ନୂଆଦିଲ୍ଲୀ,୨୩।୫: ବଲିଉଡ୍ ସୁପରଷ୍ଟାର ଅମିର ଖାନ୍ଙ୍କୁ ଆଇପିଏଲ୍ରେ କିଣିବାକୁ ରାଜି ହୋଇଛି ରାଜସ୍ଥାନ ରୟାଲ୍ସ। ପ୍ରଥମ ସିଜନ ଚାମ୍ପିୟନ ‘ମିଃ ପରଫେକ୍ଶନିଷ୍ଟ’ଙ୍କ କ୍ରିକେଟିଂ ଦକ୍ଷତା ଉପରେ ବିଶ୍ୱାସ ଦେଖାଇବା ସହିତ ଆଗାମୀ ସିଜନରେ ଚୂଡ଼ାନ୍ତ ଏକାଦଶରେ ସାମିଲ କରିବାକୁ ଇଚ୍ଛା ପ୍ରକଟ କରିଥିଲା।
ଅମିର ଖାନ୍ ଏବଂ ଷ୍ଟାର ସ୍ପୋଟର୍ସ ବିଶେଷଜ୍ଞଙ୍କ ମଧ୍ୟରେ ଚାଲିଥିବା ଥଟ୍ଟା ଆଲୋଚନାରେ ସାମିଲ ହୋଇ ରାଜସ୍ଥାନ ରୟାଲ୍ସ ସୋସିଆଲ ମିଡିଆରେ ଏକ ପୋଷ୍ଟ ଶେୟାର କରିଥିଲା, ଯେଉଁଥିରେ ଅଭିନେତାଙ୍କୁ ସେମାନଙ୍କ ଚୂଡ଼ାନ୍ତ ଏକାଦଶରେ ସାମିଲ କରାଯିବ ବୋଲି ଦାବି କରାଯାଇଥିଲା। ଆଇପିଏଲ୍ ଫ୍ରାଞ୍ଚାଇଜ୍ ପକ୍ଷରୁ ଅମିରଙ୍କ ଆଇକନିକ୍ ଫିଲ୍ମ ‘ଲଗାନ’ର ଏକ ଏଡିଟେଡ୍ ଫଟୋକୁ ଟୁଇଟର ହ୍ୟାଣ୍ଡେଲରେ ଶେୟାର କରାଯବା ସହ କ୍ୟାପ୍ଶନ୍ରେ ‘ଅମିର ଖେଲେଗା’ ଉଲ୍ଲେଖ କରାଯାଇଥିଲା। ଏହାର ପ୍ରତି ଉତ୍ତରରେ ଏକ ଭିଡିଓ ଜରିଆରେ ଅମିର ଫ୍ରାଞ୍ଚାଇଜ୍କୁ ଧନ୍ୟବାଦ ଦେଇଥିଲେ। ‘ମୋ ଉପରେ ବିଶ୍ୱାସ ରଖିବା ପାଇଁ ଏବଂ ଦଳୀୟ ଏକାଦଶରେ ସ୍ଥାନ ଦେବାର ପ୍ରସ୍ତାବ ଲାଗି ରାଜସ୍ଥାନ ରୟାଲ୍ସକୁ ଧନ୍ୟବାଦ। ଏହା ମୋ ହୃଦୟକୁ ଛୁଇଁଛି। କିନ୍ତୁ ବଡ଼କଥା ହେଲା, ତୁମ ଦଳ ଚଳିତବର୍ଷ ଖୁବ୍ ଶକ୍ତିଶାଳୀ। ଯଦି ମୁଁ ଯୋଗଦିଏ, ତେବେ ତୁମେ ଅପରାଜେୟ ହୋଇଯିବ। ତୁମ ପାଖରେ ଅରେଞ୍ଜ କ୍ୟାପ୍ ଅଧିକାରୀ ଜୋସ୍ ବଟଲର ଓ ପର୍ପଲ କ୍ୟାପ୍କୁ ପିଛା କରୁଥିବା ୟୁଜ୍ବେନ୍ଦ୍ର ଚହଲ ଅଛନ୍ତି। କିନ୍ତୁ ମୁଁ ଜଣେ ଅଲ୍ରାଉଣ୍ଡର। ଯଦି ମୁଁ ଚଳିତ ବର୍ଷ ଖେଳେ, ତେବେ ଉଭୟ କ୍ୟାପ୍ ନେଇଯିବି। ଏଣୁ ମୁଁ ଆଗାମୀ ବର୍ଷ ଦଳରେ ଯୋଗଦେବି ଏବଂ ଆମେ ଏକତ୍ରିତ ହୋଇ ନେଟ୍ସରେ ପ୍ରାକ୍ଟିସ କରିବା। ତୁମମାନଙ୍କୁ ଆଗାମୀ ପ୍ଲେଅଫ୍ ମ୍ୟାଚ୍ ପାଇଁ ଶୁଭକାମନା’ ବୋଲି ଅଭିନେତା ଜଣକ ପୋଷ୍ଟରେ କହିଛନ୍ତି।
