ସାକ୍ଷୀଗୋପାଳ,୧୮।୧୧(ଡି.ଏନ୍.ଏ.): ସାକ୍ଷୀଗୋପାଳ ଷ୍ଟେଟ ବ୍ୟାଙ୍କରେ ଗୁରୁବାର ଅଗ୍ନିକାଣ୍ଡ ଘଟିଛି। ବ୍ୟାଙ୍କର ଉପର ମହଲାରେ ଥିବା ରୋଷେଇ ଘରେ ବ୍ୟବହୃତ ଗ୍ୟାସ୍ ଲିକ୍ ହେବା ଯୋଗୁ ନିଆଁ ଲାଗିଯାଇଥିଲା। ପରେ ଏହି ନିଆଁ ବ୍ୟାଙ୍କର ସମସ୍ତ ରୁମ୍କୁ ବ୍ୟାପି ଯାଇଥିଲା। କର୍ମଚାରୀମାନେ ଭୟଭୀତ ହୋଇ ବାହାରକୁ ଚାଲି ଆସିଥିଲେ। ଏନେଇ ସାକ୍ଷୀଗୋପଳ ଅଗ୍ନିଶମ ବିଭାଗକୁ ଖବର ଦେବାରେ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି। ଏହି ଅଗ୍ନିକାଣ୍ଡରେ ବ୍ୟାଙ୍କ ମ୍ୟାନେଜର ସନ୍ତୋଷ କୁମାର ବେହେରାଙ୍କ ସହ ଜଣେ ଅଗ୍ନିଶମ କର୍ମଚାରୀ ମାନସ ବିଶ୍ୱାଳ ଆହତ ହୋଇଛନ୍ତି। ଚିକିତ୍ସା ପାଇଁ ଉଭୟଙ୍କୁ ସ୍ଥାନୀୟ ସାକ୍ଷୀଗୋପାଳ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି ।
ସକାଳେ ସବୁଦିନ ପରି ବ୍ୟାଙ୍କକାର୍ଯ୍ୟ ଆରମ୍ଭ ହୋଇଥିଲା। ଏହାପରେ ଅଗ୍ନିକାଣ୍ଡ ଘଟିଥିବା ଯୋଗୁ ବଡ଼ ଧରଣର ଅଘଟଣ ଘଟିବା ନେଇ ଆଶଙ୍କା ଦେଖାଦେଇଥିଲା। ଚାରିଆଡେ ନିଆଁ ଲାଗିଯାଇଥିବା ଯୋଗୁ ଅଗ୍ନିଶମ କର୍ମଚାରୀ ବ୍ୟାଙ୍କ ଉପର ମହଲା କାଚକୁ ଭାଙ୍ଗି ନିଆଁ ଲିଭାଇବାକୁ ଚେଷ୍ଟା କରିଥିଲେ। ଏହି ଅଗ୍ନିକାଣ୍ଡରେ ବ୍ୟାଙ୍କର ଡାଇନିଂ ଏବଂ ଗୋଟିଏ ଫ୍ରିଜ୍ ପୋଡି ଯାଇଛି। ଅନ୍ୟାନ୍ୟ ସାମଗ୍ରୀ ସୁରକ୍ଷିତ ରହିଛି। ପରିସ୍ଥିତିକୁ ଦେଖି ବ୍ୟାଙ୍କକୁ ବନ୍ଦ ରଖାଯାଇଛି ।
