ବେଜିଂ,୧୨।୪ : ଏଚ-୩-ଏନ-୮ ବାର୍ଡ ଫ୍ଲୁ ଯୋଗୁ ପ୍ରଥମ ମୃତ୍ୟୁ ପୃଥିବୀରେ ରେକର୍ଡ କରାଯାଇଛି। ଏନେଇ ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲୁଏଚଓ) କହିଛି ଯେ, ଚାଇନାର ଜଣେ ମହିଳାଙ୍କର ବାର୍ଡ ଫ୍ଲୁରେ ମୃତ୍ୟୁ ଘଟିଛି। କିନ୍ତୁ ଏହି ଷ୍ଟ୍ରେନ ଲୋକମାନଙ୍କ ମଧ୍ୟରେ ବ୍ୟାପିଥିବା ପରି ମନେ ହେଉନାହିଁ। ମଙ୍ଗଳବାର ବିଳମ୍ବିତ ରାତିରେ ଡବ୍ଲୁଏଚଓ ଏକ ବିବୃତ୍ତିରେ କହିଛି, ଦକ୍ଷିଣ ଗୁଆଙ୍ଗଡୋଙ୍ଗର ୫୬ ବର୍ଷ ବୟସ୍କା ମହିଳା ହେଉଛନ୍ତି ତୃତୀୟ ବ୍ୟକ୍ତି ଯିଏକି ଏଭିଏନ ଫ୍ଲୁର ଏଚ-୩-ଏନ-୮ ସବ୍-ଭାରିଆଣ୍ଟରେ ସଂକ୍ରମିତ ହୋଇଥିଲେ।
ରୋଗ ନିୟନ୍ତ୍ରଣ ଏବଂ ପ୍ରତିରୋଧ ପାଇଁ ଗୁଆଙ୍ଗଡୋଙ୍ଗ ପ୍ରାଦେଶିକ କେନ୍ଦ୍ର ଗତ ମାସ ଶେଷରେ ତୃତୀୟ ସଂକ୍ରମଣ ବିଷୟରେ ଜଣାଇଥିଲା, କିନ୍ତୁ ମହିଳାଙ୍କ ମୃତ୍ୟୁ ସମ୍ପର୍କରେ ସୂଚନା ଦେଇ ନ ଥିଲା। ଡବ୍ଲୁଏଚଓ କହିଛି, ଆକ୍ରାନ୍ତଙ୍କର ଏକାଧିକ ଅନ୍ତର୍ନିହିତ ଅବସ୍ଥାରେ ପୀଡିତ ଏବଂ ଜୀବନ୍ତ କୁକୁଡ଼ା ସଂସ୍ପର୍ଶରେ ଆସିବାର ଇତିହାସ ରହିଛି।
ଚାଇନାରେ ବାର୍ଡ ଫ୍ଲୁ ଏକ ସାଧାରଣ କଥା। ସାଧାରଣ ଲୋକଙ୍କ ମଧ୍ୟରେ ସଂକ୍ରମଣ ହୋଇଥିବାରୁ ବହୁ ସଂଖ୍ୟାରେ କୁକୁଡ଼ା ଏବଂ ବଣୁଆ ପକ୍ଷୀଙ୍କ ମଧ୍ୟରେ ବାର୍ଡ ଫ୍ଲୁ ଭୂତାଣୁ ସଂକ୍ରମିତ ହେବାରେ ଲାଗିଛି।
ଡବ୍ଲୁଏଚଓ କହିଛି , ମହିଳା ଅସୁସ୍ଥ ହେବା ପୂର୍ବରୁ ମାଂସ, ମାଛ ବଜାରକୁ ଯାଇଥିଲେ। ଯଦିଓ ଏଚ-୩-ଏନ-୮ ମଣିଷମାନଙ୍କଠାରେ ବିରଳ, ଏହା ପକ୍ଷୀମାନଙ୍କଠାରେ ସାଧାରଣ। ଏହା ଅନ୍ୟ ସ୍ତନ୍ୟପାୟୀ ପ୍ରାଣୀମାନଙ୍କୁ ମଧ୍ୟ ସଂକ୍ରମିତ କରିଛି।
ଡବ୍ଲୁଏଚଓ କହିଛି, ସଂକ୍ରମିତ ମହିଳାଙ୍କ ସହ ଘନିଷ୍ଠ ସମ୍ପର୍କରେ ଥିବା ଅନ୍ୟ କାହାଠାରେ କୌଣସି ମାମଲା ମିଳିନାହିଁ। ଡବ୍ଲୁଏଚଓ ଏକ ବିବୃତ୍ତିରେ କହିଛି, ଉପଲବ୍ଧ ସୂଚନାକୁ ଆଧାର କରି ଏହା ଜଣାପଡୁଛି ଏହି ଭୂତାଣୁର ମଣିଷଙ୍କଠାରୁ ସହଜରେ ବିସ୍ତାର କରିବାର କ୍ଷମତା ନାହିଁ ।
