ତେହେରାନ,୫।୪: ଇରାନ ସହିତ ଚାଲିଥିବା ସଂଘର୍ଷରେ ଆମେରିକୀୟ ସେନା ପ୍ରବଳ କ୍ଷତି ସହୁଛି । ରବିବାର ଦିନ, ଇରାନର ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ (IRGC) ଇସଫାହାନ ପରମାଣୁ କେନ୍ଦ୍ର ନିକଟରେ ଆଉ ଏକ ଆମେରିକୀୟ ବିମାନକୁ ଟାର୍ଗେଟ କରି ଖସାଇ ଦେଇଛି । ୩୬ ଘଣ୍ଟା ମଧ୍ୟରେ ଆମେରିକାକୁ ଆଉ ଏକ ଝଟକା କହିଲେ ଅତ୍ୟୁକ୍ତି ହେବ ନାହିଁ । ପୂର୍ବରୁ ଇରାନ ଏକ ଆମେରିକୀୟ F-35, ଦୁଇଟି F-15, ଗୋଟିଏ F-16 ଏବଂ ଗୋଟିଏ A-10 ବିମାନକୁ ଖସାଇ ଦେଇଥିବା ନେଇ ଦାବି କରିଛି । ହେଲେ ଦୁଇ ଜଣ ଆମେରିକୀୟ ପାଇଲଟ୍ ଖସି ପଳାଇଥିଲେ । ଏହି ପାଇଲଟମାନଙ୍କ ମଧ୍ୟରୁ ଜଣେ ନିଖୋଜ ଥିଲେ କିନ୍ତୁ ଆଜି ଆମେରିକା ଦ୍ୱାରା ତାଙ୍କୁ ଠାବ କରାଯାଇଥିଲା, ଯେତେବେଳେ ଅନ୍ୟ ଜଣଙ୍କୁ ଆକ୍ରମଣ ଦିନ ହିଁ ଉଦ୍ଧାର କରାଯାଇଥିଲା। ଏବେ ଇରାନ ଆମେରିକାକୁ ଆଉ ଏକ ବଡ଼ ଝଟକା ଦେଇଛି ।
ଇରାନର ଇସଲାମିକ୍ ରିପବ୍ଲିକ୍ ନ୍ୟୁଜ୍ ଏଜେନ୍ସି (IRNA) ଅନୁଯାୟୀ, ରବିବାର ଦିନ ଆମେରିକା ଏବଂ ଇସ୍ରାଏଲ ଇସଫାହାନ୍ ପରମାଣୁ କେନ୍ଦ୍ର ଉପରେ ଆକ୍ରମଣ କରିଥିଲେ । ଏହି ସମୟରେ, ଇସଲାମିକ୍ ରିପବ୍ଲିକ୍ ଅଫ୍ ଇରାନ୍ (FARAJA) ର ଆଇନ ପ୍ରବର୍ତ୍ତନ କମାଣ୍ଡର ସୂଚନା କେନ୍ଦ୍ର ପକ୍ଷରୁ ଏକ ବିବୃତ୍ତିରେ କୁହାଯାଇଛି “କିଛି ସମୟ ପୂର୍ବରୁ, ପୋଲିସ ସ୍ୱତନ୍ତ୍ର ବାହିନୀର ପ୍ରବଳ ଗୁଳିମାଡ଼ରେ ଦକ୍ଷିଣ ଇସଫାହାନରେ ଏକ ଆମେରିକୀୟ C-130 ବିମାନକୁ ଉଡାଇ ଦିଆଯାଇଛି ।” ଏହି ଘଟଣାର କିଛି ସମୟ ପୂର୍ବରୁ, IRGC ମଧ୍ୟ ସେହି ଅଞ୍ଚଳରେ ଏକ ଆମେରିକୀୟ MQ-9 ଡ୍ରୋନ୍ ଖସାଇ ଦେଇଥିବା ଦାବି କରିଥିଲା।
ଆଣ୍ଟୋନାଲ୍ ଆଟମିକ୍ ଏନର୍ଜି ଏଜେନ୍ସି (IAEA) ଦ୍ୱାରା ପରମାଣୁ ପ୍ରତିଷ୍ଠାନ ଉପରେ ଆକ୍ରମଣ ନକରିବା ପାଇଁ କରାଯାଇଥିବା ଆହ୍ବାନକୁ ବେଖାତିର କରି, ଆମେରିକା ଏବଂ ଇସ୍ରାଏଲ ରବିବାର ପଞ୍ଚମ ଥର ପାଇଁ ଇରାନର ଇସଫାହାନ ପରମାଣୁ କେନ୍ଦ୍ରକୁ ଟାର୍ଗେଟ କରିଥିଲେ। ଇସଫାହାନ ଉପରେ ଚତୁର୍ଥ ଇସ୍ରାଏଲୀ-ଆମେରିକୀୟ ଆକ୍ରମଣ ପରେ, ଇରାନର ବୈଦେଶିକ ମନ୍ତ୍ରୀ ଆବାସ ଆରାକଚି ମଧ୍ୟପ୍ରାଚ୍ୟ ଅଞ୍ଚଳରେ ରେଡିଓଆକ୍ଟିଭ୍ ବିକିରଣର ସମ୍ଭାବ୍ୟ ପ୍ରସାର ସମ୍ପର୍କରେ ଆଶଙ୍କା ପ୍ରକାଶ କରି ଚେତାବନୀ ଦେଇଥିଲେ ଯେ ଏପରି ଘଟଣା ସାଉଦି ଆରବ, ୟୁଏଇ, ବାହାରିନ୍, ଓମାନ ଏବଂ କାତାର ଭଳି ପଡ଼ୋଶୀ ଦେଶଗୁଡ଼ିକରେ ଜୀବନର ବିନାଶ ଆଣିପାରେ। ଏହି ଚେତାବନୀ ସତ୍ତ୍ୱେ, ଆମେରିକା ଏବଂ ଇସ୍ରାଏଲ ଇରାନର ଇସଫାହାନ ପ୍ରତିଷ୍ଠାନ ଉପରେ ଆକ୍ରମଣ କରିବାକୁ ଆଗେଇ ଆସିଲେ ।
