ଭୁବନେଶ୍ୱର, ୧୭।୧୦(କ୍ରୀଡ଼ା ପ୍ରତିନିଧି): ପ୍ରଥମଥର ପାଇଁ ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ୍ ଖେଳିବାକୁ ସୁଯୋଗ ପାଇଥିବା ଭାରତୀୟ ଦଳ ସୋମବାର ଏହାର ଶେଷ ମ୍ୟାଚ୍ ଶକ୍ତିଶାଳୀ ବ୍ରାଜିଲ ବିପକ୍ଷରେ ଖେଳିବ। ଗ୍ରୁପ୍ ଏ’ରେ କ୍ରମାଗତ ୨ଟି ମ୍ୟାଚ୍ ହାରି ଭାରତୀୟ ଦଳ ନକ୍ଆଉଟ ଦୌଡ଼ରୁ ବାଦ୍ ପଡ଼ି ସାରିଛି। ଅଭିଜ୍ଞତାର ଅଭାବ ପଡ଼ିଆ ମଧ୍ୟରେ ସ୍ପଷ୍ଟ ବାରି ହୋଇଯାଇଛି। ତେଣୁ ଆଗାମୀ ମ୍ୟାଚ୍ରେ ଖେଳାଳିମାନେ ବିନା ଚାପରେ ଖେଳିବା ସହ ପଡ଼ିଆ ମଧ୍ୟରେ ଉତ୍ତମ ବୁଝାମଣା ଏବଂ ତ୍ୱରିତ ନିଷ୍ପତ୍ତି ନେବା ଉପରେ ଗୁରୁତ୍ୱ ଦେବେ ବୋଲି ମୁଖ୍ୟ କୋଚ୍ ଥୋମାସ ଡେନର୍ବି ଆଶାପ୍ରକାଶ କରିଛନ୍ତି।
”ବ୍ରାଜିଲ ବିପକ୍ଷ ମ୍ୟାଚ୍ରେ ଆମକୁ କିଛି ହରାଇବାର ନାହିଁ। ତେଣୁ ବିନା ଚାପରେ ଥଣ୍ଡା ମନରେ ଆତ୍ମବିଶ୍ୱାସର ସହ ଖେଳିବାକୁ ପିଲାମାନଙ୍କୁ ପରାମର୍ଶ ଦିଆଯାଇଛି। ବ୍ରାଜିଲ ଏକ ଶକ୍ତିସମ୍ପନ୍ନ ଦଳ। ଏହି ଦଳ ନକ୍ଆଉଟ ପର୍ଯ୍ୟାୟରେ ପ୍ରବେଶ ପାଇଁ ପ୍ରୟାସ ଲଢ଼ିବ। ତେଣୁ ମ୍ୟାଚ୍ରେ ନିଶ୍ଚିତ ସମସ୍ତ ଶକ୍ତି ପ୍ରୟୋଗ କରିବ। ଏହି ଗେମ୍ ଆମ ପାଇଁ ସମ୍ମାନ ସଦୃଶ। ବ୍ରାଜିଲ ବିପକ୍ଷରେ ଆମେ ଦୃଢ଼ ରକ୍ଷଣଭାଗ ଉପରେ ଅଧିକ ଗୁରୁତ୍ୱ ଦେବୁ। ତେବେ ଫୁଟ୍ବଲ କେବଳ ରକ୍ଷଣଭାଗକୁ ନେଇ ଖେଳାଯାଏନାହିଁ ବୋଲି ଆମେ ଜାଣିଛୁ। ତେଣୁ ଯଦି ଆମେ ଗୋଲ ଦେଇପାରିବୁ ତେବେ ବହୁତ ଭଲ ହେବ। ଗୋଲ ଦେଇ ଟୁର୍ନାମେଣ୍ଟ ଶେଷ କରିପାରିଲେ ଆମ ପାଇଁ ଭଲ। ଟୁର୍ନାମେଣ୍ଟରୁ ପିଲାମାନେ ଅନେକ କିଛି ଶିଖିଛନ୍ତି। ଆଗକୁ ଆଉ ଏକ ବଡ଼ ପରୀକ୍ଷା ଅଛି।
ଏହି ପରିସ୍ଥିତିକୁ ସାମ୍ନା କଲେ ସେମାନେ ଅଧିକ ପରିପକ୍ୱ ହେବେ। ପରିସ୍ଥିତି ଅନୁଯାୟୀ ପଡ଼ିଆରେ ତ୍ୱରିତ ନିଷ୍ପତ୍ତି ନେବା ଏବଂ ଉତ୍ତମ ବୁଝାମଣା ରଖିବା ଉପରେ ଅଧିକ ଧ୍ୟାନ ଦେବାକୁ ପଡ଼ିବ। ବ୍ରାଜିଲରେ ପିଲାମାନେ ବହୁତ ଛୋଟବେଳୁ ଫୁଟ୍ବଲ ଖେଳିବା ଆରମ୍ଭ କରିଥାନ୍ତି। ଏହା ଦଳକୁ ଅନେକ ଫାଇଦା ଦେଇଥାଏ। ତେବେ ଆମର ଷ୍ଟାର୍ଟିଂ ଇଲେଭେନ ମଧ୍ୟ ବିପକ୍ଷ ଦଳକୁ ମୁକାବିଲା କରିବାରେ ସକ୍ଷମ, ଏହା ଦେଖାଇବାର ସମୟ ଆସିଛି“ ବୋଲି ଡେନର୍ବି ପ୍ରକାଶ କରିଛନ୍ତି।
