ନୂଆପଡ଼ା ଅଫିସ,୧୪।୫: ନୂଆପଡ଼ା ଜିଲା କୋମନା ବ୍ଲକ ଅଧୀନ ସୁନାବେଡା ଅଭୟାରଣ୍ୟସ୍ଥିତ ଜାମଗାଁ ସିଆର୍ପିଏଫ୍ କ୍ୟାମ୍ପ ନିକଟରେ ମା’ ଓ ଛୁଆ ବାଘ ବୁଲିଛନ୍ତି। ସିଆରପିଏଫ କ୍ୟାମ୍ପରେ ଲାଗିଥିବା କ୍ୟାମେରାରେ ଏହିସବୁ ଦୃଶ୍ୟ କଏଦ ହେବା ସହ ସ୍ଥାନୀୟ ଲୋକେ ମୋବାଇଲ ଫୋନରେ ବାଘର ଫଟୋ ଉଠାଇଥିବା ଥିବା କହିଛନ୍ତି।
ମିଳିଥିବା ସୂଚନା ମୁତାବକ, ଗତ ୨ଦିନ ତଳେ ଛତିଶଗଡ଼ ସିତାନଦୀ ଅଭୟାରଣ୍ୟ ଅଞ୍ଚଳରୁ ଏକ ମହାବଳ ବାଘ ଛୁଆକୁ ଧରି ଖାଦ୍ୟ ଅନ୍ବେଷଣରେ ସୁନାବେଡା ଅଭୟାରଣ୍ୟ ଭିତରକୁ ଚାଲି ଆସିଥିବା ଲୋକେ ଦେଖିବାକୁ ପାଇଥିଲେ। ଶନିବାର ସନ୍ଧ୍ୟାରେ ସୁନାବେଡା ଅଭୟାରଣ୍ୟ ଜାମଗାଁ ସିଆରପିଏଫ କ୍ୟାମ୍ପ ନିକଟରେ ମହାବଳ ବାଘ ଛୁଆ ସହ ବୁଲୁଥିବା ଲୋକେ ଦେଖିଛନ୍ତି। ଏପରିକି ବାଘ ବୁଲୁଥିବା ଦୃଶ୍ୟ ମୋବାଇଲ କ୍ୟାମରାରେ ରେକର୍ଡ କରିଛନ୍ତି। ତେବେ ସିଆରପିଏଫ କ୍ୟାମ୍ପ ନିକଟରେ ଲାଗିଥିବା କ୍ୟାମେରାରେ ବାଘର ସ୍ପଷ୍ଟ ଚିତ୍ର ଆସୁ ନ ଥିଲେ ମଧ୍ୟ ମୋବାଇଲ କ୍ୟାମେରାରେ ସ୍ପଷ୍ଟ ଜଣାପଡୁଥିବା ଜାମଗାଁ ସିଆର୍ପିଏଫ କ୍ୟାମ୍ପର ଯବାନମାନେ ପ୍ରକାଶ କରିଛନ୍ତି।
ବର୍ତ୍ତମାନ ସୁନାବେଡା ଅଭୟାରଣ୍ୟବାସୀ ବାଘ ଭୟରେ ଆତଙ୍କିତ ହୋଇପଡିଛନ୍ତି। ଅଭୟାରଣ୍ୟ ଭିତରେ ସର୍ଭିଲାନ୍ସ କ୍ୟାମେରା ଲଗାଯାଇ ବାଘର ଗତିବିଧି ଉପରେ ବନ ବିଭାଗ ପକ୍ଷରୁ କଡା ନଜର ରଖାଯାଇଛି। ବାଘର ସୁରକ୍ଷା ଅଭୟାରଣ୍ୟବାସୀଙ୍କ ନୈତିକ କର୍ତ୍ତବ୍ୟ। ବାଘ ଅଭୟାରଣ୍ୟ ଖଡାଙ୍ଗ ଦେଇ ଜାମଗାଁ ଅଞ୍ଚଳରେ ବୁଲୁଥିବା ସୁନାବେଡା ବନ୍ୟପ୍ରାଣୀ ରେଞ୍ଜର ଶିବ ପ୍ରସାଦ ଖମାରୀ ସୂଚନା ଦେଇଛନ୍ତି।
