ସାମାଜିକ କାର୍ଯ୍ୟକର୍ତ୍ତା, ମାନବସେବାକୁ ବ୍ରତ କରି ନିଜ ଜୀବନକୁ ବାଜି ଲଗାଉଥିବା ଅଥବା ଜୀବନବଳି ଦେଇଥିବା ଲୋକଙ୍କ ପାଇଁ ଉତ୍ସର୍ଗୀକୃତ ଦିନଟିଏ ଅଗଷ୍ଟ ୧୯। ଏହି ଦିନ ସାରା ବିଶ୍ୱ ମାନବିକତା ଦିବସ ପାଳିଥାଏ। ସମ୍ପ୍ରତି ବିଶ୍ୱ କରୋନା, ମଙ୍କିପକ୍ସ ଭଳି ଭୂତାଣୁ କବଳରେ ପଡ଼ିଥିବାବେଳେ ଯୁଦ୍ଧ ସଙ୍କଟର ସାମ୍ନା କରୁଛି। ଏଭଳି ସମୟରେ ମଧ୍ୟ ସାମାଜିକକର୍ମୀ ଏବଂ ଅନ୍ୟମାନେ ମାନବସେବାରେ ନିଜକୁ ନିୟୋଜିତ କରିଛନ୍ତି। ୨୦୦୩ ଅଗଷ୍ଟ ୧୯ରେ ଇରାକ୍ର ବାଗ୍ଦାଦସ୍ଥିତ କାନାଲ ହୋଟେଲରେ ବୋମାମାଡ଼ ଯୋଗୁ ପ୍ରାଣ ହରାଇଥିବା ୨୨ ଜଣଙ୍କ ସ୍ମୃତିରେ ପ୍ରଥମେ ମାନବିକତା ଦିବସ ପାଳନ ହୋଇଥିଲା। ୨୦୦୯ରେ ଜାତିସଂଘ ପକ୍ଷରୁ ବିଧିବଦ୍ଧ ଭାବେ ମାନବିକତା ଦିବସ ପାଳନ ନିମନ୍ତେ ସ୍ଥିର କରାଯାଇଥିଲା। ଚଳିତ ବର୍ଷ ଡିଜିଟାଲ ଆର୍ଟ ଦ୍ୱାରା ସହାୟତା କର୍ମୀଙ୍କୁ ସମ୍ମାନିତ କରିବା ପାଇଁ ଜାତିସଂଘ ପକ୍ଷରୁ ସ୍ଥିର କରାଯାଇଛି। ଏହା ମାଧ୍ୟମରେ ଆବଶ୍ୟକ ସମୟରେ ଲୋକଙ୍କୁ ସହୟତା କରିଥିବା ବ୍ୟକ୍ତିବିଶେଷ ଏବଂ ସେହି ବ୍ୟକ୍ତିଙ୍କୁ ସହଯୋଗର ହାତ ବଢ଼ାଇଥିବା ଲୋକଙ୍କ କାହାଣୀ ଜନସାଧାରଣଙ୍କୁ ଜଣାଯିବ।
