ଓ୍ବାଶିଂଟନ୍,୧୩।୪: ୟୁକ୍ରେନ ଓ ରୁଷିଆ ମଧ୍ୟରେ ଯୁଦ୍ଧ ଜାରି ରହିଛି। ଇତିମଧ୍ୟରେ ଏକ ଆଶ୍ୱସ୍ତି ଖବର ସାମ୍ନାକୁ ଆସିଛି। ଖୁବ୍ଶୀଘ୍ର ୟୁକ୍ରେନକୁ ୭୫୦ ମିଲିୟନ ଡଲାର ସାମରିକ ସହାୟତା ଘୋଷଣା କରିପାରେ ଆମେରିକା। ଆମେରିକାର ଜଣେ ଅଧିକାରୀ ଏନେଇ ସୂଚନା ଦେଇଛନ୍ତି। ସୂଚନାଯୋଗ୍ୟ, ୱାଶିଂଟନ ପୋଷ୍ଟ ଅଧିକାରୀଙ୍କ ଉଦ୍ଦେଶ୍ୟରେ କହିଛି ଯେ, ୟୁକ୍ରେନକୁ ଦିଆଯାଉଥିବା ଅସ୍ତ୍ରଶସ୍ତ୍ରର ପରିସରକୁ ବିସ୍ତାର କରିବା ଲାଗି ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ ପ୍ରଶାସନ ପ୍ରସ୍ତୁତ ରହିଛି। ତେବେ ଅଧିକାରୀଙ୍କ ଅନୁଯାୟୀ, ସେମାନଙ୍କର ପ୍ରାଥମିକ ଯୋଜନାରେ ରାସାୟନିକ, ଜୈବିକ କିମ୍ବା ଆଣବିକ ଆକ୍ରମଣ ଘଟଣାରେ କର୍ମଚାରୀଙ୍କୁ ସୁରକ୍ଷା ଦେବା ପାଇଁ ହୋଓ୍ବଜର ତୋପ, ଉପକୂଳ ପ୍ରତିରକ୍ଷା ଡ୍ରୋନ ଏବଂ ପ୍ରତିରକ୍ଷା ସୁଟ ସାମିଲ କରାଯିବ। ହେଲେ ଏପର୍ଯ୍ୟନ୍ତ ସୁନିଶ୍ଚିତ ହୋଇନାହିଁ ଯେ, ଏହି ସମସ୍ତ ସାମଗ୍ରୀ ଚୂଡ଼ାନ୍ତ ପ୍ୟାକେଜରେ ସାମିଲ କରାଯିବ କି ନାହିଁ।
