ଭୁବନେଶ୍ୱର,୧ା୧୧(ବ୍ୟୁରୋ): ରାଜଧାନୀ ଚନ୍ଦ୍ରଶେଖରପୁର ଥାନା ଶୈଳେଶ୍ରୀ ବିହାର ଅଞ୍ଚଳରେ ସୋମବାର ଜଣେ ଯୁବକ ଲେଡିସ୍ ପୋଷାକ ପିନ୍ଧି ପଡୋଶୀଙ୍କ ଘରେ ପଶି ମା’-ଝିଅଙ୍କୁ ଛୁରା ମାଡ କରିଛନ୍ତି। ପ୍ରତିଆକ୍ରମଣରେ ଯୁବକ ଜଣକ ମଧ୍ୟ ଆହତ ହୋଇଛନ୍ତି। ଆହତ ମା’ ଝିଅ ହେଲେ ଅନନ୍ୟା ମିଶ୍ର(୩୧) ଓ ସ୍ମୀତା ମିଶ୍ର(୬୫)। ଅଭିଯୁକ୍ତ ହେଲେ ପଡୋଶୀ ପରେଶ ପଣ୍ଡା। ସମସ୍ତଙ୍କୁ ପୋଲିସ ଉଦ୍ଧାର କରି ହସ୍ପିଟାଲ ପଠାଇଛି। ଆହତ ପରେଶ କ୍ୟାପିଟାଲ ହସ୍ପିଟାଲରେ ଓ ମା-ଝିଅଙ୍କୁ ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି। ପୋଲିସ ଏକ ଖେଳନା ବନ୍ଧୁକ ସହ ଛୁରୀକୁ ଜବତ କରି ତଦନ୍ତ ଆରମ୍ଭ କରିଛି।
ଏସିପି ପ୍ରକାଶ ଚନ୍ଦ୍ର ପାଲ କହିଛନ୍ତି, ଅଭିଯୁକ୍ତ ପରେଶ ତାଙ୍କ ପଡୋଶା ଘରେ ରହୁଥିବା ମା’ ଝିଅଙ୍କୁ ଛୁରୀରେ ଆକ୍ରମଣ କରିଥିଲେ। ହେଲେ କଣ ପାଇଁ ଆକ୍ରମଣ କଲେ ତାହାର କାରଣ ଜଣାପଡିନାହିଁ। ଉଭୟଙ୍କ ମଧ୍ୟରେ କଣ ସମ୍ପର୍କ ଅଛି ତାଙ୍କ ମୋବାଇଲର ସିଡିଆର୍ ଯାଞ୍ଚ କଲେ ଜଣାପଡିବ। ଏହି ଘଟଣାରେ ଅଧିକ ତଦନ୍ତ ହେଲେ ରହସ୍ୟ ଉପରୁ ପରଦା ଉଠିବ ବୋଲି ସେ କହିଛନ୍ତି।
