ପାପଡାହାଣ୍ଡି,୨୯।୮(ଡି.ଏନ୍.ଏ.): ନିଜ ଧର୍ମ ଛାଡି ଅନ୍ୟ ଧର୍ମ ଗ୍ରହଣ କଲେ। ସେହି ଧର୍ମର ପୂଜାର୍ଚ୍ଚନା କଲେ। ଏହାକୁ ନେଇ ଗ୍ରାମରେ ଦେଖାଦେଲା ବିବାଦ। ଗ୍ରାମବାସୀ ବୈଠକ କରି ଧର୍ମ ପରିବର୍ତ୍ତନ କରିଥିବା ପରିବାରକୁ ଫେରିଆସିବା ଲାଗି ନିବେଦନ କରିଥିଲେ ମଧ୍ୟ କିଛି ସୁଫଳ ମିଳି ନ ଥିଲା। ଶେଷରେ ଗ୍ରାମବାସୀ ଉକ୍ତ ପରିବାର ସହ କଥା ବନ୍ଦ କରି ସେମାନଙ୍କୁ ବିବାହ ବ୍ରତ, କୁଲି ମଜୁରୀ କାମରେ ନିୟୋଜିତ ନ କରିବାକୁ ନିଷ୍ପତ୍ତି ନେଇଥିଲେ। ଧର୍ମ ପରିବର୍ତ୍ତନ କରିଥିବା ପରିବାର ପୁଣି ଏବେ ହିନ୍ଦୁ ଧର୍ମକୁ ପ୍ରତ୍ୟାବର୍ତ୍ତନ କରିଛନ୍ତି। ନବରଙ୍ଗପୁର ଜିଲା ପାପଡାହାଣ୍ଡି ବ୍ଲକ ପଣ୍ଡିକୋଟ ପଞ୍ଚାୟତ ସଦର ମହାକୁମାରେ ଏପରି ଘଟଣା ଦେଖିବାକୁ ମିଳିଛି।
ଦୁଇ ବର୍ଷ ତଳେ ଗ୍ରାମର ଡମୁ ଜାନୀ ସ୍ତ୍ରୀ ଶାନ୍ତି ଜାନୀ, ବୈଶାଖୀ ଜାନୀ ସ୍ବାମୀ ମନଧର ଜାନୀ, କେଶବ ଜାନୀ ସ୍ତ୍ରୀ ପଦ୍ମଣୀ ଜାନୀ ହିନ୍ଦୁ ଧର୍ମ ପରିବର୍ତ୍ତନ କରି ଅନ୍ୟ ଧର୍ମ ଗ୍ରହଣ କରିଥିଲେ। ଏହାକୁ ନେଇ ଗ୍ରାମରେ ଅସନ୍ତୋଷ ଦେଖାଦେଇଥିଲା। ଏହି ୩ପରିବାରକୁ ପୁଣି ମୂଳ ଧର୍ମକୁ ଫେରାଇ ଆଣିବାକୁ ଜାତି କୁଟୁମ୍ବ ସହ ଗ୍ରାମବାସୀ ପ୍ରୟାସ କରିଥିଲେ। ୬ମାସ ତଳେ ତଳେ ପୁଣି ଗ୍ରାମରେ ଏକ ବୈଠକ କରି ତିନି ପରିବାରକୁ ଫେରିବା ଲାଗି ନିବେଦନ କରାଯାଇଥିଲା। କିନ୍ତୁ ସେମାନେ ଫେରି ନ ଥିଲେ। ଏହାପରେ ଗ୍ରାମବାସୀ ସେମାନଙ୍କ ସହ କଥା ବନ୍ଦ କରି କୁଲି ମଜୁରୀ କାମକୁ ନ ଡ଼ାକିବା, ବିବାହ ଓ ବ୍ରତରେ ନ ଡାକିବାକୁ ନିଷ୍ପତ୍ତି ନେଇଥିଲେ। ଏହାପରେ ପୂର୍ବତନ ସରପଞ୍ଚ ଶିବ ପ୍ରସାଦ ଅଗ୍ରୱାଲ ଓ ଯୁଧିଷ୍ଠୀର ଜାନୀଙ୍କ ନିକଟରେ ଉଭୟ ଗ୍ରାମବାସୀ ଏବଂ ଧର୍ମ ପରିବର୍ତ୍ତନ କରିଥିବା ପରିବାର ସମଧାନ ଲାଗି ପହଞ୍ଚତ୍ ଥିଲେ। ଏ ନେଇ ଏକ ବୈଠକ ହୋଇଥିଲା। ମୂଳ ଧର୍ମକୁ ଫେରିବା ଲାଗି ବୈଠକରେ ଧର୍ମ ପରିବର୍ତ୍ତନ କରିଥିବା ପରିବାର ଲୋକେ କହିଥିଲେ। ପରମ୍ପରା ଅନୁଯାଇ ଧର୍ମ ପରିବର୍ତନ ପରେ ମୂଳ ଧର୍ମକୁ ଫେରିବା ଲାଗି ଯେଉଁ ନୀତି ନିୟମ ରହିଛି ତାହାକୁ ମାନିବା ଲାଗି ଗ୍ରାମବାସୀ କହିଥିଲେ। ଜାନୁଆରୀ କିମ୍ବା ଫେବୃଆରୀ ମାସରେ ଧର୍ମ ପରିବର୍ତ୍ତନ କରିଥିବା ପରିବାର ନୀତି ନିୟମ ପ୍ରକାରେ ଗ୍ରାମବାସୀଙ୍କ ଦାବି ପୂର୍ଣ୍ଣ କରିବେ ବୋଲି ପ୍ରତିଶ୍ରୁତି ଦେଇଛନ୍ତି। ମୂଳ ଧର୍ମକୁ ଫେରି ଖୁସି ଅଛନ୍ତି ବୋଲି ସେମାନେ କହିଛନ୍ତି। ବୈଠକରେ ପରଜା ସମାଜ ବ୍ଲକ ସଭାପତି ନରସିଂହ ଜାନୀ, ଚୈତନ୍ୟ ଜାନୀ, ଗୋଦାଧର ଜାନୀ, ଲଖମଣ ଜାନୀ, ଦୁଲବ ଜାନୀ, ଗୋବିନ୍ଦ ଜାନୀ, ସୋମନାଥ ଜାନୀ, ସନ୍ୟାସୀ ଜାନୀ, ପର୍ଶୁ ଜାନୀ, ହୀରାଧର ଜାନୀଙ୍କ ସହ ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ। ଏନେଇ ଗ୍ରାମବାସୀ ଓ ମୂଳ ଧର୍ମକୁ ଫେରିଥିବା ପରିବାର ରାଜିନାମା ଲେଖି ସ୍ବାକ୍ଷର କରିଛନ୍ତି।
