ଭୁବନେଶ୍ୱର,୩୦।୮(ବ୍ୟୁରୋ) : ପରିବେଶ ପ୍ରଦୂଷଣ, ଜଳବାୟୁ ପରିବର୍ତ୍ତନ, ଉତ୍ତାପ ବୃଦ୍ଧି, ଅତିବୃଷ୍ଟି, ଅନାବୃଷ୍ଟି ଆଦି ସମ୍ପର୍କରେ ଜନସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ଆସନ୍ତା ଡିସେମ୍ବର ୧ରୁ ଦୁଇଦିନିଆ ସବୁଜ ସମାରୋହ ଅନୁଷ୍ଠିତ ହେବ। ପ୍ରେରଣା ଗ୍ରୀନ୍ ଆର୍ମି ପକ୍ଷରୁ ଆୟୋଜିତ ହେବାକୁ ଥିବା ଏହି ସମାରୋହ ଭୁବନେଶ୍ୱରସ୍ଥିତ ପ୍ରଦର୍ଶନୀ ପଡ଼ିଆଠାରେ କରାଯିବ। ଦେଶ ବିଦେଶର ପରିବେଶ ବିଜ୍ଞାନୀ, ବୃକ୍ଷପ୍ରେମୀମାନେ ଏଥିରେ ଯୋଗଦେବେ। ପରିବେଶ ସୁରକ୍ଷା ଓ ସାଧାରଣ ଜନତା, ସୁସ୍ଥ ପରିବେଶ ସୁସ୍ଥ ଜୀବନ, ପରିବେଶ ପ୍ରଦୂଷଣ ଓ ବ୍ୟାପକ ବୃକ୍ଷରୋପଣ, ପରିବେଶ ଓ ସାହିତ୍ୟ, ସଂସ୍କୃତି ଓ ପରିବେଶ ଆଦି ଉପରେ ଏହି ଅବସରରେ ବିଶ୍ୱସ୍ତରୀୟ ଆଲୋଚନାଚକ୍ରମାନ ଅନୁଷ୍ଠିତ ହେବ। ସମାବେଶରେ ବିଶ୍ୱର ୫୦ ଟି ଦେଶର ପ୍ରତିନିଧିଙ୍କ ସମେତ ଓଡ଼ିଶା ଓ ଭାରତରୁ ବୁଦ୍ଧିଜୀବୀ, ସାରସ୍ବତ ସାଧକ, ଚିତ୍ରଶିଳ୍ପୀ, କଣ୍ଠଶିଳ୍ପୀ, ନୃତ୍ୟଶିଳ୍ପୀ, ପରିବେଶବିତ୍, ଶିକ୍ଷାବିତ୍, ସାମ୍ବାଦିକ, ଆଇନଜୀବୀ, ଛାତ୍ରୀଛାତ୍ର ଏବଂ ଯୁବପିଢି ଯୋଗ ଦେବେ। ଏ ନେଇ ଏକ ଖବରଦାତା ସମ୍ମିଳନୀରେ ପ୍ରେରଣା ଗ୍ରୀନ୍ ଆର୍ମିର ଚିଫ୍ କମାଣ୍ଡର୍ ଡ. ଦିଲୀପ ଶ୍ରୀଚନ୍ଦନ କହିଛନ୍ତି। ଓଡ଼ିଶାର ପ୍ରତ୍ୟେକ ବ୍ଲକ, ବିଜ୍ଞାପିତ ଅଞ୍ଚଳ ପରିଷଦ, ପୌରପରିଷଦ, ମହାନଗର ନିଗମରେ ବୃକ୍ଷରୋପଣ, ପରିବେଶ ସୁରକ୍ଷା ପାଇଁ ବୃକ୍ଷପ୍ରେମୀମାନଙ୍କୁ ଗ୍ରୀନ୍ ଆର୍ମିରେ ନିଯୁକ୍ତି ପ୍ରଦାନ କରାଯିବ ବୋଲି ଶ୍ରୀଚନ୍ଦନ କହିଛନ୍ତି। ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଓଡ଼ିଶା ବୀର ମହାସଂଘର ସଭାପତି ଡ. ପ୍ରକାଶ ଶ୍ରୀଚନ୍ଦନ, ପ୍ରଫେସର ଡ. ଅଜୟ ସ୍ବାଇଁ ଓ ପକ୍ଷୀଘର ପ୍ରକାଶନୀର ମୁଖ୍ୟ ବନୋଜ ତ୍ରିପାଠୀ ପ୍ରମୁଖ ଉପସ୍ଥିତ ଥିଲେ।
