ଭୁବନେଶ୍ୱର,୨୮ା୫(ବ୍ୟୁରୋ): ଓଡିଶା ସମେତ ବହୁ ରାଜ୍ୟରେ ଲୁଟ୍ପାଟ୍ କରି ଆତଙ୍କ ଖେଳାଉଥିବା ଉତ୍ତରପ୍ରଦେଶର ବାୱରିଆ ଗ୍ୟାଙ୍ଗ ସମ୍ପର୍କରେ ତଦନ୍ତ ଚଳାଇଛି କମିଶନରେଟ ପୋଲିସ। ଏହି ଗ୍ୟାଙ୍ଗ୍ର ନେଟ୍ଓ୍ବର୍କ କେଉଁଆଡେ ଲମ୍ବିଛି, ଏଥିରେ କେତେଜଣ ସଦସ୍ୟ ରହିଛନ୍ତି ଓ ଏଯାଏ କେତେସବୁ ଅପରାଧ ଘଟାଇଛନ୍ତି, ଏଭଳି ଅନେକ ତଥ୍ୟ ହାସଲ କରିବାକୁ ପୋଲିସ ଉଦ୍ୟମ ଚଳାଇଛି। ଏନେଇ ନିକଟରେ ଗିରଫ ହୋଇ ଜେଲ୍ରେ ଥିବା ୪ ଅଭିଯୁକ୍ତଙ୍କୁ ରିମାଣ୍ଡରେ ଆଣି ମାରାଥନ ଜେରା କରିବାକୁ ଯୋଜନା ଚାଲିଛି। ମିଳିଥିବା ସୂଚନାନୁସାରେ, ଗ୍ୟାଙ୍ଗ୍ର ରହସ୍ୟ ଉନ୍ମୋଚନ ପାଇଁ କମିଶନରେଟ ପୋଲିସ ଅଭିଯୁକ୍ତଙ୍କୁ ୫ ଦିନିଆ ରିମାଣ୍ଡରେ ଆଣିବାକୁ ସୋମବାର କୋର୍ଟରେ ଆବେଦନ କରିବ। ଏହାସହ ରାଜ୍ୟ ବାହାରକୁ ଯିବା ପାଇଁ ୨ଟି ଟିମ୍ ଗଠନ କରାଯାଇଛି। ୟୁପି ଓ ଦିଲ୍ଲୀରେ ଯାଞ୍ଚ କରିବ ସ୍ପେଶାଲ ଟିମ୍। ଅପରପକ୍ଷେ କମିଶନରେଟ ପୋଲିସ ଝାରପଡା ଜେଲକୁ ଯାଇ ଅଭିଯୁକ୍ତଙ୍କର ଟିଆଇ ପରେଡ କରିଥିଲା। ଟିଆଇ ପରେଡରେ ୪ ଅଭିଯୁକ୍ତଙ୍କ ମଧ୍ୟରୁ ଜଣଙ୍କୁ ଚିହ୍ନଟ କରିଛନ୍ତି ଲୁଟ୍ର ଶିକାର ହୋଇଥିବା ମହିଳା।
ଉଲ୍ଲେଖଯୋଗ୍ୟ, ରାଜ୍ୟର ବିଭିନ୍ନ ଜିଲାରେ ଲୁଟ୍ପାଟ କରି ଆତଙ୍କ ଖେଳାଉଥିବା ବାୱରିୟା ଗ୍ୟାଙ୍ଗକୁ ଧରିବାକୁ କମିଶନରେଟ ପୋଲିସ ଜାଲ ବିଛାଇଥିବାବେଳେ ପୁରୀରୁ ୪ଜଣଙ୍କୁ ଧରିବାରେ ସଫଳ ହୋଇଥିଲା। ସେମାନେ ହେଲେ ଉତ୍ତରପ୍ରଦେଶ ସାମ୍ଲି ଜିଲା ଝିଂଝାଣା ଥାନା ଅଞ୍ଚଳର ପ୍ରଦୀପ କୁମାର, ବିକାଶ, ରବି କୁମାର ଓ ବାବୁ ରାମ୍। ସେମାନଙ୍କଠାରୁ ୧୬ଟି ସୁନାଚେନ୍, ୨ଟି ବାଇକ, ୨ଟି ମୋବାଇଲ, ଅନ୍ୟାନ୍ୟ କାଗଜପତ୍ର ଜବତ କରିଥିଲା ପୋଲିସ।
