ମୁମ୍ବାଇ, ୨୮ା୧୦: ଗିରଫଦାରିରୁ ମୁକ୍ତି ପାଇବା ପାଇଁ ଏନ୍ସିବି ଆଞ୍ଚଳିକ ନିର୍ଦ୍ଦେଶକ ସମୀର ଓ୍ବାଙ୍ଖଡେ ବମ୍ବେ ହାଇକୋର୍ଟଙ୍କଠାରୁ ଅନ୍ତରୀଣ ସୁରକ୍ଷା ପାଇଁ କରିଥିବା ଆବେଦନ ଗୁରୁବାର ଖାରଜ ହୋଇଯାଇଛି। ଜବରଦସ୍ତି ବଟି ଆଦାୟ ଏବଂ ଦୁର୍ନୀତି ମାମଲାରେ ଗିରଫ କରିବାର ୩ ଦିନ ପୂର୍ବରୁ ମୁମ୍ବାଇ ପୋଲିସ ଓ୍ବାଙ୍ଖଡେଙ୍କୁ ନୋଟିସ ଦେବ ବୋଲି ହାଇକୋର୍ଟ କହିଛନ୍ତି।
ତାଙ୍କ ଉପରେ ଆକ୍ରମଣ ହେଉଥିବା ଏବଂ ଏ ଦିଗରେ ତଦନ୍ତକୁ ବିରୋଧ କରି ଓ୍ବାଙ୍ଖଡେ ଅଦାଲତଙ୍କଠାରେ ପିଟିଶନ ଦାଏର କରିଥିଲେ। ସେ ଜଣେ ଡ୍ରଗ୍ସ ବେପାରୀ ନୁହଁନ୍ତି। ଜଣେ ଜୋନାଲ ଡିରେକ୍ଟର। ତେଣୁ ତାଙ୍କୁ ଅପମାନିତ କରାଯିବା ବନ୍ଦ କରି ତଦନ୍ତ ଦାୟିତ୍ୱ ସିବିଆଇ କିମ୍ବା ଏନ୍ଆଇଏକୁ ଦିଆଯାଉ ବୋଲି ସେ ଦାବି କରିଥିଲେ। ତାଙ୍କ ଅଧିକାର ଉଲ୍ଲଂଘନ ହେବାର ଆଶଙ୍କା ରହିଥିବାରୁ କୋର୍ଟ ତାଙ୍କୁ ସୁରକ୍ଷା ଦେବା ଆବଶ୍ୟକ ବୋଲି ସେ କହିଥିଲେ।
