ନୂଆଦିଲ୍ଲୀ,୨୮।୯: ଜବାହାରଲାଲ ନେହେରୁ ବିଶ୍ୱବିଦ୍ୟାଳୟ(ଜେଏନ୍ୟୁ) ଛାତ୍ର ସଂଗଠନର ପୂର୍ବତନ ସଭାପତି ତଥା ସିପିଆଇ ନେତା କହ୍ନେୟା କୁମାର ମଙ୍ଗଳବାର କଂଗ୍ରେସରେ ଯୋଗ ଦେଇଛନ୍ତି। ଏହି ଅବସରରେ ସେ କହିଛନ୍ତି, କଂଗ୍ରେସ ଏକ ବଡ଼ ଜାହାଜ। ଏହାକୁ ବୁଡିଯିବାରୁ ରକ୍ଷା କରିବାକୁ ହେବ। କଂଗ୍ରେସ ନ ବଞ୍ଚିଲେ ଦେଶ ବଞ୍ଚିବ ନାହିଁ। କଂଗ୍ରେସ ବଞ୍ଚିଲେ ଯୁବପୀଢ଼ିର ସ୍ବପ୍ନ ବଞ୍ଚିବ। କାରଣ ବିରୋଧୀ ଦୁର୍ବଳ ହେଲେ ଦେଶରେ ଏକଛତ୍ରବାଦୀ ଶାସନ ଚାଲିଥାଏ। ମୁଁ କଂଗ୍ରେସରେ ଯୋଗ ଦେବାର କାରଣ, ଏହା କେବଳ ଏକ ଦଳ ନୁହେଁ, ଏହା ଏକ ଚିନ୍ତାଧାରା। ଏହା ଦେଶର ସର୍ବପୁରାତନ ତଥା ଗଣତାନ୍ତ୍ରିକ ଦଳ। ମୁଁ ଗଣତାନ୍ତ୍ରିକ ଉପରେ ଜୋର ଦେଉଛି ବୋଲି ସେ କହିଛନ୍ତି।
ଦେଶ ଏବେ ୧୯୪୭ ପୂର୍ବ ସ୍ଥିତିରେ ପହଞ୍ଚିଛି। ଯଦି ମଲ୍ରେ ନିଆଁ ଲାଗିଛି ତେବେ ଶୋ’ ରୁମ୍ ବଞ୍ଚାଇଲେ କ’ଣ ହେବ। ଗାନ୍ଧୀଙ୍କ ଆଦର୍ଶକ ନେଇ କଂଗ୍ରେସ ଚାଲିବ। ଯେଉଁମାନେ ବିରୋଧୀ ଦୁର୍ବଳ ବୋଲି କହୁଛନ୍ତି ସେମାନେ ପରର ଅବସ୍ଥା ବିଷୟରେ ଭାବିବା ଉଚିତ ବୋଲି କହ୍ନେୟା ଆହୁରି ମଧ୍ୟ କହିଛନ୍ତି।
ପ୍ରକାଶ ଯେ, କହ୍ନେୟାଙ୍କ ସହ ଗୁଜରାଟର ନିର୍ଦ୍ଦଳୀୟ ବିଧାୟକ ଜିଗ୍ନେଶ ମଓ୍ବୋନୀ ମଧ୍ୟ କଂଗ୍ରେସରେ ଯୋଗ ଦେଇଛନ୍ତି। ଏହା ପୂର୍ବରୁ ସେମାନେ କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ସହ ଦିଲ୍ଲୀସ୍ଥିତ ଶହୀଦ ପାର୍କରେ ପହଞ୍ଚିଥିଲେ।
