ଅମରପାଲି,୮ା୯(ଡି.ଏନ.ଏ.): ଦୁରାରୋଗ୍ୟ ବ୍ୟାଧି ହୋଇଥିବା ସନ୍ଦେହ କରି ଜଣେ ମହିଳାଙ୍କୁ ତାଙ୍କ ସ୍ବାମୀଙ୍କ ସମେତ ପୁଅ ବୋହୁ ଗୁରୁତର ଅବସ୍ଥାରେ ଘରେ ଛାଡି ଫେରାର ହୋଇ ଯାଇଛନ୍ତି। ସେ ରହୁଥିବା ପଡାବାସୀ ମଧ୍ୟ ତାଙ୍କୁ ସାମାଜିକ ବାସନ୍ଦ କରିଛନ୍ତି । ଏହି ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। ରୋଗାକ୍ରାନ୍ତ ମହିଳା ଜଣକ ଏବେ ଭାଗ୍ୟକୁ ଆଦରି ମୃତ୍ୟୁ ସହ ସଂଗ୍ରାମ ଚଳାଇଛନ୍ତି। ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ କେନଝିରିଆପାଲି ପଞ୍ଚାୟତ ଅନ୍ତର୍ଗତ ମହୁଲପାଲି ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି। ଗ୍ରାମର ଧନ ସିଂ ମହାନନ୍ଦଙ୍କ ସ୍ତ୍ରୀ ସୀତା(୫୦)ଙ୍କ ଗୋଡରେ ଘା’ ହୋଇ ଗୁରୁତର ହୋଇଛି। ପ୍ରାୟ ଦେଢବର୍ଷ ପୂର୍ବେ ମହିଳାଙ୍କୁ ମଧୁମେହ ରୋଗ ହୋଇଥିବା ଜଣାପଡିଥିଲା। ସେ ପ୍ରଥମେ ଚିକିତ୍ସିତ ହୋଇ ଔଷଧ ଖାଉଥିଲେ। ପରବର୍ତ୍ତୀ ସମୟରେ ଆର୍ଥିକ ଅଭାବ ଯୋଗୁ ଚିକିତ୍ସା ହୋଇ ପାରିଲେ ନାହିଁ। ଫଳରେ ରୋଗ ବଢିଯିବା ସହିତ ଗୋଡର ଘାଆ ଶୁଖୁ ନ ଥିଲା। ଏହି କାରଣରୁ ପରିବାର ଲୋକେ ତାଙ୍କୁ କୌଣସି ଦୁରାରୋଗ୍ୟ ବ୍ୟାଧି ହୋଇଥିବା ସନ୍ଦେହ କରିଥିଲେ ା ସମ୍ପୃକ୍ତ ମହିଳାଙ୍କ ସ୍ବାମୀ ସମେତ ଦୁଇ ପୁଅ ଓ ତିନି ଝିଅ ଅଛନ୍ତି। ସମସ୍ତ ଝିଅ ପୁଅ ବିବାହିତ। ବଡପୁଅ ନିକଟସ୍ଥ ଏକ ଗ୍ରାମରେ ବିବାହ କରି ସେଠାରେ ଘରଜ୍ବାଇଁ ରହିଛନ୍ତି। ସାନ ପୁଅ ବିବାହ କରି ସ୍ତ୍ରୀ,ମାଆ ଓ ବାପାଙ୍କ ସହିତ ଘରେ ରହୁଥିଲେ। ମହିଳାଙ୍କ ଘା’ ବଢି ଯିବାରୁ ତାଙ୍କୁ ଉପଯୁକ୍ତ ଚିକିତ୍ସା କରିବା ପରିବର୍ତ୍ତେ ସାନପୁଅ ସ୍ତ୍ରୀଙ୍କୁ ଶଶୁର ଘରେ ଛାଡି ରାଜ୍ୟ ବାହାରକୁ ଦାଦନ ଖଟିବାକୁ ଚାଲି ଯାଇଛନ୍ତି। ମହିଳାଙ୍କ ସ୍ବାମୀ କିଛି ଦିନ ଘରେ ରହି ସେବା କରୁଥିଲେ। ମାତ୍ର ଦୁଇ ମାସ ହେବ ସେ ମଧ୍ୟ ରୋଗୀଣା ସ୍ତ୍ରୀଙ୍କୁ ଛାଡି ବଡପୁଅ ଘରକୁ ପଳାଇଛନ୍ତି। ରୋଗାକ୍ରାନ୍ତ ମହିଳା ଜଣକ ଭୋକ ଓପାସରେ ଘରେ ଏକାକୀ ପଡି ରହିଛନ୍ତି । ଗ୍ରାମବାସୀ ଓ ପଡାବାସୀ ତାଙ୍କୁ କିଛି ଦିନ ଖାଇବାକୁ ଦେଉଥିଲେ। ଏବେ ରୋଗ ବଢିଯିବାରୁ ତାଙ୍କ ପାଖକୁ ଆଉ କେହି ଯାଉ ନାହାନ୍ତି। ଏପରିକି ତାଙ୍କୁ ସାମାଜିକ ବାସନ୍ଦ ମଧ୍ୟ କରାଯାଇଛି। ଏନେଇ ସ୍ଥାନୀୟ ସରପଞ୍ଚ ସସ୍ମିତା ଦୀପଙ୍କୁ ଯୋଗାଯୋଗ ଲାଗି ଉଦ୍ୟମ କରାଯାଇଥିଲେ ମଧ୍ୟ ସମ୍ଭବ ହୋଇ ନ ଥିଲା।ବୀରମହାରାଜପୁର ବିଡିଓ ମୋତିଲାଲ ସୁଲିଆଙ୍କୁ ପଚାରିବାରେ ମହିଳାଙ୍କୁ ଉଦ୍ଧାର କରି ଚିକିତ୍ସା କରିବାର ବ୍ୟବସ୍ଥା କରାଯିବ ବୋଲି ପ୍ରକାଶ କରିଛନ୍ତି। ସମ୍ପୃକ୍ତ ମହିଳାଙ୍କୁ ଯଥାଶୀଘ୍ର ଉଦ୍ଧାର କରି ଚିକିତ୍ସା କରିବା ସହିତ ସରକାରୀ ସହାୟତା ପ୍ରଦାନ କରିବାକୁ ଦାବି ହେଉଛି।
