ସୁନ୍ଦରଗଡ଼,୧ା୪(ଡି.ଏନ.ଏ.): ଗୁରୁବାର ଥିଲା ପବିତ୍ର ରାମନବମୀ । ଏହି ଉପଲକ୍ଷେ ସହର ଠାରୁ ଗ୍ରାମାଞ୍ଚଳ ହୋଇ ଉଠିଥିଲା ଉତ୍ସବମୁଖର । ବିଭିନ୍ନ ରାମମନ୍ଦିର, ହନୁମାନ ମନ୍ଦିର ଓ ଘରେ ଘରେ ପୂଜା ପାର୍ବଣର ମାହୋଲ ା କିନ୍ତୁ ଏସବୁକୁ ପଛ କରି ସୁନ୍ଦରଗଡ ଇବ୍ନଦୀ ସ୍ବର୍ଗଦ୍ବାର ଶ୍ମଶାନରେ ଜଣେ ଅପରିଚିତ ମୃତକଙ୍କ ଅନ୍ତିମ ସଂସ୍କାର ପାଇଁ ଟିମ୍ ଶ୍ମଶାନ ବନ୍ଧୁର ସଦସ୍ୟମାନେ ଆଗେଇ ଆସିଥିବା ଦେଖିବାକୁ ମିଳିଥିଲା। ଏହାକୁ ମିଶାଇ ଲଗାତାର ୩୧ ମାସ ଭିତରେ ୮୦୦ ମୃତକଙ୍କ ଅନ୍ତିମସଂସ୍କାର କରି ରେକର୍ଡ ସ୍ଥାପନ କରିଛି ସୁନ୍ଦରଗଡର ଟିମ୍ ଶ୍ମଶାନ ବନ୍ଧୁ। ଟିମ୍ ଶ୍ମଶାନ ବନ୍ଧୁର ମନୋବଳ ବଢାଇବା ଓ ଉତ୍ସାହିତ କରିବାକୁ ସ୍ବର୍ଗଦ୍ବାର ଶ୍ମଶାନଘାଟକୁ ଜିଲା ପରିଷଦ ଅଧ୍ୟକ୍ଷା କୁନ୍ତି ପ୍ରଧାନ, ଅତିରିକ୍ତ ଜିଲାପାଳ ଅଭିମନ୍ୟୁ ବେହେରା, ଉପଖଣ୍ଡ ପୋଲିସ ଅଧିକାରୀ ହିମାଂଶୁ ଶେଖର ବେହେରାଙ୍କ ସମେତ ଟାଉନ ଥାନା ଅଧିକାରୀ ସୁଶାନ୍ତ ପରିଡା ଉପସ୍ଥିତ ରହି ମୃତକଙ୍କୁ ସମ୍ମାନ ପ୍ରଦର୍ଶନ କରିବା ସହିତ ଟିମ୍ ଶ୍ମଶାନ ବନ୍ଧୁଙ୍କ ଏତାଦୃଶ କାର୍ଯ୍ୟକୁ ପ୍ରଶଂସା କରିଥିଲେ। ଏହି ଟିମ୍ କୋଭିଡର ତିନୋଟି ଯାକ ଲହରରେ ମୋଟ ୪୩୫ ଜଣ କୋଭିଡ ସଂକ୍ରମିତ ମୃତକଙ୍କ ନିଃଶୁଳ୍କ ଶବସଂସ୍କାର କରିଥିବା ଜଣାଯାଇଛି ା ଏଥିସହିତ ଜିଲାର ବିଭିନ୍ନ ବୃଦ୍ଧାଶ୍ରମରେ ରହି ଆସୁଥିବା ଅନ୍ତେବାସୀଙ୍କ ସହିତ ଆସ୍ଥାଗୃହରେ ରହୁଥିବା ମାନସିକ ଅନଗ୍ରସର ମହିଳାମାନଙ୍କର ପରଲୋକ ଘଟିଲେ ତଥା ପୋଲିସ ଜବତ କରୁଥିବା ଅପରିଚିତ ମୃତ ବ୍ୟକ୍ତି, ଜିଆରପି ଟ୍ରେନ ଲାଇନରୁ ଉଦ୍ଧାର କରୁଥିବା ମୃତକ କିମ୍ବା ହସ୍ପିଟାଲରେ କେହି ଛାଡି ଚାଲି ଯାଇଥିବା ଅସହାୟ ମୃତବ୍ୟକ୍ତିମାନଙ୍କର ସମ୍ମାନର ସହିତ ଶେଷକୃତ୍ୟ କାର୍ଯ୍ୟ ଟିମ୍ ଶ୍ମଶାନ ବନ୍ଧୁ ବର୍ଷ ବର୍ଷ ଧରି କରି ଆସୁଛନ୍ତି। ଟିମ୍ ଶ୍ମଶାନ ବନ୍ଧୁ ରାଜଗାଙ୍ଗପୁର ରେଲବାଇ ପୋଲିସ ଦ୍ବାରା ଗତ ୫ ଦିନ ପୂର୍ବରୁ କାଂଶବାହାଲ ରାଜଗାଙ୍ଗପୁର ରେଳ ଲାଇନ ପାର୍ଶ୍ୱରୁ ଉଦ୍ଧାର କରାଯାଇଥିବା ଜଣେ ୭୦ ବର୍ଷୀୟ ବୃଦ୍ଧଙ୍କର ଗୁରୁବାର ଶେଷକୃତ୍ୟ ସମ୍ପନ୍ନ କରିଛନ୍ତି। ଏହି ବ୍ୟକ୍ତିଙ୍କର କେହି ଦାବିଦାର ନ ଆସିବାରୁ ନିୟମ ଅନୁଯାୟୀ ମୃତଦେହ ବ୍ୟବଚ୍ଛେଦ ପରେ ୯୬ ଘଣ୍ଟା ସଂରକ୍ଷିତ ରଖାଯାଇଥିଲା। ପରେ ସ୍ବେଚ୍ଛାସେବୀ ଅନୁଷ୍ଠାନ ଟିମ୍ ଶ୍ମଶାନ ବନ୍ଧୁଙ୍କୁ ଶବସଂସ୍କାର କରିବା ସକାଶେ ରେଳବାଇ ପୋଲିସ ପକ୍ଷରୁ ଅନୁରୋଧ କରାଯାଇଥିଲା ା ସଦସ୍ୟମାନେ ମହାପ୍ରୟାଣ ଗାଡି ଯୋଗେ ସୁନ୍ଦରଗଡ ସ୍ବର୍ଗଦ୍ବାରକୁ ଆଣି ଶେଷକୃତ ସମ୍ପନ୍ନ କରିଥିଲେ।
