ଭଞ୍ଜନଗର,୭।୪(ବାବୁଲା ପ୍ରଧାନ): ଗଞ୍ଜାମ ଜିଲା ବେଲଗୁଣ୍ଠା ଥାନା ଅନ୍ତର୍ଗତ ସରନୂଆଁପଲ୍ଲୀ ଗ୍ରାମରେ ସୋମବାର ରାତିରେ ଏକ ଅଭାବନୀୟ ଘଟଣା ଘଟିଛି। ପ୍ରେମ ବିବାହ କରିଥିବା ସ୍ତ୍ରୀଙ୍କୁ ହତ୍ୟା ପରେ ଶେଷରେ ସ୍ବାମୀ ମଧ୍ୟ ବେକରେ ରଶି ଲଗାଇ
ଆତ୍ମହତ୍ୟା କରିଛନ୍ତି। ମୃତ ୨ଜଣ ହେଲେ ସ୍ବାମୀ ଚିତ୍ରସେନ ନାଇକ ଓ ସ୍ତ୍ରୀ ପୂଜା ନାୟକ। ଘଟଣାରୁ ପ୍ରକାଶ ଯେ, ଚିତ୍ରସେନ ପ୍ରାୟ ୭ ବର୍ଷ ପୂର୍ବେ ତାଙ୍କରି ଗ୍ରାମ ନିକଟରେ ଅନ୍ୟ ଏକ ଜାତିର ଝିଅ ପୂଜାଙ୍କୁ ପ୍ରେମ ବିବାହ କରିଥିଲେ। ଏହାପରେ ଉଭୟ କିଛିବର୍ଷ ହସଖୁସିରେ ରହିଥିଲେ। ଏହି ସମୟରେ ସେମାନଙ୍କର ଦୁଇଟି ସନ୍ତାନ ଜନ୍ମ ହୋଇଥିଲା। ପରିବାର ଭଲରେ ଚଲୁଥିବା ବେଳେ ହଠାତ୍ ପୂଜାଙ୍କ କିଛି ଗତିବିଧିକୁ ନେଇ ଚିତ୍ରସେନ ସନ୍ଦେହ କରିବା ସହ ଦ୍ୱନ୍ଦରେ ଥିଲେ। ଏହାପରେ ଧୀରେ ଧୀରେ ସନ୍ଦେହ ବଢ଼ିବାରୁ ସ୍ବାମୀ ସ୍ତ୍ରୀଙ୍କ ସଂପର୍କରେ ଫାଟ ସୃଷ୍ଟି ହୋଇଥିଲା। ତେଣୁ ପୂଜା ଦୁଇ ଛୁଆଙ୍କୁ ଧରି ଆଜକୁ କିଛିମାସ ହେବ ଭୁବନେଶ୍ୱରରେ ତାଙ୍କର ଜଣେ ସମ୍ପର୍କୀୟ ଘରେ ରହୁଥିଲେ। ଦୁଇଦିନ ପୂର୍ବେ ପୂଜା ଗ୍ରାମକୁ ଆସିଥିଲେ। ଦୁଇ ଛୁଆ ଭୁବନେଶ୍ବରରେ ଥିଲେ।
ଗତକାଲି ରାତିରେ ପୂଜା ଓ ଚିତ୍ରସେନ ମଧ୍ୟରେ କୌଣସି କଥାକୁ ନେଇ ଝଗଡ଼ା ହୋଇଥିଲା। ଏହାପରେ ଏକ ପନିକି ସହାୟତାରେ ଚିତ୍ରସେନ ସ୍ତ୍ରୀ ପୂଜାଙ୍କୁ ହତ୍ୟା କରିଥିଲେ। ଏହାପରେ ପରେ ଚିତ୍ରସେନ ଲୋକ ଲଜ୍ୟା ଭୟରେ ଘର ନିକଟ ଏକ ଗଛରେ ବେକରେ ରଶି ଲଗାଇ ଆତ୍ମହତ୍ୟା କରିଥିଲେ। ଏହି ଘଟଣା ମଙ୍ଗଳବାର ଜଣାପଡିବା ପରେ ବେଲଗୁଣ୍ଠା ଓ ଭଞ୍ଜନଗର ଅଞ୍ଚଳରେ ତାହା ଚର୍ଚ୍ଚାର ବିଷୟ ହୋଇଛି। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ଭଞ୍ଜନଗର ହସ୍ପିଟାଲକୁ ପଠାଇଛି। ଏନେଇ ପୋଲିସ ଏକ ମାମଲା ରୁଜୁ କରି ଘଟଣାର ଅଧିକ ତଦନ୍ତ ଚଳାଇଛି।
