ପ୍ରତ୍ୟେକ ବ୍ୟକ୍ତିଙ୍କ କିଛି ନା କିଛି ନାମ ରହିଛି। ଏହି ନାମ ତାଙ୍କୁ ଅନ୍ୟ ନିକଟରେ ପରିଚିତ କରାଇଥାଏ। ଯେତେବେଳେ ଘରକୁ ଶିଶୁଟିଏ ଆସିଥାଏ ତାହାର ନାମକରଣରେ ପରିବାରର ସମସ୍ତ ସଦସ୍ୟ ଲାଗିପଡ଼ିଥାନ୍ତି। ବେଳେବେଳେ ନାମ ଚୟନରେ ବହୁ ଅସୁବିଧା ମଧ୍ୟ ହୋଇଥାଏ। ତେବେ ପିଲାର ନାମ ଚୟନ ବେଳେ କେଉଁ ସବୁ କଥାପ୍ରତି ଧ୍ୟାନ ଦେବା ଉଚିତ ଜାଣିବା ସେ ବିଷୟରେ।
ପରମ୍ପରା ଉପରେ ଗୁରୁତ୍ୱ: ମା’ବାପା ସବୁବେଳେ ନିଜ ପିଲାର ଭିନ୍ନ ପ୍ରକାରର ନାମ ରଖିବାକୁ ଚାହିଁଥାନ୍ତି। ମାତ୍ର ଘରର ବୟୋଜ୍ୟେଷ୍ଠମାନେ ତାହାକୁ ସ୍ବୀକୃତି ଦେଇ ନ ଥାନ୍ତି। ଏମିତି ପରିସ୍ଥିତିରେ ନିଜ ଧର୍ମ, ସଂସ୍କୃତି, ପରମ୍ପରାକୁ ଧ୍ୟାନରେ ରଖି କୌଣସି ନାମ ରଖିପାରିବେ।
ନାମର ଅର୍ଥ ଥିବା ଉଚିତ: ପିଲାର ଏମିତି ନାମକରଣ କରନ୍ତୁ, ଯାହାର ଉଚିତ ଅର୍ଥ ରହିଥିବା ଆବଶ୍ୟକ। କୌଣସି ଅର୍ଥ ନ ଥିବା ନାମ ଦ୍ୱାରା ପିଲା ବଡ଼ ହେବା ପରେ ଏହାର ଖରାପ ପ୍ରଭାବ ତା’ ଉପରେ ପଡ଼ିଥାଏ। ତେଣୁ ଯେକୌଣସି ବି ନାମ ରଖନ୍ତୁ ତାହାର ଉଚିତ ଅର୍ଥ ଜାଣିଥିବା ଦରକାର।
ସାଥୀଙ୍କ ସହମତିରେ ନାମ ରଖନ୍ତୁ: ଶିଶୁର ନାମକରଣ ପୂର୍ବରୁ ସାଥୀଙ୍କ ସହ ଏ ନେଇ କଥା ହୁଅନ୍ତୁ। ପ୍ରଥମେ କେତେଗୁଡିଏ ନାମର ଏକ ତାଲିକା ପ୍ରସ୍ତୁତ କରନ୍ତୁ। ସେଥିମଧ୍ୟରେ ପିଲାର ବ୍ୟକ୍ତିତ୍ୱ ପାଇଁ କେଉଁ ନାମ ଠିକ୍ ରହିବ ତାହା ଚିନ୍ତା କରନ୍ତୁ।
ଅନ୍ଲାଇନରୁ ନାମ ଚୟନ: ବର୍ତ୍ତମାନ ସମୟରେ ବହୁତଗୁଡ଼ିଏ ଓ୍ବେବ୍ସାଇଟ୍ ଆସିଲାଣି। ସେଥିରୁ ଆପଣ ମନପସନ୍ଦର ନାମ ଚୟନ କରିପାରିବେ। ଓ୍ବେବ୍ସାଇଟ୍ରୁ ଆପଣଙ୍କୁ ଧର୍ମ ଓ ସଂସ୍କୃତି ସହ ଜଡିତ ଅନେକ ନାମ ମିଳିପାରିବ। ଏଥିରୁ ନାମର ଅର୍ଥ, ମହତ୍ତ୍ୱ ବିଷୟରେ ଆପଣ ଜାଣିପାରିବେ।
