ବେଙ୍ଗାଲୁରୁ,୧୮ା୪: ଡେଭିଡ୍ ମିଲରଙ୍କ ବିସ୍ଫୋରକ ବ୍ୟାଟିଂ ବଳରେ ଦିଲ୍ଲୀ କ୍ୟାପିଟାଲ୍ସ (ଡିସି) ଶନିବାର ଖେଳାଯାଇଥିବା ଏକ ରୋମାଞ୍ଚକ ଆଇପିଏଲ୍ ମ୍ୟାଚ୍ରେ ୬ ଉଇକେଟରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆର୍ସିବି)କୁ ପରାସ୍ତ କରିଛି। ଏହା ଦିଲ୍ଲୀର ୫ ମ୍ୟାଚ୍ରେ ତୃତୀୟ ବିଜୟ ହୋଇଥିବା ବେଳେ ଆର୍ସିବି ଲାଗି ୬ ମ୍ୟାଚ୍ରେ ଏହା ଦ୍ୱିତୀୟ ପରାଜୟ। ଲୋକେଶ ରାହୁଲ ଶନିବାର ଅର୍ଦ୍ଧଶତକୀୟ ପାଳି ଖେଳି ତାଙ୍କର ୩୪ତମ ଜନ୍ମଦିନ ଓ ୧୫୦ତମ ଆଇପିଏଲ୍ ମ୍ୟାଚ୍କୁ ସ୍ମରଣୀୟ କରାଇଛନ୍ତି।
ଲାଗି କଷ୍ଟକର ପିଚ୍ରେ ପ୍ରଥମେ ବ୍ୟାଟିଂ କରିଥିବା ଆର୍ସିବି ନିର୍ଦ୍ଧାରିତ ୨୦ ଓଭରରେ ୮ ଉଇକେଟ ହରାଇ ୧୭୫ ରନ କରିଥିଲା। ଫିଲିପ୍ ସଲ୍ଟଙ୍କର ୩୮ ବଲରେ ୬୩ (୪ ଚୌକା ଓ ୩ ଛକା) ରନର ଅର୍ଦ୍ଧଶତକୀୟ ଇନିଂସ ଯୋଗୁ ଆର୍ସିବି ଏକଦା ୧୨.୩ ଓଭରରେ ୧୩୧/୩ ସ୍କୋର କରିଥିଲା। ହେଲେ ଶେଷ ଆଡ଼କୁ ଟିମ୍ ଡେଭିଡ୍ (୧୭ ବଲ, ୨୬ ରନ, ୩ ଚୌକା ଓ ୧ ଛକା)ଙ୍କୁ ଛାଡ଼ି ଦେଲେ ଅନ୍ୟ ସମସ୍ତ ବ୍ୟାଟର ସଂଘର୍ଷ କରିଥିଲେ। ଦିଲ୍ଲୀ ପାଇଁ ଅଧିନାୟକ ଅକ୍ଷର ପଟେଲ, ଲୁଙ୍ଗି ଏନ୍ଗିଡି ଓ କୁଲଦୀପ ଯାଦବ ୨ଟି ଲେଖାଏ ଉଇକେଟ ନେଇଥିଲେ। ଜବାବରେ ଭୁବନେଶ୍ୱର କୁମାରଙ୍କ ଘାତକ ବୋଲିଂ ଯୋଗୁ ଦିଲ୍ଲୀ ଆରମ୍ଭରୁ ୩ ଉଇକେଟ ହରାଇ ସଙ୍କଟରେ ପଡ଼ିଥିଲା।
ଦଳ ୧୮ ରନ ମଧ୍ୟରେ ୩ ଉଇକେଟ ହରାଇ ସଙ୍କଟରେ ଥିବା ବେଳେ ରାହୁଲ ତାଙ୍କର ୩୪ତମ ଜନ୍ମଦିନରେ ନିଜ ଘରୋଇ ଗ୍ରାଉଣ୍ଡରେ ୩୪ ବଲରେ ୫୭ (୬ ଚୌକା ଓ ୨ ଛକା) ରନର ଅର୍ଦ୍ଧଶତକୀୟ ଇନିଂସ ଖେଳିଥିଲେ। ଏଥିସହିତ ସେ ଟ୍ରିଷ୍ଟାନ ଷ୍ଟବ୍ସଙ୍କ ସହ ମିଶି ଚତୁର୍ଥ ଉଇକେଟରେ ୬୯ ରନ ଯୋଡ଼ିଥିଲେ। ଏହାପରେ ଷ୍ଟବ୍ସ ଓ ଅଧିନାୟକ ଅକ୍ଷରଙ୍କ ପଞ୍ଚମ ଉଇକେଟରେ ୩୪ ବଲରେ ୪୭ ରନ ଯୋଡ଼ିଥିଲେ। ହେଲେ ଅତ୍ୟଧିକ ଗରମ ପରିବେଶ କାରଣରୁ ଅକ୍ଷର (୧୯ ବଲ, ୨୬ ରନ, ୩ ଚୌକା) ବାରମ୍ବାର କ୍ରାମ୍ପର ସମ୍ମୁଖୀନ ହୋଇ ରିଟାୟର୍ଡ ହର୍ଟ ହୋଇ ପାଭିଲିଅନ ଫେରିଯାଇଥିଲେ। ତାଙ୍କ ସ୍ଥାନରେ ଆସିଥିବା ଡେଭିଡ୍ ମିଲର ଓ ଷ୍ଟବ୍ସ ଦଳକୁ ଜିତାଇଥିଲେ। ଦିଲ୍ଲୀକୁ ଜିତିବା ପାଇଁ ଅନ୍ତିମ ଓଭରରେ ୧୫ ରନ ଆବଶ୍ୟକ ଥିଲା ବେଳେ ରୋମାରିଓ ଶେଫର୍ଡଙ୍କ ଓଭରର ପ୍ରଥମ ଦୁଇ ବଲରେ ମିଲର ଓ ଟ୍ରିଷ୍ଟାନ ଷ୍ଟବ୍ସ ଗୋଟିଏ ଲେଖାଏ ସିଙ୍ଗଲ ନେଇଥିଲେ। ଏହାପରେ ମିଲର ଲଗାତର ଦୁଇଟି ଛକା ଓ ଚୌକା ମାରି ମ୍ୟାଚ୍ ଫିନିଶ୍ କରିଥିଲେ। ଫଳରେ ଦିଲ୍ଲୀ ୧୯.୫ ଓଭରରେ ୪ ଉଇକେଟ ହରାଇ ୧୭୯ ରନ କରିଥିଲା। ଷ୍ଟବ୍ସ ୪୭ ବଲରେ ୬୦ (୪ ଚୌକା ଓ ୧ ଛକା) ଓ ମିଲର ୧୦ ବଲରେ ୨୨ (୧ ଚୌକା ଓ ୨ ଛକା) ରନ୍ କରି ନଟ୍ ଆଉଟ୍ ରହିଥିଲେ।
