ଭୁବନେଶ୍ୱର,୩୦ା୮(ବ୍ୟୁରୋ):ଶେଷକୃତ୍ୟ ପାଇଁ ଶିଶୁକନ୍ୟାର ମୃତଦେହକୁ ବ୍ୟାଗରେ ନେଉଥିଲେ ବାପା। ହେଲେ ଅଧାବାଟରେ ଛିଣ୍ଡିଗଲା ବ୍ୟାଗ। ମୃତଦେହଟି ତଳକୁ ଖସି ପଡିବା ଦେଖି ଲୋକଙ୍କ ସନ୍ଦେହ ହେଲା। ତାଙ୍କୁ ଅଟକାଇ ନିସ୍ତୁକ ମାଡ଼ ମାରିଥିଲେ। ମୃତ ଝିଅକୁ ସଂସ୍କାର ପାଇଁ ନେଉଥିବା କହିଥିଲେ ମଧ୍ୟ ଲୋକେ କିଛି ଶୁଣି ନ ଥିଲେ। ସୋମବାର ଖଣ୍ଡଗିରି ଥାନା ଅଞ୍ଚଳରେ ଏଭଳି ଘଟଣା ଦେଖିବାକୁ ମିଳିଥିଲା। ଖବର ପାଇ ପୋଲିସ ସେଠାରେ ପହଞ୍ଚତ୍ ଲୋକଙ୍କ କବଳରୁ ସମ୍ପୃକ୍ତ ବ୍ୟକ୍ତି ଓ ତାଙ୍କ ସ୍ତ୍ରୀଙ୍କୁ ଉଦ୍ଧାର କରି ଥାନାକୁ ନେଇଥିଲା। ଉଭୟଙ୍କୁ ପଚରାଉଚରା ପରେ ପ୍ରକୃତ ଘଟଣା ଜଣାପଡିଥିଲା। ସେମାନେ ମୃତ ଶିଶୁକନ୍ୟାର ମେଡିକାଲ ରିପୋର୍ଟ ଦେଖାଇବା ପରେ ପୋଲିସ ସତ୍ୟନଗର ଶ୍ମଶାନରେ ଶେଷକୃତ୍ୟ ପାଇଁ ବ୍ୟବସ୍ଥା କରିଥିଲା। ଆକ୍ରମଣର ଶିକାର ବ୍ୟକ୍ତି ଜଣକ ହେଲେ ଆଇଗିଣିଆ ସୁବାସନଗର ବସ୍ତିରେ ରହୁଥିବା ଗଞ୍ଜାମର ସନ୍ତୋଷ ସାହୁ। ସେମାନେ ଆଇଗିଣିଆ ଅଞ୍ଚଳରେ ରହି ଦିନମଜୁରିଆ କାମ କରି ପରିବାର ଚଳାନ୍ତି। ୨ ଝିଅଙ୍କ ମଧ୍ୟରୁ ୮ ମାସର ଶିଶୁକନ୍ୟାର ଦେହ ଅସୁସ୍ଥ ଥିଲା। ଗୁରୁତର ହେବାରୁ ସୋମବାର ତାଙ୍କୁ ବାପା ଓ ମା ଚିକିତ୍ସା ଲାଗି କ୍ୟାପିଟାଲ ହସ୍ପିଟାଲ ନେଇଥିଲେ। ହେଲେ ସେଠାରେ ଡାକ୍ତର ମୃତ ଘୋଷଣା କରିଥିଲେ। ତେଣୁ ଅନ୍ତିମ ସଂସ୍କାର କେଉଁଠି କରିବେ ତାହାକୁ ନେଇ ଚିନ୍ତିତ ଥିଲେ। ଅଳ୍ପଦିନ ହେବ ଗାଁରୁ ଆସିଥିବାରୁ ଭୁବନେଶ୍ୱର ବିଷୟରେ ବେଶି କିଛି ଜାଣି ନ ଥିଲେ। ତେଣୁ ଅନ୍ତିମ ସଂସ୍କାର ଲାଗି ହସ୍ପିଟାଲରୁ ଉଭୟ ସ୍ବାମୀ ଓ ସ୍ତ୍ରୀ ମୃତ ଶିଶୁକନ୍ୟାକୁ ଧରି ରହୁଥିବା ଘରକୁ ନେଉଥିଲେ। ପରେ ମୃତଦେହକୁ ବ୍ୟାଗ୍ରେ ରଖି ନଦୀପଠାରେ ପୋତିବାକୁ ଯାଉଥିବାବେଳେ ଖଣ୍ଡଗିରି ମଦ ଦୋକାନ ନିକଟରେ ଏହି ଘଟଣା ଘଟିଥିଲା।
