗୀମାନଙ୍କ ମଧ୍ୟରୁ ଅନେକଙ୍କ ଅଲ୍ଟ୍ରାସାଉଣ୍ଡ ଆବଶ୍ୟକ ପଡ଼ୁଛି। ଏମ୍ଆର୍ଆଇ, ସିଟି ସ୍କାନ୍ ସହ ଏହି ଅଲ୍ଟ୍ରାସାଉଣ୍ଡ ବ୍ୟବସ୍ଥା ଜିଲା ମୁଖ୍ୟ ଚିକିତ୍ସାଳୟରେ ବିନା ମୂଲ୍ୟରେ ମିଳୁଥିବାରୁ ଦୈନିକ ଭିଡ଼ ହେଉଛି। ଏହାଛଡ଼ା ବେସରକାରୀ ଡାକ୍ତରଙ୍କ ନିକଟରେ ଚିକିତ୍ସିତ ବହୁ ରୋଗୀ ମଧ୍ୟ ନିଃଶୁଳ୍କ ସେବାର ସୁବିଧା ନେବାକୁ ଜିଲାର ଏହି ମୁଖ୍ୟ ସରକାରୀ ସ୍ବାସ୍ଥ୍ୟକେନ୍ଦ୍ରକୁ ଆସୁଛନ୍ତି। ହେଲେ ସେମାନଙ୍କ ମଧ୍ୟରୁ ୨୫ରୁ ଊର୍ଦ୍ଧ୍ୱଙ୍କୁ ହତାଶରେ ଫେରିବାକୁ ପଡ଼ୁଛି। କାରଣ ମୁଖ୍ୟ ଚିକିତ୍ସାଳୟରେ ମାତ୍ର ଗୋଟିଏ ଅଲ୍ଟ୍ରାସାଉଣ୍ଡ ମେଶିନ ରହିଛି। ପ୍ରସୂତି ବିଭାଗରେ ୪ ଜଣ ଡାକ୍ତର ଥିଲେ ବି ଜଣେ ମହିଳା ଡାକ୍ତର ଅଲ୍ଟ୍ରାସାଉଣ୍ଡ ମେଶିନ ଚଳାଇବାର ତାଲିମ୍ ନେଇଛନ୍ତି। ଫଳରେ ପଞ୍ଜୀକୃତ ରୋଗୀଙ୍କ ମଧ୍ୟରୁ ମାତ୍ର ୧୫ରୁ ୨୦ ଜଣ ଗର୍ଭବତୀ ଓ ଅନ୍ୟ ରୋଗୀଙ୍କ ଅଲ୍ଟ୍ରାସାଉଣ୍ଡ ହୋଇପାରୁଛି। ନିୟମ ଅନୁଯାୟୀ କେବଳ ସୋନୋଲୋଜିଷ୍ଟମାନେ ହିଁ ଅଲଟ୍ରାସାଉଣ୍ଡ ମେଶିନ ଚଳାଇ ପାରିବେ। ସ୍ତ୍ରୀ ଓ ପ୍ରସୂତି ବିଭାଗର ବିଶେଷଜ୍ଞ ଡାକ୍ତରଙ୍କୁ ମଧ୍ୟ ଏହି ମେଶିନ୍ ଚଳାଇବା ପାଇଁ ୬ ମାସିଆ ତାଲିମ ଦିଆଯାଇଥାଏ। ମାତ୍ର ଏଠାରେ ଥିବା ୪ ଜଣ ଡାକ୍ତରଙ୍କ ମଧ୍ୟରୁ ୩ ଜଣ ତାଲିମ ନେଇନାହାନ୍ତି। ସେମାନଙ୍କୁ ତାଲିମ୍ ଦେବା ଉପରେ ମେଡିକାଲ କର୍ତ୍ତୃପକ୍ଷ ମଧ୍ୟ ଗୁରୁତ୍ୱ ଦେଉନାହାନ୍ତି। ଫଳରେ ଅଲ୍ଟ୍ରାସାଉଣ୍ଡ କରି ନ ପାରି ଫେରୁଥିବା ଗରିବ ରୋଗୀମାନେ ଘରୋଇ ନର୍ସିଂହୋମ୍ ଓ ଡାଇଗ୍ନୋଷ୍ଟିକ୍ ସେଣ୍ଟରକୁ ଯାଇ ୮ଶହରୁ ୯ଶହ ଟଙ୍କା ଦେଇ ଆର୍ଥିକ ଶୋଷଣର ଶିକାର ହେଉଥିବା ଦେଖାଯାଉଛି। ଜିଲା ଖଣିଜ ପାଣ୍ଠିରେ ପର୍ଯ୍ୟାପ୍ତ ଟଙ୍କା ରହିଛି। ସ୍ବାସ୍ଥ୍ୟସେବାର ବିକାଶ ପାଇଁ ଡିଏମ୍ଏଫ୍ ଟଙ୍କା ଖର୍ଚ୍ଚ କରିବାକୁ ଜିଲା ପ୍ରଶାସନ ସର୍ବଦା ପ୍ରସ୍ତୁତ ଅଛି। ମାତ୍ର ଅଲ୍ଟ୍ରାସାଉଣ୍ଡ ସେବାକୁ ବ୍ୟାପକ କରିବାକୁ ସ୍ବାସ୍ଥ୍ୟ ବିଭାଗ ଆନ୍ତରିକତା ଦେଖାଉ ନ ଥିବା ଅଭିଯୋଗ ହୋଇଛି। ଡିଏମ୍ଏଫ୍ରୁ ଅଧିକ ଆଡଭାନ୍ସ ଅଲ୍ଟ୍ରାସାଉଣ୍ଡ ମେଶିନ ସହିତ ସୋନୋଲୋଜିଷ୍ଟଙ୍କୁ ନିଯୁକ୍ତି ଦିଆଗଲେ ଅଧିକ ରୋଗୀ ଉପକୃତ ହୋଇପାନ୍ତେ ବୋଲି ବୁଦ୍ଧିଜୀବୀମାନେ ମତପ୍ରକାଶ କରିଛନ୍ତି।
