ବଲାଙ୍ଗୀର ଅଫିସ, ୩୧ା୧: ଗତ ୨୬ ତାରିଖରେ ସ୍ବତନ୍ତ୍ର ଗ୍ରାମସଭା ବର୍ଜନ କରିବା ପରେ ସୋମବାର ପୁଣି ଥରେ ବଲାଙ୍ଗୀର ଜିଲାର ୩୧୭ ସରପଞ୍ଚ ଆବାସ ଯୋଜନା ପାଇଁ ଆୟୋଜିତ ହେବାକୁ ଥିବା ଗ୍ରାମସଭା ବର୍ଜନ କରିଛନ୍ତି। ଫଳରେ ପ୍ରଧାନମନ୍ତ୍ରୀ ଆବାସ ଯୋଜନା ତାଲିକା ଅନୁମୋଦନ ହୋଇପାରିନାହିଁ। ପ୍ରଧାନମନ୍ତ୍ରୀ ଆବାସ ଯୋଜନା କାର୍ଯ୍ୟକାରୀ କରାଯିବାକୁ ଜିଲାର ୩୧୭ ଗ୍ରାମପଞ୍ଚାୟତରେ ସର୍ଭେ କରାଯାଇଥିଲା। ଏହାର ନୂଆ ତାଲିକା ପ୍ରସ୍ତୁତ ହୋଇଛି। ଏହାକୁ ଗ୍ରାମସଭାରେ ଅନୁମୋଦନ କରାଯିବା କଥା। ତେବେ ପ୍ରସ୍ତୁତ ତାଲିକାରେ ଅନେକ ବିସଙ୍ଗତି ରହିଛି। ଅଯୋଗ୍ୟ ଲୋକଙ୍କୁ ଆବାସ ହିତାଧିକାରୀ ଦର୍ଶାଯାଇ ଯୋଗ୍ୟ ହିତାଧିକାରୀଙ୍କୁ ବାଦ୍ ଦିଆଯାଇଛି। ସର୍ବୋପରି ତାଲିକା ପ୍ରସ୍ତୁତିରେ ସରପଞ୍ଚମାନଙ୍କ କୌଣସି ମତାମତ ନିଆଯାଇ ନାହିଁ। ତେଣୁୁ ଏଭଳି ତାଲିକା ଗ୍ରହଣଯୋଗ୍ୟ ନୁହେଁ ବୋଲି ଜିଲାର ସରପଞ୍ଚମାନେ କହିଆସୁଛନ୍ତି। ଫଳରେ ସର୍ଭେ ତାଲିକା ଗ୍ରାମସଭାରେ ଅନୁମୋଦନ ହୋଇ ନ ଥିତ୍ବାରୁ ହିତାଧିକାରୀମାନେ ଆବାସ ଯୋଜନାରେ ଘର ପାଇବା ଆହୁରି ବିଳମ୍ବ ହେବା ସ୍ପଷ୍ଟ ହୋଇଛି।
ଗତ ୨୬ ତାରିଖରେ ଅନୁଷ୍ଠିତ ଗ୍ରାମସଭାରେ ସର୍ଭେ ତାଲିକାକୁ ବିରୋଧ କରି ସରପଞ୍ଚମାନେ ବର୍ଜନ କରିଥିଲେ। ଫଳରେ ଜିଲାର ୩୧୭ ଗ୍ରାମ ପଞ୍ଚାୟତରେ ଗ୍ରାମସଭା ହୋଇପାରି ନ ଥିଲା। ଏହାପରେ ୩୦ ତାରିଖ ପୁୁଣି ଥରେ ଗ୍ରାମସଭା କରାଯିବାକୁ ବିଡିଓମାନେ ଚିଠି କରିଥିଲେ। ଜିଲା ସରପଞ୍ଚ ସଂଘ ସଭାପତି ବୀରଭଦ୍ର ସାହୁ, କାର୍ଯ୍ୟକାରୀ ସଭାପତି ବଳଦେବ ସାହୁ ସ୍ବତନ୍ତ୍ର ଗ୍ରାମସଭା ବର୍ଜନ ପରେ ଆଜି ମଧ୍ୟ ଜିଲାର ସମସ୍ତ ପଞ୍ଚାୟତରେ ଗ୍ରାମସଭା ବର୍ଜନ କରାଯାଇଥିବା ସୂଚନା ଦେଇଛନ୍ତି। କାର୍ଯ୍ୟକାରୀ ସଭାପତି ସାହୁ କହିଛନ୍ତି ଯେ, ଆବାସ ଯୋଜନା ପାଇଁ ଯେଉଁ ତାଲିକା ପ୍ରସ୍ତୁତିରେ ଯେଉଁ ବିସଙ୍ଗତି ଓ ତ୍ରୁଟି ରହିଛି, ତାକୁ ନ ସୁଧାରିବା ପର୍ଯ୍ୟନ୍ତ ବିରୋଧ ଜାରି ରହିବ। ଏହି ତାଲିକାକୁ ଅନୁମୋଦନ କଲେ ଆଗକୁ ଅଡୁଆ ପରିସ୍ଥିତି ସୃଷ୍ଟି ହେବ। ବହୁ ପ୍ରକୃତ ହିତାଧିକାରୀ ଏବେବି ଘର ପାଇବା ତାଲିକାରେ ନାହାନ୍ତି ବୋଲି ସେ କହିଛନ୍ତି। ଏନେଇ ଜିଲା ଗ୍ରାମ ପଞ୍ଚାୟତ ଅଧିକାରୀ ପ୍ରଶାନ୍ତ ଶତପଥୀଙ୍କୁ ପଚରାଯିବାରୁ ଜିଲାରେ ଆଜି ଗ୍ରାମସଭା ହେବାର ଥିଲା। ତେବେ ସବୁ ପଞ୍ଚାୟତରେ ଗ୍ରାମସଭା ହୋଇଛି କି ନାହିଁ ତାଙ୍କ ପାଖରେ ସବିଶେଷ ରିପୋର୍ଟ ନାହିଁ ବୋଲି କହିଛନ୍ତି।
