ଯାନବାହନ ଚଳାଚଳ, ଶିଳ୍ପ ବିକାଶ ସହ ଆମ ଅବ୍ୟବସ୍ଥିତ ଜୀବନଶୈଳୀ ଯୋଗୁ ଅଧିକ ଧୂଆଁ ଓ ସବୁଜଗୃହ ବାଷ୍ପ ନିର୍ଗମନ ବୃଦ୍ଧିପାଉଛି । ଫଳରେ ବାୟୁମଣ୍ଡଳ ଉତ୍ତପ୍ତ ହେବା ସହ ପ୍ରଦୂଷଣ ମଧ୍ୟ ବଢିଚାଲିଛି। ବାୟୁ ପ୍ରଦୂଷଣର ଭୟଙ୍କର ସ୍ଥିତି ଦେଖିବାକୁ ମିିଳିଛି ଦିଲ୍ଲୀ ସମେତ ଉତ୍ତର ଭାରତର ବହୁ ସହରରେ। ବିଶେଷ କରି ହରିୟାଣା, ପଞ୍ଜାବ ଓ ଉତ୍ତରପ୍ରଦେଶରେ କୃଷକମାନେ ଖୁଣ୍ଟା ପୋଡ଼ି ପ୍ରଦୂଷଣକୁ ଭୟଙ୍କର ସ୍ତରକୁ ନେଇଯାଉଛନ୍ତି। ଏଭଳି ସ୍ଥିତିରେ ଖୁଣ୍ଟା ପୋଡ଼ି ରୋକିବା ଲାଗି ଦିଲ୍ଲୀର ବିକାଶ ଆବ୍ରାହମଙ୍କ ବ୍ୟକ୍ତିଗତ ପ୍ରୟାସ ବେଶ୍ ପ୍ରଶଂସନୀୟ। ସେ ୧୯୯୮ରେ ଅର୍ବାନ ଫାର୍ମର୍ସ କର୍ପୋରେଶନ ଗଠନ କରି ତାଙ୍କ ଟିମ୍ ସହାୟତାରେ ୧ ଲକ୍ଷରୁ ଊର୍ଦ୍ଧ୍ୱ କୃଷକଙ୍କୁ ସାହାଯ୍ୟ କରି ବର୍ଷକୁ ୭୦୦୦ ମେଟ୍ରିକ ଟନ୍ ଓଜନର ନଡ଼ା ପୋଡ଼ି ରୋକିପାରିଛନ୍ତି। ଏହି ଫାଉଣ୍ଡେଶନ ଏବେ ୧୭ଟି ରାଜ୍ୟରେ କାମ କରୁଛି। କୃଷକମାନଙ୍କଠାରୁ ଖୁଣ୍ଟା ଅବଶେଷାଂଶ ସଂଗ୍ରହ କରି ତାହାକୁ ଖତ କରାଯାଉଛି। ଏବେ ସୁଦ୍ଧା ଉକ୍ତ କମ୍ପାନୀ ୭,୦୦୦ ମେଟ୍ରିକ୍ ଟନ୍ ଖତ ପ୍ରସ୍ତୁତ କରି ଚାଷୀମାନଙ୍କୁ ଯୋଗାଇ ଦେଇଛି। ଖୁଣ୍ଟା ପୋଡ଼ି ରୋକିବା ଦ୍ୱାରା ୧,୫୦୦ ମେଟ୍ରିକ ଟନ୍ କାର୍ବନ ଡାଇଅକ୍ସାଇଡ ନିର୍ଗମନ କମିଯାଇଛି ବୋଲି କହନ୍ତି ଆବ୍ରାହମ। ସେ ମଧ୍ୟ ସେହି କୃଷକମାନଙ୍କୁ ଜୈବିକ ଚାଷ ଲାଗି ପ୍ରେରିତ କରିପାରିଛନ୍ତି। ସେମାନେ ଦୈନିକ ୧୦ରୁ ୧୨ ଟନ୍ ପରିବା ଦିଲ୍ଲୀ ମାର୍କେଟକୁ ଯୋଗାଉଛନ୍ତି।
