ଧର୍ମଶାଳା,୨୭।୨: ଭାରତ ଏବଂ ଶ୍ରୀଲଙ୍କା ମଧ୍ୟରେ ତିନି ମ୍ୟାଚ ଟି -୨୦ ସିରିଜର ଦ୍ୱିତୀୟ ମ୍ୟାଚରେ ଟିମ ଇଣ୍ଡିଆ ଶ୍ରୀଲଙ୍କାକୁ ୭ ଉଇକେଟ୍ରେ ପରାସ୍ତ କରିଛି। ପ୍ରଥମେ ବ୍ୟାଟିଂ କରି ଶ୍ରୀଲଙ୍କା ୨୦ ଓଭରରେ ୫ ଉଇକେଟ ହରାଇ ୧୮୩ ରନ ସଂଗ୍ରହ କରିଥିଲା। ଏହାର ଜବାବରେ ଭାରତ ତିନି ଉଇକେଟ ହରାଇ ୧୭.୧ ଓଭରରେ ଟାର୍ଗେଟ ହାସଲ କରିଥିଲା। ଶ୍ରେୟାସ ଆୟର ୪୪ ବଲରୁ ୭୪ ରନର ଅପରାଜିତ ଇନିଂସ ଖେଳିଥିଲେ।
ମ୍ୟାଚ ସମୟରେ ଭାରତୀୟ ଖେଳାଳିମାନେ ପଡ଼ିଆରେ ମଜା କରୁଥିବା ଦେଖିବାକୁ ମିଳିଥିଲା। ମ୍ୟାଚ ସମୟରେ ରୋହିତ ଶର୍ମାଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ବିସିସିଆଇ ମଧ୍ୟ ଏହାକୁ ଶେୟାର କରିଛି। ୧୫ ସେକେଣ୍ଡର ଭିଡିଓରେ ଅଧିନାୟକ ରୋହିତ ଶର୍ମା ଧର୍ମଶାଳାର ଶୀତଦିନେ କଫି ପିଉଥିବାର ନଜର ଆସିଛନ୍ତି। ଏହି ସମୟରେ, କ୍ୟାମେରାମ୍ୟାନ ସେମାନଙ୍କ ଉପରେ ଫୋକସ୍ ଦିଅନ୍ତି। କ୍ୟାମେରାକୁ ଦେଖିବା ମାତ୍ରେ ରୋହିତ କମେଣ୍ଟେଟର୍ ଏବଂ କ୍ୟାମେରାମ୍ୟାନଙ୍କୁ କଫି ଅଫ୍ୟର୍ କରୁଥିବାର ଦେଖାଯାଏ। ଏହା ପରେ, ଶେଷରେ ରୋହିତ ହସିବା ଆରମ୍ଭ କରି ପୁଣି କଫି ପିଅନ୍ତି।
