ଖଇରା, ୭।୮(ଡି.ଏନ.ଏ.)-ବାଲେଶ୍ୱର ଜିଲା ଖଇରା ବ୍ଲକ ଅଧୀନ ରଟିଣା ସବ୍ମାଇନର କେନାଲରେ ରାସ୍ତା ନିର୍ମାଣ ଓ ନାଳ ଖୋଳା କାର୍ଯ୍ୟକୁ ଚାଷୀ ଓ ଗ୍ରାମବାସୀ ବିରୋଧ କରି ମଙ୍ଗଳବାର କାର୍ଯ୍ୟ ବନ୍ଦ କରିଛନ୍ତି ା ବର୍ଷା ସମୟରେ ଏଭଳି ନିର୍ମାଣ କାର୍ଯ୍ୟ କରି ଅର୍ଥ ହଡପ ଉଦ୍ୟମ ହୋଇଥିବା ଚାଷୀମାନେ ଦର୍ଶାଇଥିଲେ। ଠିକାଦାର ଚଳାଇଥିବା ନିର୍ମାଣ କାର୍ଯ୍ୟକୁ ସ୍ଥାନୀୟ ରଟିଣା ଓ ବଗଦିଆ ଗ୍ରାମର ଚାଷୀ ବନ୍ଦ କରି ବିଦ୍ୟାଧରପୁର ଡିଭିଜନର ନିର୍ବାହୀଯନ୍ତ୍ରୀ ଆର୍ତ୍ତତ୍ରାଣ ସାହୁଙ୍କୁ ଏ ସମ୍ପର୍କରେ ଜଣାଇଥିଲେ। ଘଟଣାସ୍ଥଳରେ ଚାପା ଉତ୍ତେଜନା ପ୍ରକାଶ ପାଇଥିଲା। ଏଭଳି ସ୍ଥିତିରେ ବର୍ତ୍ତମାନ କାମ ବନ୍ଦ ରହିବ ଏବଂ ବର୍ଷାଋତୁ ପରେ କରାଯିବ ବୋଲି ବିଭାଗୀୟ କର୍ତ୍ତୃପକ୍ଷ ପ୍ରତିଶ୍ରୁତି ଦେବାରୁ ପରିସ୍ଥିତି ଶାନ୍ତ ପଡିଥିଲା।
ସ୍ଥାନୀୟ ଚାଷୀ ଓ ଗ୍ରାମବାସୀ ଦର୍ଶାଇଛନ୍ତି ଯେ, ରଟିଣା ସବ୍ମାଇନର କେନାଲ ପାର୍ଶ୍ୱରେ ଦେଢ କି.ମି. ରାସ୍ତାକୁ କଂକ୍ରିଟ କରିବା ଏବଂ କେନାଲ କଡ ନାଳ ପରିଷ୍କାର କରିବାକୁ ପୂର୍ବରୁ ୫୦ଲକ୍ଷ ଟଙ୍କା ମଞ୍ଜୁର ହୋଇଥିଲା। ଗ୍ରୀଷ୍ମଋତୁରେ ଏହି କାମ ବେପରୁଆ ଢଙ୍ଗରେ ଆରମ୍ଭ କରି ଅଧାରୁ ଛାଡି ଦିଆଯାଇଥିଲା। ବର୍ଷାଋତୁ ପୂର୍ବରୁ କାମ ଶେଷ କରିବାକୁ ଅଞ୍ଚଳବାସୀ ଦାବି କରିଥିଲେ ମଧ୍ୟ କେହି ଶୁଣି ନ ଥିଲେ। ଏବେ ବର୍ଷାଦିନ ଆରମ୍ଭ ହେବା ପରେ ତରବରିଆ ଭାବେ ବାକି କଂକ୍ରିଟ କାମ କରାଯିବା ସହ କେନାଲ ଓ ଚାଷଜମି ମଧ୍ୟରେ ଥିବା ନୟନଯୋରି ଖୋଳିବା କାର୍ଯ୍ୟ ଆରମ୍ଭ ହୋଇଥିଲା। ଏଭଳି କାର୍ଯ୍ୟ ପଛରେ ଅସଦ୍ ଉପାୟ ଅବଲମ୍ବନର ଫନ୍ଦି ରହିଥିବା ଗ୍ରାମବାସୀ ସନ୍ଦେହ କରିଥିଲେ। ଅନ୍ୟପକ୍ଷେ ନିର୍ମାଣ କାର୍ଯ୍ୟ ଚାଲିଥିବାରୁ ଭାର ଓ ଗୃହପାଳିତ ପ୍ରାଣୀଙ୍କୁ ନେଇ ନାଳ ଭିତର ଦେଇ ଜମିକୁ ଯିବା ଚାଷୀଙ୍କ ପକ୍ଷେ କାଠିକର ପାଠ ହୋଇ ପଡିଥିଲା ା ଅଣ୍ଟାଏ ପାଣିରେ ପଶି ଜମିକୁ ଯିବା ସମ୍ଭବ ନ ହେବାରୁ ସ୍ଥାନୀୟ ଅଞ୍ଚଳର ଚାଷୀ ଜମିକୁ ଯିବା ପାଇଁ ଗୋଟିଏ କି ଦୁଇଟି ସ୍ଥାନରେ ସୋଠ ପକାଇ ଏହାକୁ ଯାତାୟାତ ଉପଯୋଗୀ କରିବାକୁ ଦାବି କରିଥିଲେ। ଏଭଳି ଦାବିକୁ କେହି କାନକୁ ନ ନେବାରୁ ଚାଷୀମାନେ କ୍ଷୁବ୍ଧ ହୋଇ ପଡିଥିଲେ। ଏହି ପରିପ୍ରେକ୍ଷୀରେ ମଙ୍ଗଳବାର ରଟିଣା ଗ୍ରାମର ଶଙ୍କର୍ଷଣ ବାରିକ, ପକାଠିଆ ବାରିକ, ବାଇଧର ସାହୁ, କମଳ ସାହୁ ବଗଦିଆ ଗ୍ରାମର ରବୀନ୍ଦ୍ର କୁମାର ପଣ୍ଡା, ରନତ୍ାକର ପଣ୍ଡା, ସୁରେନ୍ଦ୍ର କୁମାର ପଣ୍ଡା, ସୁଦର୍ଶନ ପଣ୍ଡା, ଗୋବିନ୍ଦ ବାରିକ, ଲକ୍ଷ୍ମୀଧର ବାରିକ, ବାବୁଲି ଦାସ, ଶମ୍ଭୁନାଥ ନାୟକ, ଉମାକାନ୍ତ ଦାସ ପ୍ରମୁଖ ଆସି ପ୍ରତିବାଦ କରିଥିଲେ ା ସୋଠ ପଡି ଜମିକୁ ରାସ୍ତା ନ ହେବା ପର୍ଯ୍ୟନ୍ତ ନାଳ ଖୋଳା କାର୍ଯ୍ୟ ସେମାନେ କରାଇ ନ ଦେବାକୁ ଚେତାବନୀ ଦେଇଥିଲେ ା ଏ ସମ୍ପର୍କରେ ଆନ୍ଦୋଳନକାରୀ ଚାଷୀ ନିର୍ବାହୀ ଯନ୍ତ୍ରୀଙ୍କୁ ଯୋଗାଯୋଗ କରିବା ପରେ ବର୍ଷା ସମୟରେ ସୋଠ ପକାଇବା ସମ୍ଭବ ନୁହେଁ, ଏଣୁ ବର୍ଷାଋତୁ ପରେ ଯାହାକିଛି କରାଯିବ ବୋଲି କହି ସେଠାରେ କାର୍ଯ୍ୟ ବନ୍ଦ ରଖିବାକୁ ଠିକାଦାରଙ୍କୁ ନିର୍ଦ୍ଦେଶ ଦେଇଥିଲେ।
