ପୁରୀ,୩୧ା୧୨(ଅଜିତ୍ କୁମାର ମହାନ୍ତି): ମହାପ୍ରସାଦ ଓ ମହାପ୍ରଭୁଙ୍କୁ ଅପମାନ କଲାଭଳି ଦୃଶ୍ୟ ପୁଣି ଦେଖିବାକୁ ମିଳିଛି। ଏନେଇ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି। କେତେଜଣ ଭକ୍ତ ମହାପ୍ରସାଦକୁ ଠିଆ ହୋଇ ଓ ଗାଡ଼ିରେ ବସି ଖାଉଥିବା ପରିଲକ୍ଷିତ ହୋଇଛି। ଗତ ଦୁଇଦିନରେ ଏଭଳି ଦୁଇଟି ଦୃଶ୍ୟ ଦେଖିବାକୁ ମିଳିଲାଣି। ତେଣୁ ଶ୍ରୀମନ୍ଦିର ପ୍ରଶାସନ ପକ୍ଷରୁ ଭକ୍ତଙ୍କୁ ସଚେତନ କରାଯିବାକୁ ବିଭିନ୍ନ ମହଲରେ ମତ ପ୍ରକାଶ ପାଇଛି। ମଙ୍ଗଳବାର ଅପରାହ୍ନରେ କେତେଜଣ ଇସ୍କନ ଭକ୍ତ ନାୟକ ପ୍ଲାଜା ନିକଟରେ ଚପଲ ପିନ୍ଧି ମହାପ୍ରସାଦ ବିତରଣ କରୁଥିବା ଦେଖିବାକୁ ମିଳିଥିଲା। ଏନେଇ ସମ୍ପୃକ୍ତ ଇସ୍କନ ଭକ୍ତଙ୍କୁ ପଚାରିବାରୁ ସେ କହିଥିଲେ, ନିଜ ପାଇଁ ମହାପ୍ରସାଦ ଆଣିଥିଲୁ ମାତ୍ର ଅଧିକ ହୋଇଯିବାରୁ ଭକ୍ତଙ୍କ ମଧ୍ୟରେ ବାଣ୍ଟୁଛୁ। ଅପରପକ୍ଷରେ ବୁଧବାର ଏହିପରି ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ସେଥିରେ ଦେଖିବାକୁ ମିଳିଛି ଯେ, ମହିଳା ଏବଂ ପୁରୁଷ ଭକ୍ତଙ୍କ ସହ ଛୋଟ ପିଲା ଗାଡ଼ିରେ ଓ ଠିଆ ହୋଇ ମହାପ୍ରସାଦ ସେବନ କରୁଛନ୍ତି। ତାଙ୍କୁ ସେବାୟତ ଓ ଶ୍ରଦ୍ଧାଳୁ ବାରଣ କରିବା ସତ୍ତ୍ୱେ ସେ ଶୁଣି ନ ଥିଲେ। ପରେ ଅନ୍ୟ କେତେଜଣ ଲୋକ ବିରୋଧ କରିବାରୁ ସେମାନେ ତଳକୁ ଆସି ବସି ମହାପ୍ରସାଦ ସେବନ କରିବେ ବୋଲି କହିଥିଲେ। ଏଭଳି ଘଟଣାକୁ ସାଧାରଣରେ ନିନ୍ଦା କରାଯାଇଛି।
