କେନ୍ଦୁଝର/ପାଟଣା, ୧୨ା୯(ସ୍ବ.ପ୍ର.)-କେନ୍ଦୁଝର ଜିଲା ବାରିଆ ଥାନା ଅଧୀନ ଭଣ୍ଡା ମେଡିକାଲରେ ସୋମବାର ସନ୍ଧ୍ୟାରେ ଜଣେ ଗୁଳିବିଦ୍ଧ ଯୁବକଙ୍କ ମୃତ୍ୟୁ ହୋଇଛି। ମୃତକ ଜଣକ ଝାଡ଼ଖଣ୍ଡ ରାଜ୍ୟ ଛଣପଦା ଅଞ୍ଚଳର ମୃତ୍ୟୁଞ୍ଜୟ ବେହେରା(୪୦) ବୋଲି ଜଣାପଡ଼ିଛି। ଏହି ଘଟଣାରେ ତାଙ୍କୁ ଡାକ୍ତରଖାନା ଆଣିଥିବା ୨ଜଣଙ୍କୁ ପୋଲିସ ଅଟକ ରଖି ପଚରାଉଚୁରା କରୁଛି। ତେବେ କେଉଁ କାରଣରୁ ଏବଂ କିଏ ଗୁଳି ଫୁଟାଇ ହତ୍ୟା କରିଛି ତାହା ଜଣାପଡ଼ିନାହିଁ। ଏହି ଗୁଳିକାଣ୍ଡ ଘଟଣା କେନ୍ଦୁଝର ଜିଲା ତୁରୁମୁଙ୍ଗା, ବାରିଆ ଥାନା କିମ୍ବା ସୀମାନ୍ତ ମୟୂରଭଞ୍ଜ ଜିଲା ଚଢ଼େଇଭୋଳ ଅଞ୍ଚଳରେ ଘଟିଥିବା କୁହାଯାଉଛି। ଗୁଳିକାଣ୍ଡ ପରେ ସମ୍ପୃକ୍ତ ଯୁବକଙ୍କୁ କରଞ୍ଜିଆ ଉପଖଣ୍ଡ ଡାକ୍ତରଖାନା କିମ୍ବା କେନ୍ଦୁଝର ଜିଲା ମୁଖ୍ୟ ଡାକ୍ତରଖାନାକୁ ନିଆ ନ ଯାଇ ଭଣ୍ଡା ସ୍ବାସ୍ଥ୍ୟକେନ୍ଦ୍ରକୁ କାହିଁକି ଅଣାଯାଇଥିତ୍ଲା ତାହାକୁ ନେଇ ସନ୍ଦେହ ସୃଷ୍ଟି ହୋଇଛି। ବାରିଆ ଥାନା ଅଧିକାରୀ ବନ୍ଦନା ପାତ୍ର ଓ ତୁରୁମୁଙ୍ଗା ଥାନା ଅଧିକାରୀ ମଦନ ମୋହନ ନାଏକ ବିଭିନ୍ନ ସ୍ଥାନରେ ତଦନ୍ତ ଜାରି ରଖିଛନ୍ତି।
