କାବୁଲ୍,୧୨।୮: ଆମେରିକାର ଗୁପ୍ତଚର ସଂସ୍ଥା ଚେତାବନୀ ଦେଇଛନ୍ତି ଯେ ତାଲିବାନ ଆତଙ୍କବାଦୀମାନେ ଆସନ୍ତା ୩୦ରୁ ୯୦ ଦିନ ମଧ୍ୟରେ ଆଫଗାନିସ୍ତାନ ଦଖଲ କରିବାକୁ ଯୋଜନା କରିଛନ୍ତି। ଏନେଇ ତାଲିବାନ୍ ମାଷ୍ଟର ପ୍ଲାନ୍ ପ୍ରସ୍ତୁତ କରିଛି। ଏହି ରିପୋର୍ଟ ପ୍ରକାଶ ପରେ ଆଫଗାନିସ୍ତାନର ରାଷ୍ଟ୍ରପତି ଆଶରଫ ଘାନି ସରକାରରେ ଆଲୋଡ଼ନ ସୃଷ୍ଟି ହୋଇଛି। ତାଲିବାନ ଏପର୍ଯ୍ୟନ୍ତ ଦେଶର ୬୫ ପ୍ରତିଶତ ଅଞ୍ଚଳ ଦଖଲ କରିଛି। ସରକାର ଇତିମଧ୍ୟରେ ସୈନ୍ୟ ବାହିନୀ ମୁଖ୍ୟ ଜେନେରାଲ ଓ୍ବଲୀ ଅହମ୍ମଦଜଇଙ୍କୁ ପଦବୀରୁ ହଟାଇ ଦେଇଛନ୍ତି। ତାଙ୍କ ସ୍ତାଡ଼ରେ ଜେନେରାଲ ହିବତୁଲ୍ଲା ଅଲ୍ଲୀଜାଇ ଦାୟିତ୍ୱ ଗ୍ରହଣ କରିଛନ୍ତି। ତେବେ ତାଲିବାନକୁ ପରାସ୍ତ କରିବାକୁ ଆଫଗାନିସ୍ତାନ ସରକାର ତିନି ପର୍ଯ୍ୟାୟ ମାଷ୍ଟରପ୍ଲାନ ପ୍ରସ୍ତୁତ କରିଛନ୍ତି।
ଆଫଗାନିସ୍ତାନର ଗୃହମନ୍ତ୍ରୀ ଜେନେରାଲ ଅବଦୁଲ ସତାର ମିର୍ଜାକୁଓ୍ବାଲ କହିଛନ୍ତି ଯେ ତାଲିବାନକୁ ହଟାଇବା ପାଇଁ ସରକାର ଯୋଜନାବଦ୍ଧ ଭାବେ କାର୍ଯ୍ୟ କରୁଛନ୍ତି। ସରକାର ସ୍ଥାନୀୟ ଗୋଷ୍ଠୀଙ୍କ ହାତରେ ଅସ୍ତ୍ର ଧରାଇଛନ୍ତି। ତାଲିବାନ ନଅଟି ପ୍ରଦେଶ ଦଖଲ କରିବା ପରେ ଆଫଗାନିସ୍ତାନ ସୈନ୍ୟ ବାହିନୀ ପକ୍ଷରୁ ରାଜପଥ, ପ୍ରମୁଖ ସହର ଏବଂ ସୀମାରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ସେହିପରି ସରକାର ସ୍ଥାନୀୟ ସ୍ବେଚ୍ଛାସେବୀ ମିଲିସିଆକୁ ସମର୍ଥନ କରୁଛନ୍ତି, ଯାହାକୁ ’ବିଦ୍ରୋହ ଆନ୍ଦୋଳନ’ ଅର୍ଥାତ୍ ଅପରାଇଜିଂ ମୁଭମେଣ୍ଟ୍ କୁହାଯାଉଥାଏ। ସରକାର ତିନୋଟି ପର୍ଯ୍ୟାୟରେ କାର୍ଯ୍ୟ କରୁଛନ୍ତି ବୋଲି ଗୃହମନ୍ତ୍ରୀ ସୂଚନା ଦେଇଛନ୍ତି। ପ୍ରଥମ ପଦକ୍ଷେପ ହେଉଛି ସରକାରୀ ସୈନ୍ୟଙ୍କ ପରାଜୟକୁ ରୋକିବା। ଦ୍ୱିତୀୟ ପର୍ଯ୍ୟାୟରେ, ସୈନ୍ୟ ବାହିନୀଙ୍କୁ ପୁଣି ସଂଗଠିତ କରାଯିବା କାର୍ଯ୍ୟ ଜାରି ରହିଛି। ଯାହା ଦ୍ୱାରା ସେମାନଙ୍କ ସାହାଯ୍ୟରେ ସହରଗୁଡିକରେ ଏକ ସୁରକ୍ଷା କର୍ଡନ ପ୍ରସ୍ତୁତ କରାଯାଇପାରିବ। ଅପରପକ୍ଷରେ ନିଜ ପଦବୀ ଛାଡ଼ି ଚାଲିଯାଇଥିବା ସୁରକ୍ଷା କର୍ମୀଙ୍କୁ ଫେରାଇ ଆଣିବା କାର୍ଯ୍ୟ ଜାରି ରହିଛି। ଇତିମଧ୍ୟରେ ତାଲିବାନ ଭାରତରୁ ଉପହାର ପ୍ରାପ୍ତ ଏମ୍ଆଇ-୨୪ ହେଲିକପ୍ଟରକୁ କବ୍ଜା କରିଛି। ଆଫଗାନିସ୍ତାନ ବାୟୁସେନା ଏହି ସମୟରେ ପଳାୟନ କରିଥିଲା।
ଆଫଗାନିସ୍ତାନ ନେତା କହିଛନ୍ତି ଯେ ଆମେରିକୀୟ ସୈନ୍ୟ ପ୍ରତ୍ୟାହାର ପରେ ଦେଶର ୪୦୦ ଅଞ୍ଚଳରେ ଭୟଙ୍କର ଯୁଦ୍ଧ ଆରମ୍ଭ ହୋଇଛି। ସେ କହିଛନ୍ତି, ଆମର ବହୁତ ସୀମିତ ବାୟୁ ସମର୍ଥନ ଅଛି। ସାମଗ୍ରୀ ପରିବହନ ଏବଂ ଆହତମାନଙ୍କୁ ଉଦ୍ଧାର କରିବା ପାଇଁ ହେଲିକପ୍ଟର ବ୍ୟବହାର କରାଯାଉଛି। ମିର୍ଜାକୁଓ୍ବାଲ କହିଛନ୍ତି ଯେ ତାଲିବାନ ବିରୋଧରେ ଯୁଦ୍ଧ ପାଇଁ ନିଜ ସମ୍ପ୍ରଦାୟର ଲୋକଙ୍କୁ ନିଯୁକ୍ତି ଦେବା ପାଇଁ କେନ୍ଦ୍ର ସରକାର ସ୍ଥାନୀୟ ନେତାମାନଙ୍କୁ କ୍ଷମତା ପ୍ରଦାନ କରିଛନ୍ତି। ଏହି ଲୋକମାନେ ଆଫଗାନିସ୍ତାନ ରାଷ୍ଟ୍ରପତି ଏବଂ ସରକାରଙ୍କୁ ସମ୍ପୂର୍ଣ୍ଣ ସମର୍ଥନ ଜଣାଇଛନ୍ତି। ପରେ ସେମାନଙ୍କୁ ଆଫଗାନିସ୍ତାନ ସେନାରେ ଭର୍ତ୍ତି କରାଯିବ।
