ଭୁବନେଶ୍ୱର,୯ା୯(ବ୍ୟୁରୋ): ଆମେ ମନେରଖିବା ଉଚିତ ଯେ ଆମ ଦରମାର ପ୍ରତ୍ୟେକ ମୁଦ୍ରା ଓ ଅନ୍ୟାନ୍ୟ ସୁବିଧା ରାଜ୍ୟର ଲୋକଙ୍କଠାରୁ ଆସୁଛି। ଅତ୍ୟନ୍ତ ସମୟାନୁବର୍ତ୍ତୀ, ଦାୟିତ୍ୱବାନ, କଠିନ ପରିଶ୍ରମ ଓ ନୂଆ ଜ୍ଞାନକୌଶଳକୁ ବ୍ୟବହାର କରି ନିଜର ସବୁଠାରୁ ଉତ୍ତମ ସେବା ଯୋଗାଇବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନବନଯୁକ୍ତ କମନ କ୍ୟାଡର ଅଡିଟରଙ୍କୁ ପରାମର୍ଶ ଦେଇଛନ୍ତି। ଗୁରୁବାର ଲୋକସେବା କନ୍ଭେନଶନ ହଲ୍ରେ ନବନିଯୁକ୍ତ ୧୪୭ ଜଣ କମନ କ୍ୟାଡର ଅଡିଟରଙ୍କୁ ନିଯୁକ୍ତିପତ୍ର ଦେବା ଏବଂ ଓରିଏଣ୍ଟେଶନ କାର୍ଯ୍ୟକ୍ରମରେ ଯୋଗ ଦେଇ ମୁଖ୍ୟମନ୍ତ୍ରୀ କହିଛନ୍ତି ଯେ ସରକାରୀ ପାଣ୍ଠିର ଉଚିତ ବିନିଯୋଗକୁ ସୁନିଶ୍ଚିତ କରିବା ନେଇ କାର୍ଯ୍ୟକରିବା ଦରକାର। ୫-ଟି ନୀତି ଅନୁଯାୟୀ ପ୍ରତ୍ୟେକ ସରକାରୀ ସେବାକୁ ଉଚ୍ଚକୋଟୀର କରାଯାଇଛି। ପ୍ରତ୍ୟେକ ସରକାରୀ କର୍ମଚାରୀ ଲୋକମାନଙ୍କ ସେବା ପାଇଁ କର୍ତ୍ତବ୍ୟନିଷ୍ଠ ଓ ଉତ୍ସର୍ଗୀକୃତ ଭାବେ କାର୍ଯ୍ୟ କରିବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି। ଗତ ଦୁଇ ଦଶନ୍ଧି ଧରି ରାଜ୍ୟ ବିକାଶ ପଥରେ ଆଗେଇ ଚାଲିଛି। ଓଡ଼ିଶା ଦେଶର ଏକ ଦ୍ରୁତ ଅଭିବୃଦ୍ଧି ରାଜ୍ୟ ଭାବେ ଆଗେଇ ଚାଲିଛି। ଆର୍ଥିକ ଅଭିବୃଦ୍ଧି ସହିତ ଓଡ଼ିଶା ସୁଶାସନ ଓ ସର୍ବସାଧାରଣଙ୍କୁ ସେବା ଯୋଗାଇବା ଦିଗରେ ମଧ୍ୟ ଏକ ମଡେଲ ଭାବେ ଉଭା ହୋଇଛି। ଏହି ଅବସରରେ ଯୋଗଦେଇ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କହିଛନ୍ତି ଯେ ୫-ଟି ଓ ମୋ ସରକାର ରାଜ୍ୟର ଉତ୍ତମ ପ୍ରଶାସନର ଏକ ସଙ୍କେତ। ରାଜ୍ୟ ସରକାର ଜନସାଧାରଣଙ୍କ କଲ୍ୟାଣ ପାଇଁ ବହୁ ଅର୍ଥ ଖର୍ଚ୍ଚ କରୁଛନ୍ତି। ଅଡିଟରମାନେ ଏହି ଅର୍ଥ କିପରି ସୁବିନିଯୋଗ ହୋଇପାରିବ ସେଥିପ୍ରତି ଗୁରୁତ୍ୱ ଦେବା ଆବଶ୍ୟକ। ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର କହିଛନ୍ତି ଯେ ଆର୍ଥିକ ସୁପରିଚାଳନା ପାଇଁ ଓଡ଼ିଶା ଜଣାଶୁଣା। ଆର୍ଥିକ ନିୟମିତତା ଉପରେ ଅଡିଟରମାନେ ଧ୍ୟାନଦେବା ଦରକାର। ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଭି.କେ.ପାଣ୍ଡିଆନ ଅଡିଟରମାନଙ୍କ ସହ ଆଲୋଚନା କରିବା ସହ ସର୍ବସାଧାରଣଙ୍କ ଅର୍ଥ କିପରି ସୁବିନିଯୋଗ ହେଉ ତାହା ଉପରେ ମୁଖ୍ୟମନ୍ତ୍ରୀ ଗୁରୁତ୍ୱ ଦେଇ ଆସୁଛନ୍ତି। ମୁଖ୍ୟମନ୍ତ୍ରୀଙ୍କ ନୀତି ଆଧାରରେ ସ୍ବଚ୍ଛତା ବଜାୟ ରଖିବା ସହ ସର୍ବସାଧାରଣ ଖର୍ଚ୍ଚକୁ ଉଚିତ ମାର୍ଗରେ ପରିଚାଳନା କରିବାକୁ ସେ ପରାମର୍ଶ ଦେଇଛନ୍ତି। ଏହି କାର୍ଯ୍ୟକ୍ରମରେ ଅର୍ଥ ବିଭାଗ ପ୍ରମୁଖ ସଚିବ ବିଶାଳ ଦେବ ସ୍ବାଗତ ଭାଷଣ ଦେଇଥିବା ବେଳେ ବିଭାଗୀୟ ସଚିବ ଧନ୍ୟବାଦ ଦେଇଛନ୍ତି।
