ନୂଆଦିଲ୍ଲୀ,୧୮ା୮: ଗୁରୁତର ଆର୍ଥିକ ସଙ୍କଟ ମଧ୍ୟରେ ଗତି କରୁଥିବା ପାକିସ୍ତାନକୁ ଆଉ ଏକ ବଡ଼ ଝଟକା ଲାଗିଛି। ଆମେରିକା ପାକିସ୍ତାନକୁ ଯୋଗାଉଥିବା ଆର୍ଥିକ ସହାୟତାକୁ ୪୪୦ ନିୟୁତ ଡଲାର ହ୍ରାସ କରିଛି। ପାକିସ୍ତାନ ବର୍ଦ୍ଧିତ ସହଭାଗିତା ରାଜିନାମା (ପିଇପିଏ),୨୦୧୦ ଅନୁଯାୟୀ ଆମେରିକା ଇସ୍ଲାମାବାଦ୍କୁ ଏହି ସହାୟତା ଯୋଗାଇଆସୁଛି। ପାକ୍ ପ୍ରଧାନମନ୍ତ୍ରୀ ଇମ୍ରାନ୍ ଖାନଙ୍କ ଓ୍ବାଶିଂଟନ ଗସ୍ତର ତିନି ସପ୍ତାହ ପୂର୍ବରୁ ଆମେରିକା ସହାୟତା ହ୍ରାସ ସମ୍ପର୍କରେ ଜଣାଇଦେଇଥିଲା। ପୂର୍ବରୁ ଏହି ସହାୟତା ପରିମାଣ ୪.୫ ବିଲିୟନ ଡଲାର ଥିଲା। ୪୪୦ ନିୟୁତ ଡଲାର କମାଇବା ଫଳରେ ତାହା ୪.୧ ବିଲିୟନ ଡଲାରକୁ ହ୍ରାସ ପାଇଛି। ଇସ୍ଲାମାବାଦ ଆତଙ୍କବାଦ ଦମନ କ୍ଷେତ୍ରରେ ବିଫଳ ହୋଇଥିବାରୁ ଆମେରିକା ଦେବାକୁ ଥିବା ୩୩୦ ନିୟୁତ ଡଲାର ପ୍ରତିରକ୍ଷା ସହାୟତାକୁ ଗତବର୍ଷ ସେପ୍ଟେମ୍ବରରେ ବାତିଲ କରିଦେଇଥିଲା। ହକାନି ଆତଙ୍କବାଦୀ ନେଟଓ୍ବର୍କକୁ ଦମନ କରିବାରେ ବିଫଳ ପାକିସ୍ତାନକୁ ଗତବର୍ଷ ଜାନୁୟାରୀରେ ପେଣ୍ଟାଗନ ୧ ବିଲିୟନ ଡଲାର ଆର୍ଥତ୍କ ସହାୟତା ହ୍ରାସ କରିଥିଲା। ଆତଙ୍କବାଦ ପ୍ରତି ଇସ୍ଲାମାବାଦର କୋହଳ ମନୋଭାବ ଯୋଗୁ ୧.୩ ବିଲିୟନ ଡଲାର ସହାୟତା ବାତିଲ କରାଯାଇଥିବା ଗତ ମାସରେ ଇମ୍ରାନ ଖାନ୍ଙ୍କ ସହ ଆଲୋଚନା ବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଜଣାଇଥିଲେ।
