ବ୍ରହ୍ମପୁର,୬ା୧୦(ସୁବାସ ଚନ୍ଦ୍ର ପାଢ଼ୀ): ସ୍ତ୍ରୀଙ୍କ ତଣ୍ଟି ଚିପି ହତ୍ୟା କରିଥିବା ଅଭିଯୋଗରେ ବଡବଜାର ଥାନା ପୋଲିସ ଅଭିଯୁକ୍ତ ସ୍ବାମୀଙ୍କୁ ଗିରଫ କରିଛି। ସେ ହେଲେ ଧାନମେରା ସାହିର ନରଶିମା ନାୟକ ଓରଫ ଭିମା (୩୦)। ଶୁକ୍ରବାର ତାଙ୍କୁ କୋର୍ଟ ଚାଲାଣ କରାଯାଇଛି।
ଗତ ଅଗଷ୍ଟ ମାସରେ ଭୁବନେଶ୍ୱରୀ ମୁଖୀଙ୍କୁ ନରଶିମା ଅପହରଣ କରି କାଳୁଆ ମନ୍ଦିରରେ ବିବାହ କରିଥିଲେ। ପରେ ସେ ଯୌତୁକ ଦାବିକରି ଭୁବନେଶ୍ୱରୀଙ୍କୁ ମାନସିକ ଓ ଶାରୀରିକ ନିର୍ଯାତନା ଦେଇଆସୁଥିଲେ। ଭୁବନେଶ୍ୱରୀଙ୍କ ବାପଘର ଆର୍ଥିକ ସ୍ଥିତି ଭଲ ନ ଥିବାରୁ ସେ ଯୌତୁକ ବାବଦ ଟଙ୍କା ଆଣି ପାରୁ ନ ଥିଲେ। ତେଣୁ ସ୍ବାମୀ, ଶାଶୁ ଓ ନଣନ୍ଦ ମିଶି ନିର୍ଯାତନା ଦେଉଥିଲେ। ଗତ ୩ତାରିଖ ଅପରାହ୍ନରେ ଭୁବନେଶ୍ୱରୀ ରଶି ଲଗାଇ ଆତ୍ମହତ୍ୟା କରିଥିବା ନରଶିମା ତାଙ୍କ ଶ୍ୱଶୁର ଲିଙ୍ଗରାଜ ମୁଖୀଙ୍କୁ ଖବର ଦେଇଥିଲେ। ଲିଙ୍ଗରାଜ ପହଞ୍ଚି ଝିଅ ଘର ଭିତରେ ଝୁଲୁଥିବା ଅବସ୍ଥାରେ ଥିବା ଦେଖିଥିଲେ। ଖବରପାଇ ସେଠାରେ ପୋଲିସ ପହଞ୍ଚିଥିଲା। ଝିଅକୁ ଶାଶୁଘର ଲୋକେ ତଣ୍ଟି ଚିପି ହତ୍ୟା କରିଛନ୍ତି ବୋଲି ବାପା ଅଭିଯୋଗ କରିଥିଲେ। ପୋଲିସ ୩୭୫/୨୩ରେ ଯୌତୁକଜନିତ ହତ୍ୟା ମାମଲା ରୁଜୁ କରିଥିଲା। ମୃତଦେହ ଜବତ କରିବା ସହ ମାଜିଷ୍ଟ୍ରେଟଙ୍କ ଉପସ୍ଥିତିରେ ପଞ୍ଚନାମା କରିଥିଲା। ପରେ ସାଇଣ୍ଟିଫିକ ଟିମ ସହାୟତାରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି।
