ନୂଆଦିଲ୍ଲୀ: ଘରଠାରୁ ଦୂରରେ ବ୍ୟସ୍ତବହୁଳ ଜୀବନ ମଧ୍ୟରେ ହାତ ପାହାନ୍ତାରେ ଖାଦ୍ୟ ମିଳିବା ବଡ଼ କଥା। ବିଭିନ୍ନ କମ୍ପାନୀ ଲୋକଙ୍କର ଏଭଳି ଆବଶ୍ୟକତାକୁ ଦୃଷ୍ଟିରେ ରଖି ମନ ମୁତାବକ ଖାଦ୍ୟ ହୋମ୍ ଡେଲିଭରି ସେବା ଯୋଗାଇ ଦେଉଛନ୍ତି। ହେଲେ ବିଗତ ଦିନରେ ଡେଲିଭରି ଦେଉଥିବା ଲୋକଙ୍କ ଆଚରଣ ଚର୍ଚ୍ଚାରେ ରହିଆସିଛି। ସେହିଭଳି ଏକ ଘଟଣାକ୍ରମରେ ଉବର ଇଟ୍ସର ଜଣେ ଡେଲିଭରି ବୟଙ୍କ ଭିଡିଓ ଭାଇରାଲ ହେଉଛି। ଭିଡିଓରେ ଉକ୍ତ ଯୁବକଜଣଙ୍କ ରାସ୍ତାରେ ବସି ଗ୍ରାହକ ଅର୍ଡର ଦେଇଥିବା ଖାଦ୍ୟକୁ ଚୋରାଉଥିବା ଦେଖାଯାଇଛି।
ସାମ୍ନାକୁ ଆସିଥିବା ଭିଡିଓରେ ଯୁବକଜଣଙ୍କ ନିଜ ହାତରେ କିଛି ନୁଡୁଲ୍ସକୁ ଅଲଗା କରି ଏକ ପ୍ଲାଷ୍ଟିକ୍ ପାତ୍ରରେ ରଖୁଥିବା ଦେଖାଯାଇଛି। ଏହାପରେ ସେ କିଛି ଖଣ୍ଡ ଚିକେନ ଏବଂ ସୁପ୍ ମଧ୍ୟ ବାହାର କରି ଉକ୍ତ ପ୍ଲାଷ୍ଟିକ୍ ପାତ୍ରରେ ରଖୁଛନ୍ତି। ପରେ ସେ ପୁନର୍ବାର ପାର୍ସଲଟିକୁ ସିଲ୍ କରି ସେଠାରୁ ଚାଲିଯାଉଛନ୍ତି। ଘଟଣାର ଭିଡିଓ ଭାଇରାଲ ହେବା ପରେ ଉବର ଇଟ୍ସ ପଦକ୍ଷେପ ନେଇଛି। ସେ ଡେଲିଭରି ଦେଉଥିବା ଉକ୍ତ ଯୁବକଙ୍କୁ ବରଖାସ୍ତ କରିବା ସହ ଗ୍ରାହକଙ୍କୁ କ୍ଷମା ମାଗିଛି।
କହିରଖୁଛୁ, ହୋମ ଡେଲିଭରି ଦେଉଥିବା ଯୁବକଙ୍କ ଏଭଳି ଆଚରଣ ପ୍ରଥମ ଘଟଣା ନୁହେଁ। କିଛି ମାସ ପୂର୍ବରୁ ଲଣ୍ଡନରୁ ଏକ ସମାନ ଖବର ସାମ୍ନାକୁ ଆସିଥିଲା। ଏଥିରେ ଜଣେ ଆଇନ ଛାତ୍ର ଖାଇବା ଅର୍ଡର ଦେଇଥିଲେ, ହେଲେ ତାଙ୍କ ପାଖରେ ଖାଦ୍ୟ ପହଞ୍ଚି ନ ଥିଲା। ସେ ଡେଲିଭରି ବୟଙ୍କୁ ଅପେକ୍ଷା କରିଥିଲେ ହେଁ ସେ ତାଙ୍କୁ ଖାଦ୍ୟ ଖାଇଦେଇଥିବା ନେଇ ଏକ ମେସେଜ ପଠାଇଦେଇଥିଲେ।
