ନୂଆଦିଲ୍ଲୀ,୨୫ ।୯: ଇଟାଲି(ରୋମ)ରେ ଆୟୋଜିତ ହେବାକୁ ଯାଉଥିବା ୱାର୍ଲଡ ‘ପିସ୍ କନଫରେନ୍ସ’ରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବନାର୍ଜୀ ଯୋଗ ଦେଇ ପାରିବେ ନାହିଁ । ଭାରତ ସରକାର ତାଙ୍କୁ ରୋମ ଯିବାକୁ ଅନୁମତି ପ୍ରଦାନ କଲେ ନାହିଁ । ବୈଦେଶିକ ମନ୍ତ୍ରଣାଳୟର ସୂଚନା ଅନୁଯାୟୀ, ରାଜନୈତିକ ଦୃଷ୍ଟିକୋଣରୁ ମମତାଙ୍କୁ ରୋମ ଯିବାକୁ ଅନୁମତି ମିଳି ନାହିଁ । ସେଠାରେ କୌଣସି ରାଜ୍ୟର ମୁଖ୍ୟମନ୍ତ୍ରୀଙ୍କ ଉପସ୍ଥିତି ପରିସ୍ଥିତିର ଅନୁରୂପ ନୁହେଁ ବୋଲି କୁହାଯାଇଛି । ଏହା ପୂର୍ବରୁ ବି ଦିଦିଙ୍କ ଚାଇନା ଯାତ୍ରାକୁ ରଦ୍ଦ କରି ଦିଆଯାଇଥିଲା । ଅନ୍ୟପଟେ ମମତା ବାନାର୍ଜୀଙ୍କୁ ରୋମ ଯିବାକୁ ଅନୁମତି ନ ମିଳିବାରୁ ତୃଣମୂଳ କଂଗ୍ରେସ(ଟିଏମ୍ସି)ର ପ୍ରତିକ୍ରିୟା ଆସିଛି । ଦଳର ଯୁବ ନେତା ଦିବ୍ୟାଂଶୁ ଭଟ୍ଟାଚାର୍ଯ୍ୟ ଦେବ ଟୁଇଟ୍ କରି କହିଛନ୍ତି କେନ୍ଦ୍ର ସରକାର ଦିଦିଙ୍କୁ ରୋମ ଯିବାକୁ ଅନୁମତି ଦେଲେ ନାହିଁ । ଏହା ପୂର୍ବରୁ ବି ତାଙ୍କର ଚାଇନା ଯାତ୍ରାକୁ ରଦ୍ଦ କରି ଦିଆଯାଇଥିଲା । ଏଥିରେ ଅନ୍ତରାଷ୍ଟ୍ରୀୟ ସମ୍ପନ୍ଧ ଓ ଦେଶର ହିତଦୃଷ୍ଟିରୁ ଏହି ନିଷ୍ପତ୍ତିକୁ ଆମେ ଗ୍ରହଣ କରି ନେଇଥିଲୁ । ଏବେ ଇଟାଲୀ କାହିଁକି ମୋଦି ଜୀ? ପଶ୍ଚିମବଙ୍ଗକୁ ନେଇ ଆପଣଙ୍କର କ’ଣ ଅସୁବିଧା ରହିଛି? ଛି! ସୂଚନାଯୋଗ୍ୟ, ରୋମରେ ଆୟୋଜିତ ହେବାକୁ ଯାଉଥିବା ‘ପିସ୍ କନଫରେନ୍ସ’ରେ ଯୋଗ ଦେବାକୁ ମମତାଙ୍କୁ ନିମନ୍ତ୍ରଣ କରାଯାଇଥିଲା । ହେଲେ ସେ ଏବେ ଏହି କାର୍ଯ୍ୟକ୍ରମରେ ଯୋଗ ଦେଇ ପାରିବେ ନାହିଁ । ଏହା ଅକ୍ଟୋବର ୬-୭ ଦୁଇଦିନ ଧରି ଆୟୋଜିତ ହେବ ।
