ନୂଆଦିଲ୍ଲୀ,୩।୮: ଟୋକିଓ ଅଲିମ୍ପିକ୍ସରେ ଭାରତୀୟ ମହିଳା ହକି ଦଳ ସୋମବାର ଶକ୍ତିଶାଳୀ ଅଷ୍ଟ୍ରେଲିଆକୁ ହରାଇ ଇତିହାସରେ ପ୍ରଥମ ଥର ପାଇଁ ସେମିଫାଇନାଲରେ ପ୍ରବେଶ କରିଛି। ଏଭଳି ପ୍ରଦର୍ଶନ ଯୋଗୁ ଟିମ୍ ଇଣ୍ଡିଆର ର଼୍ୟାଙ୍କିଙ୍ଗ୍ରେ ଆସିଛି ଉଲ୍ଲେଖନୀୟ ଉନ୍ନତି। ପୂର୍ବରୁ ମହିଳା ଦଳଗତ ର଼୍ୟାଙ୍କିଙ୍ଗ୍ସରେ ୧୦ମ ସ୍ଥାନରେ ଥିଲା ରାନୀ ରାମପାଲଙ୍କ ଭାରତୀୟ ଦଳ। ଅଷ୍ଟ୍ରେଲିଆ ବିପକ୍ଷ ଐତିହାସିକ ବିଜୟ ପରେ ଭାରତ ୭ମ ସ୍ଥାନକୁ ଉଠିଛି। ଏହା ଦର୍ଶାଇଛି ଏଫ୍ଆଇଏଚ୍ (ବିଶ୍ୱ ହକି ଫେଡେରେଶନ) ପକ୍ଷରୁ ମଙ୍ଗଳବାର ଜାରି କରାଯାଇଥିବା ମହିଳା ଦଳଗତ ର଼୍ୟାଙ୍କିଙ୍ଗ୍ସ। ବିଶ୍ୱ ମହିଳା ହକି ଇତିହାସରେ ଏହା ଭାରତୀୟ ଦଳର ଶ୍ରେଷ୍ଠ ମାନ୍ୟତା। ଟିମ୍ ଇଣ୍ଡିଆ ପାଖରେ ଏବେ ୧୮୫୭.୩୩୮ ପଏଣ୍ଟ ରହିଛି।
ଅନ୍ୟପକ୍ଷରେ ଭାରତ ଠାରୁ ପରାଜୟ ସହ ଟୋକିଓ ଅଲିମ୍ପିକ୍ସରୁ ବିଦାୟ ନେଇଥିବା ଅଷ୍ଟ୍ରେଲିଆ ତଳକୁ ଖସିଛି। ଗୋଟିଏ ସୋପାନ ତଳକୁ ଖସି ୩ୟ ସ୍ଥାନରେ ପହଞ୍ଚିଛି ଅଷ୍ଟ୍ରେଲିଆ।
ଭାରତୀୟ ଦଳ ବୁଧବାର ଖେଳାଯିବାକୁ ଥିବା ସେମିଫାଇନାଲରେ ନୂଆ କରି ଦ୍ୱିତୀୟ ମାନ୍ୟତା ପାଇଥିବା ଆର୍ଜେଣ୍ଟିନାକୁ ଭେଟିବ। ଏହି ଦଳ ତା’ର କ୍ୱାର୍ଟର ଫାଇନାଲରେ ଜର୍ମାନୀକୁ ୩-୦ରେ ହରାଇଥିଲା। ଆର୍ଜେଣ୍ଟିନା ଲିଗ୍ ପର୍ଯ୍ୟାୟରେ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡଠାରୁ ପରାସ୍ତ ହୋଇଥିଲା।
