ମୁମ୍ବାଇ,୧୩।୧୦: ମୁମ୍ବାଇ ଉପନିର୍ବାଚନରେ ପ୍ରତିଦ୍ୱନ୍ଦ୍ୱିତା ଲାଗି ଶିବସେନାର ଉଦ୍ଧବ ଗୋଷ୍ଠୀ ପ୍ରାର୍ଥୀ ଋତୁଜା ଲାଟ୍କେଙ୍କୁ ଅଦାଲତ ଅନୁମତି ଦେଇଛନ୍ତି। ପୌର ନିଗମରୁ ତାଙ୍କ ଇସ୍ତଫାପତ୍ର ଗ୍ରହଣ କରିନେବାକୁ ବମ୍ବେ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ଫଳରେ ଉଦ୍ଧବ ଗୋଷ୍ଠୀଙ୍କୁ ବଡ଼ ଆଶ୍ୱସ୍ତି ମିଳିଛି। ପ୍ରାର୍ଥୀଙ୍କ ଇସ୍ତଫାପତ୍ର ଗ୍ରହଣ ନ କରିବା ଲାଗି ଏକନାଥ ଶିନ୍ଦେ ସରକାର ପୌର ନିଗମ ଉପରେ ଚାପ ପକାଉଥିବା ଅଭିଯୋଗ ହୋଇଥିଲା। ଶୁକ୍ରବାର ନାମାଙ୍କନପତ୍ର ଦାଖଲର ଶେଷ ଦିନ ହୋଇଥିବା ବେଳେ ଋତୁଜାଙ୍କ ଇସ୍ତଫାପତ୍ର ଗୃହୀତ ନ ହୋଇଥିଲେ, ସେ ଉପନିର୍ବାଚନ ପାଇଁ ପ୍ରାର୍ଥୀ ହୋଇପାରି ନ ଥାନ୍ତେ। ନିଷ୍ପତ୍ତି ନେବାକୁ ସମୟ ଲାଗିବ ବୋଲି ପୌରନିଗମ ମୁଖ୍ୟ କହିଥିବା ବେଳେ ରାଜନୈତିକ ଚାପ ଅଭିଯୋଗକୁ ବ୍ରିହନମୁମ୍ବାଇ କମିଶନର ଇକ୍ବାଲ ଚହଲ ଖଣ୍ଡନ କରିଥିଲେ। ଶୁକ୍ରବାର ପୂର୍ବାହ୍ନ ୧୧ଟା ସୁଦ୍ଧା ଋତୁଜାଙ୍କ ଇସ୍ତଫାପତ୍ର ଗ୍ରହଣ ସମ୍ପର୍କିତ ପତ୍ର ହସ୍ତାନ୍ତର କରିବା ଲାଗି ହାଇକୋର୍ଟ ପୌର ନିଗମକୁ କହିଛନ୍ତି।
