ଟୋକିଓ,୧୧।୧୧: ଭାରତରେ ଟ୍ରେନ୍ ବିଳମ୍ବ ହେବା ସାଧାରଣ କଥା, କିନ୍ତୁ ଦୁନିଆରେ ଏପରି ଅନେକ ଦେଶ ଅଛି, ଯେଉଁଠାରେ ଟ୍ରେନ ଠିକ ସମୟରେ ଚଳାଚଳ କରିଥାଏ। ଟିକେ ବିଳମ୍ବ ହେଲେ ଜରିମାନା ଦେବାକୁ ପଡେ। ଜାପାନ ଏହି ପ୍ରସଙ୍ଗରେ ଶୀର୍ଷରେ ରହିଛି। ଜାପାନର ଟ୍ରେନ ଗୁଡିକ ଏକ ମିନିଟ ପାଇଁ ମଧ୍ୟ ବିଳମ୍ବ ହୁଏ ନାହିଁ ଏବଂ ଯଦି ଏହା ଘଟେ ତେବେ ସେଠାରେ ହଙ୍ଗାମା ସୃଷ୍ଟି ହୁଏ। ନିକଟରେ ଜାପାନରେ ମଧ୍ୟ ଏଭଳି ଘଟଣା ସାମ୍ନାକୁ ଆସିଛି। ଡ୍ରାଇଭରଙ୍କ ଭୁଲ ହେତୁ ଟ୍ରେନ ପ୍ରାୟ ଏକ ମିନିଟ ବିଳମ୍ବ ହୋଇଥିଲା ଏବଂ ତା’ପରେ ରେଳବାଇ ଡ୍ରାଇଭରଙ୍କ ବେତନରୁ ୫୬ ୟେନ ଅର୍ଥାତ୍ ପ୍ରାୟ ୩୬ ଟଙ୍କା କାଟିବାକୁ ନିର୍ଦ୍ଦେଶ ଦେଇଥିଲା।
ଜାପାନ ରେଳବାଇର ଏହି ଆଦେଶ ପରେ ଟ୍ରେନ ଡ୍ରାଇଭର ଏବେ କୋର୍ଟରେ ପହଞ୍ଚି ୨.୨ ମିଲିୟନ ୟେନ ଅର୍ଥାତ୍ ପ୍ରାୟ ୧୪.୩୭ଲକ୍ଷ ଟଙ୍କା କ୍ଷତିପୂରଣ ଦାବି କରିଛି। ଡ୍ରାଇଭର ତାଙ୍କ ଓଭରଟାଇମ ଡ୍ୟୁଟି, ମାନସିକ ଯନ୍ତ୍ରଣା, ଚାକିରିରେ ସମସ୍ୟା ଇତ୍ୟାଦି ଦର୍ଶାଇ ଜାପାନ ରେଳବାଇରୁ ୧୪ ଲକ୍ଷ ଟଙ୍କା କ୍ଷତିପୂରଣ ଦାବି କରିଛି।
ଗତ ବର୍ଷ ଜୁନ ୧୮ରେ ଡ୍ରାଇଭର ଓକାୟାମା ଷ୍ଟେଶନରେ ଏକ ଖାଲି ଟ୍ରେନ ନେବାକୁ ନେବାକୁ ଯାଇଥିଲେ, କିନ୍ତୁ ହଠାତ୍ ତାଙ୍କ ପେଟରେ ଯନ୍ତ୍ରଣା ଆରମ୍ଭ ହୋଇ ବାଥରୁମକୁ ଯିବାକୁ ପଡିଥିଲା। ସେ ଏହି ଚାର୍ଜକୁ ତାଙ୍କ ଜୁନିଅର ଡ୍ରାଇଭରକୁ ଦେଇଥିଲେ, କିନ୍ତୁ ସେ ଟ୍ରେନକୁ ଭୁଲ ପ୍ଲାଟଫର୍ମରେ ଚଲାଇଥିଲେ ଏବଂ ଏହି କାରଣରୁ ଟ୍ରେନଟି ଗୋଟିଏ ମିନିଟ ବିଳମ୍ବ ହୋଇଥିଲା। ଏହା ପରେ ପଶ୍ଚିମ ଜାପାନ ରେଳ କମ୍ପାନୀ କାର୍ଯ୍ୟାନୁଷ୍ଠାନ ଗ୍ରହଣ କରି ଡ୍ରାଇଭର ବେତନରୁ ୮୫ ୟେନ ଅର୍ଥାତ୍ ପ୍ରାୟ ୫୫.୫୭ ଟଙ୍କା କାଟିବାକୁ ନିର୍ଦ୍ଦେଶ ଦେଇଥିଲା।
ଜାପାନ ରେଳବାଇର ନିଷ୍ପତ୍ତି ବିରୋଧରେ ଡ୍ରାଇଭର ଓକାୟାମା ଲେବର ଷ୍ଟାଣ୍ଡାର୍ଡ ଯାଞ୍ଚ କାର୍ଯ୍ୟାଳୟରେ ପହଞ୍ଚି ଜରିମାନା ହଟାଇବା ସହ କ୍ଷତିପୂରଣ ଦାବି କରିଛି। ତେବେ ରେଳବାଇ ଏହି କଟକଣାକୁ ସଠିକ ଦର୍ଶାଇ କହିଛି ଯେ ଏହି ସମୟ ମଧ୍ୟରେ କୌଣସି କାମ କରାଯାଇ ନାହିଁ। ତେବେ କମ୍ପାନୀ ଜରିମାନାକୁ ୫୬ ୟେନକୁ କିମ୍ବା ପ୍ରାୟ ୩୬ ଟଙ୍କାକୁ ହ୍ରାସ କରିଛି। ଏହା ପରେ ଡ୍ରାଇଭର ଓକାୟାମା ଜିଲା କୋର୍ଟରେ ପହଞ୍ଚି ଯୁକ୍ତି ବାଢିଥିଲେ ଯେ,ସେହି ସମୟରେ ଟ୍ରେନ ଖାଲି ଥିବାରୁ ଟ୍ରେନ ବିଳମ୍ବ ହେବା ତାଙ୍କ କାର୍ଯ୍ୟସୂଚୀ ଉପରେ ପ୍ରଭାବ ପକାଇ ନ ଥିଲା। ଏବେ ଏହି ମାମଲା କୋର୍ଟରେ ଚାଲିଛି।
