ଭୁବନେଶ୍ୱର,୩୦।୧(ବ୍ୟୁରୋ):ବରମୁଣ୍ଡାସ୍ଥିତ ବିଜୁପଟ୍ଟନାୟକ ଖେଳ ପଡ଼ିଆରେ ଚାଲିଥିବା ଶିଶିର ସରସ ମେଳା ରବିବାର ଶେଷ ହୋଇଛି। ରାଜ୍ୟ ସରକାରଙ୍କ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଅଧୀନ ଓଡ଼ିଶା ଗ୍ରାମୀଣ ବିକାଶ ଏବଂ ମାର୍କେଟିଂ ସୋସାଇଟି ପକ୍ଷରୁ ଗ୍ରାମୀଣ କାରିଗର ଓ ସ୍ବୟଂସହାୟକ ଗୋଷ୍ଠୀଙ୍କ ଦ୍ୱାରା ଉପତ୍ାଦିତ ସାମଗ୍ରୀର ବିକ୍ରିବଟା ନିମନ୍ତେ ଏହି ମେଳା ବଡ଼ ପ୍ଲାଟ୍ଫର୍ମ ସୃଷ୍ଟି କରିଥିଲା। ଏହି ମେଳାରେ ୨୪ଟି ରାଜ୍ୟ ସହ ଓଡ଼ିଶାର ୩୦ଟି ଜିଲାରୁ କାରିଗରମାନେ ଅଂଶଗ୍ରହଣ କରିଥିଲେ। ମୋଟ ୮୫୭ଜଣ କାରିଗର ମେଳାରେ ଅଂଶଗ୍ରହଣ କରିବା ସହ ନିଜ ସାମଗ୍ରୀର ପ୍ରଦର୍ଶନ ଓ ବିକ୍ରି କରିଥିଲେ। ଓଡ଼ିଶା ସମେତ ଅନ୍ୟ ରାଜ୍ୟର ୩୫୬ଟି ଷ୍ଟଲ୍ ଖୋଲିଥିଲା। ଓରମାସ୍, ସହଯୋଗୀ ସଂସ୍ଥା ମିଶନ ଶକ୍ତି, ନାବାର୍ଡ ପକ୍ଷରୁ ମୋଟ୍ ୬୩ଟି ଷ୍ଟଲ୍ ସ୍ଥାନ ପାଇଥିଲା। ଚଳିତବର୍ଷ ୨୪କୋଟିରୁ ଊର୍ଦ୍ଧ୍ୱ ଟଙ୍କାର ବ୍ୟବସାୟ ହୋଇଛି ବୋଲି ଓର୍ମାସ୍ ତରଫରୁ ସୂଚନା ଦିଆଯାଇଛି। ଏଥିସହ ରାଜ୍ୟରେ ୨୭ଟି ପଲ୍ଲିଶ୍ରୀ ମେଳା ଓ ୨ଟି ଶିଶିର ସରସ ମେଳାର ଆୟୋଜନ କରାଯାଇଥିଲା। ସେହିପରି ଆୟୋଜିତ ଜିଲା ମହୋତ୍ସବ ଓ ପଲ୍ଲିଶ୍ରୀ ମେଳାରେ ସମୁଦାୟ ୩୭କୋଟି ଟଙ୍କାର ବ୍ୟବସାୟ ହୋଇଛି। ମହିଳା ସ୍ବୟଂ ସହାୟକ ଗୋଷ୍ଠୀଙ୍କ ଦ୍ୱାରା ଉପତ୍ାଦିତ ଗ୍ରାମୀଣ ସାମଗ୍ରୀର ବିକ୍ରିବଟାରେ ମୋଟ ୬୦କୋଟି ଟଙ୍କାର ବ୍ୟବସାୟ ହୋଇପାରିଛି। ଉଦ୍ଯାପନୀ ସାର ବିଭିନ୍ନ ବର୍ଗରେ ଉତ୍କର୍ଷ ପ୍ରଦାନ କରିଥିବା ୧୦ଟି ଷ୍ଟଲକୁ ପୁରସ୍କାର ପ୍ରଦାନ କରାଯାଇଥିଲା। ଶ୍ରେଷ୍ଠ ଇନୋଭେଟିଭ୍ ଷ୍ଟଲ୍ ଭାବେ ଖୋର୍ଦ୍ଧାର ଜୟଦେବ ବନାନା ଫାମର୍ସ ଆଣ୍ଡ୍ ଆର୍ଟିସାନ୍, ଶ୍ରେଷ୍ଠ ପ୍ରଦର୍ଶନ ଷ୍ଟଲ୍ ଭାବେ କଳାହାଣ୍ଡିର ଉପତ୍ାଦକ ଗୋଷ୍ଠୀ, ଶ୍ରେଷ୍ଠ ବିକ୍ରୟଶୈଳୀ ପାଇଁ ଗୁଜରାଟର ମିଲନ୍ ଶକ୍ତି ସ୍ବୟଂସହାୟକ ଗୋଷ୍ଠୀ, ସର୍ବାଧିକ ବିକ୍ରୟ ପାଇଁ ଉତ୍ତରପ୍ରଦେଶର ଜୟଦୁର୍ଗା ମହିଳା ସ୍ବୟଂ ସହାୟିକା ଆଦିକୁ ପୁରସ୍କୃତ କରାଯାଇଥିଲା। ସେହିପରି ଫୁଡ୍ ଷ୍ଟଲରେ ସର୍ବାଧିକ ବିକ୍ରିି ପାଇଁ ମୟୂରଭଞ୍ଜର ବାରିପଦା ମୁଢି ମାଂସ ଷ୍ଟଲକୁ ପୁରସ୍କୃତ କରାଯାଇଥିଲା।
