କୁଆଲାମ୍ପୁର, ୨୩।୮ : ମାଲେସିଆର ପୂର୍ବତନ ପ୍ରଧାନମନ୍ତ୍ରୀ ନଜୀବ ରଜାକଙ୍କୁ ଦେଶର ସର୍ବୋଚ୍ଚ ନ୍ୟାୟାଳୟ ବଡ଼ ଝଟ୍କା ଦେଇଛନ୍ତି। ରାଜ୍ୟ ପାଣ୍ଠିରୁ ଲୁଟ ସମ୍ପର୍କିତ ମାମଲାରେ କୋର୍ଟ ରଜାକଙ୍କୁ ୧୨ ବର୍ଷର ଜେଲ ଦଣ୍ଡାଦେଶ ନିର୍ଦ୍ଦେଶ ଦେଇଛନ୍ତି। ନ୍ୟୁଜ ଏଜେନ୍ସି ଏପି ଏହି ସୂଚନା ଦେଇଛି।
ନଜୀବଙ୍କ ଶେଷ ଆବେଦନ କୋର୍ଟରେ ଖାରଜ ହୋଇଛି। କୋର୍ଟଙ୍କ ନିର୍ଦ୍ଦେଶ ଅନୁସାରେ ସେ ତୁରନ୍ତ ଜେଳ ଦଣ୍ଡ ଭୋଗିବା ଆରମ୍ଭ କରିବେ। ଏହା ସହ ସେ ଦେଶର ପ୍ରଥମ ପୂର୍ବତନ ପ୍ରଧାନମନ୍ତ୍ରୀ ଯିଏ କି ଜେଲ ଯିବେ। ଫେଡେରାଲ କୋର୍ଟର ଏକ ପାଞ୍ଚ ଜଣିଆ ଖଣ୍ଡପୀଠ କହିଛନ୍ତି କୋର୍ଟର ବିଚାରପତି ସଠିକ ରାୟ ଦେଇଛନ୍ତି ଏବଂ ନଜୀବଙ୍କ ଆବେଦନରେ କୌଣସି ଉପଯୁକ୍ତ ସ୍ଥିତି ନାହିଁ। ନଜୀବଙ୍କ ଦୋଷ ଏବଂ ଦଣ୍ଡକୁ କୋର୍ଟ ନିଶ୍ଚିତ କରିଛନ୍ତି।
୨୦୦୯ରେ କ୍ଷମତାକୁ ଆସିବା ପରେ ନଜୀବଙ୍କ ଦ୍ୱାରା ୧-ଏମଡିବି(ମାଲେସିଆ ଡେଭଲପମେଣ୍ଟ ବେରହାଡ୍)ର ବିକାଶ ପାଣ୍ଠି ଗଠନ କରାଯାଇଥିଲା। ଯାଞ୍ଚ ବେଳେ ଏହା ଜଣାପଡିଥିଲା ଯେ ତତ୍କାଳୀନ ପ୍ରଧାନମନ୍ତ୍ରୀ ନଜୀବ ଏବଂ ତାଙ୍କ ସହଯୋଗୀମାନେ ଗଠନ କରିଥିବା ପାଣ୍ଠିରୁ ଅତି କମରେ ୪୫୦ କୋଟି ଡଲାର ଚୋରି ହୋଇଥିଲା। ଏହି ଦୁର୍ନୀତିର ତଦନ୍ତ ଆମେରିକା ଏବଂ ଅନ୍ୟାନ୍ୟ ଦେଶରେ ଆରମ୍ଭ କରା ଯାଇଥିଲା । ଏହି ଦୁର୍ନୀତି ଯୋଗୁ ୨୦୧୮ ନିର୍ବାଚନରେ ନଜୀବ ସରକାରଙ୍କ ପତନ ଘଟିଥିଲା।
