ଦିଗପହଣ୍ଡି,୧୩।୨(ଡି.ଏନ.ଏ.): ଗଞ୍ଜାମ ଜିଲା ପାଟପୁର ଥାନା ଇଲାକାରେ ଚାଲିଥିବା ନକଲି ମାୱା ମସଲା ଏବଂ ଗୁଟ୍ଖା କାରଖାନା ଉପରେ ଶୁକ୍ରବାର ରାତିରେ ପୋଲିସ ଚଢ଼ାଉ କରି ବିପୁଳ ପରିମାଣର ମାଦକ ସାମଗ୍ରୀ ଜବତ କରିଛି। ଏହି ଘଟଣାରେ ଶେରଗଡ଼ ଥାନା କୁରୁଳା ଗ୍ରାମର ଶିବଶଙ୍କର ପଣ୍ଡିତଙ୍କୁ ପୋଲିସ ଶନିବାର କୋର୍ଟ ଚାଲାଣ କରିଛି। ଜାମିନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବ୍ ଜେଲ ହାଜତକୁ ପଠାଯାଇଛି। ଉକ୍ତ କାରଖାନାରେ ବେଆଇନ ଭାବେ ତମାଖୁରୁ ପ୍ରସ୍ତୁତ ମାୱା ମସଲା ଓ ଗୁଟ୍ଖାକୁ ବିଭିନ୍ନ ନାମୀଦାମୀ କମ୍ପାନୀର ନକଲି ଲେବୁଲ ଲଗାଇ ଗ୍ରାମାଞ୍ଚଳରେ ବିକ୍ରି କରାଯାଉଥିଲା। ପାଟପୁର ପୋଲିସ ରାତିରେ ଡେଙ୍ଗାଉସ୍ତା ଗ୍ରାମରେ ପାଟ୍ରୋଲିଂ କରୁଥିବା ସମୟରେ ଏକ ଗୁଟ୍ଖା ବୋଝେଇ ଗାଡ଼ିକୁ ସନ୍ଦେହ କରି ଅଟକ ରଖିଥିଲା। ପଚରାଉଚୁରା କରିବା ପରେ ଏସ.ଟିକରପଡ଼ା ଗ୍ରାମ ଗଣେଶନଗରଠାରେ ଏକ ଘରେ ବେଆଇନ ଭାବେ ମାୱା ମସଲା ଓ ଗୁଟ୍ଖା ପ୍ରସ୍ତୁତ କାରଖାନା ଚାଲିଥିବା ସୂଚନା ମିଳିଥିଲା। ପୋଲିସ ଟିମ୍ ସେଠାରେ ଚଢାଉ କରି ମାୱା ମସଲା ପ୍ରସ୍ତୁତ ମେଶିନ, ମୋଟର ସମେତ ବିପୁଳ ପରିମାଣର ତମାଖୁ, ପାନମହୁରି, ଗୁଣ୍ଡଗୁଆ, ଧନିଆ, ଗୁଟ୍ଖାରେ ମିଶ୍ରଣ ପାଇଁ ପ୍ରସ୍ତୁତ ପାଉଡର, ୫୫୫ ଲେଖାଥିବା ବିପୁଳ ପରିମାଣର ଲେବୁଲ୍ ଆଦି ଜବତ କରିଥିଲା। ଏ ନେଇ ପାଟପୁର ଥାନା ନଂ. ୫୦/୨୨ ଅନୁଯାୟୀ ମାମଲା ରୁଜୁ କରାଯାଇଛି। ଦୀର୍ଘଦିନ ହେଲା ଏହି ବେଆଇନ କାରଖାନା ଚଳାଇଥିବା ଶିବଶଙ୍କରଙ୍କୁ ପୋଲିସ ଗିରଫ କରିଥିଲା ବୋଲି ପାଟପୁର ଥାନାରେ ଆୟୋଜିତ ଖବରଦାତା ସମ୍ମିଳନୀରେ ଆସିକା ଏସ୍ଡିପିଓ ଉମାଶଙ୍କର ସିଂ ପ୍ରକାଶ କରିଛନ୍ତି।
