ମସ୍କୋ, ୧୪।୧୧: ୟୁକ୍ରେନ୍ ଆକ୍ରମଣ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ଙ୍କୁ କେବଳ ପାଶ୍ଚାତ୍ୟରେ ନିନ୍ଦିତ କରିନାହିଁ, ଦେଶ ଭିତରେ ମଧ୍ୟ ତାଙ୍କୁ ଘୋର ବିରୋଧର ସାମ୍ନା କରିବାକୁ ପଡ଼ୁଛି। ସାଢେ ୮ମାସ ଧରି ଚାଲିଥିବା ଯୁଦ୍ଧ ରୁଷିଆକୁ ସାମରିକ ଦୃଷ୍ଟିରୁ ଦୁର୍ବଳ କରିଦେଇଛି। ୟୁକ୍ରେନ୍ର ପ୍ରତିଆକ୍ରମଣରେ ଅନେକ ଲକ୍ଷ ରୁଷୀୟ ସୈନ୍ୟ ନିହତ ହୋଇଛନ୍ତି। ଏଭଳି ସ୍ଥିତି ଉପୁଜିଛି ଯେ, ପୁଟିନ୍ଙ୍କ ପାଇଁ ୟୁକ୍ରେନ୍ ବିରୋଧରେ ଲଢ଼େଇ କରିବାକୁ ସାଧାରଣ ନାଗରିକଙ୍କୁ ବାଧ୍ୟ କରାଯାଉଛି। ଏହିକ୍ରମରେ କୁର୍ସ୍କ ଅଞ୍ଚଳର ଶତାଧିକ ଯୁବକଙ୍କୁ ରୁଷିଆ ସେନା ନିଜ ଦଖଲରେ ରଖିଥିବା ଲୁହାନ୍ସ୍କକୁ ପଠାଇଛି।
ସେଠାରେ ଥିବା ସିଭିଲିଆନ୍ ସୋଲ୍ଜର୍ଙ୍କୁ ଖୋଜି ଘରକୁ ଫେରାଇ ଆଣିବା ପାଇଁ ୭୦ ଜଣ ମହିଳା ଚାଲିଚାଲି ଯାଇଛନ୍ତି। ଓ୍ବାର୍ଜୋନ୍କୁ ଯାଇଥିବା ପ୍ରାୟ ୨୦୦ ପୁରୁଷଙ୍କ ମଧ୍ୟରୁ ଆଉ ମାତ୍ର ୩୦ ଜଣ ଜୀବିତ ଅଛନ୍ତି। ଏହି ଖବର ପାଇବା ପରେ ମହିଳାମାନେ ବେଲ୍ଗୋରୋଡ୍ରୁ ଲୁହାନସ୍କରେ ପହଞ୍ଚତ୍ିଛନ୍ତି। ଯୁଦ୍ଧଭୂମିରୁ ସୈନିକଙ୍କୁ ଛୁଟି ଦେଉ ନ ଥିବା କମାଣ୍ଡରମାନଙ୍କ ସହ ସେମାନେ ମୁହାଁମୁହିଁ ହୋଇଛନ୍ତି। କମାଣ୍ଡରଙ୍କୁ ସେମାନେ କହିଛନ୍ତି, ତୁମ ଉପରେ ଆଉ ଭରସା ନାହିଁ। ଆମ ସ୍ବାମୀଙ୍କୁ ଘରକୁ ଫେରିଯିବା ପାଇଁ ଛାଡ଼ିଦିଅ। କେତେଜଣ ମହିଳା ସେମାନଙ୍କ ସ୍ବାମୀଙ୍କୁ ସୀମାନ୍ତରୁ ଘରକୁ ଟାଣି ନେଇଛନ୍ତି।
ୟୁରିଏଭିଚ୍ ନାମକ ଜଣେ କମାଣ୍ଡର ସୈନ୍ୟମାନଙ୍କ ହାତ,ଗୋଡ଼ ବାନ୍ଧି ସେମାନଙ୍କ ମୁଣ୍ଡ ଉପରେ ମାରଣାସ୍ତ୍ର ରଖି ଭୀରୁ ବୋଲି ଗାଳି କରିବା ସହ ଯୁଦ୍ଧଭୂମିକୁ ଯିବା ପାଇଁ କେମିତି ବାଧ୍ୟ କରୁଛନ୍ତି, ଏହି ମହିଳାମାନେ ସେନେଇ ମିଲିଟାରି ପ୍ରୋସିକ୍ୟୁଟର୍ସଙ୍କ ନିକଟରେ ଅଭିଯୋଗ କରିଛନ୍ତି। ସେମାନେ କହିଛନ୍ତି, ଆମ ସ୍ବାମୀଙ୍କୁ ସେମାନଙ୍କ ନିଜ ବନ୍ଧୁକରେ ଗୁଳି କରାଯାଇଛି। ଗର୍ଭବତୀ ଥିବା ସେଟଲାନା ଗୋରବାଟେନକୋ କହିଛନ୍ତି, ଶୀତରେ ଆମେ ବରଫ ପାଲଟି ଗଲୁଣି। ତଥାପି ଆଗେଇ ଚାଲୁଥିବୁ। ସ୍ବାମୀଙ୍କୁ ନ ଧରି ଘରକୁ ଫେରିବାର ପ୍ରଶ୍ନ ଉଠୁନାହିଁ।
