୧୯୫୧ ମସିହାରେ ସ୍ଥାପିତ ହୋଇଥିଲା କେନ୍ଦୁଝରଗଡ଼ ପୌରପାଳିକା। ଏହାର ଓ୍ବାର୍ଡ ସଂଖ୍ୟା ୧୭ରୁ ୨୧କୁ ବୃଦ୍ଧି ପାଇଛି। ଏବେ ରାସ୍ତା, ଡ୍ରେନେଜ ସମସ୍ୟା ସାଙ୍ଗକୁ ସ୍ବାସ୍ଥ୍ୟ ଓ ପରିମଳ ବ୍ୟବସ୍ଥା ଶୋଚନୀୟ ହୋଇ ପଡ଼ିଛି। ଫଳରେ ନଗରବାସୀଙ୍କ ଅସନ୍ତୋଷ ବଢୁଛି । ବିଭିନ୍ନ ସାହିର ପୋଖରୀଗୁଡିକ ଅବହେଳିତ ହୋଇ ରହିଥିବା ବେଳେ ସେସବୁର ପୁରରୁଦ୍ଧାର କିମ୍ବା ସଫେଇ ନିୟମିତ ହେଉନଥିବାରୁ ଲୋକେ ବାଧ୍ୟ ହୋଇ ତାହାକୁ ବ୍ୟବହାର କରୁଛନ୍ତି। ଅନେକ ନବ ନିର୍ମିତ ଗୋଷ୍ଠୀଗତ ପାଇଖାନା ନିର୍ମାଣ ହୋଇଛି କିନ୍ତୁ ସେସବୁରେ ତାଲା ଝୁଲୁଥିବାରୁ ବାହାରେ ଲୋକେ ଶୌଚ କରୁଥିବାରୁ ପରିମଳ ବ୍ୟବସ୍ଥା ଶୋଚନୀୟ ହୋଇ ପଡ଼ିଛି । ଅସୁରକ୍ଷିତ ଅବସ୍ଥାରେ ଗାନ୍ଧୀଛକ ଓ ଟେଲିଫୋନ ଏକ୍ସଚେଞ୍ଜ ନିକଟ ପୌରପାଳିକା ମାର୍କେଟ କମ୍ପ୍ଲେକ୍ସ ରହିଥିଲେ ହେଁ ସେସବୁ ଖାଲି କରାଯାଉନଥିବାରୁ ଦୁର୍ଘଟଣା ଆଶଙ୍କା ରହୁଛି। ରାସ୍ତା କଡ ବିଦ୍ୟୁତ ଖୁଣ୍ଟ ଲାଗିଛି କିନ୍ତୁ ଅନେକ ଅଞ୍ଚଳରେ ଆଲୁଅ ଜଳୁ ନ ଥିବାରୁ ଅନ୍ଧାରରେ ଲୋକ ଯାତାୟତ କରୁଛନ୍ତି । ପାନୀୟ ଜଳ ଯୋଗାଣ ଠିକ ଭାବରେ ହେଉନଥିବାରୁ ଲୋକେ ପାଣି ପାଇଁ ଅନେକ ସମୟରେ ହଇରାଣ ହରକତ ହେଉଛନ୍ତି।
ପାଖାପାଖି ୧୨ କୋଟି କୋଟି ଟଙ୍କା ବ୍ୟୟ ରେ ଦୁଇଟି ପୋଖରୀ ପୁନରୁଦ୍ଧାର କରିବା ସହ ବିଭିନ୍ନ ସାହିରେ ମାଇକ୍ରୋ ଆକ୍ଟିଭିଟି ସେଣ୍ଟର, ମିନି ପାର୍କ, ବସ ଷ୍ଟପ ଉନ୍ନତି କରଣ , ରାସ୍ତା କଡରେ ପେଭର ଟାଇଲ ବିଛାଇବା ଭଳି ବଡ ବଡ କାମରେ ଅର୍ଥ ଖର୍ଚ୍ଚ କରାଯାଉଥିଲେ ହେଁ ଲୋକଙ୍କ ଦୈନନ୍ଦିନ ସମସ୍ୟାକୁ ଅଣଦେଖା କରାଯାଉଥିବାରୁ ଅସନ୍ତୋଷ ଲାଗିରହୁଛି। ବର୍ଷା ହେଲେ ବିଭିନ୍ନ ସାହିରେ ସାଧାରଣ ଲୋକ ତଥା ସରକାରୀ ଲୋକଙ୍କ କ୍ୱାର୍ଟର ଏପରିକି ଖୋଦ ପୌରପାଳିକା ଅଧିକାରିଣୀଙ୍କ ଘର ଭିତରେ ଡ୍ରେନ ପାଣି ପଶୁଥିଲେ ହେଁ ସ୍ଥାୟୀ ସମାଧାନ ହେଉନାହିଁ। ବିଦ୍ୟୁତ କରଣ, ଡ୍ରେନ ଓ ରାସ୍ତା ନିର୍ମାଣରେ ମଧ୍ୟ ବ୍ୟାପକ ଅର୍ଥ ବ୍ୟୟ ହେଉଥିଲେ ହେଁ ସମାଧାନ ନାଁ ଧରୁନି।
-ନରେଶ ଚନ୍ଦ୍ର ପଟ୍ଟନାୟକ
